قومی چیمپئن سمیع اللہ کی فریاد، کیا خیبرپختونخوا اپنے ہیروز کو بھول چکا ہے؟
پشاور (سپورٹس لنک رپورٹ) 35ویں نیشنل گیمز کے طلائی تمغہ یافتہ اور پاکستان کے نامور قومی اتھلیٹ سمیع اللہ آج اپنے ہی صوبے میں بے اعتنائی کا شکار ہیں۔
وہ کھلاڑی جس نے قومی اور بین الاقوامی مقابلوں میں پاکستان کا پرچم بلند کیا، متعدد میڈلز جیت کر ملک و قوم کا نام روشن کیا، آج صوبائی محکمہ کھیل اور متعلقہ حکام کی عدم توجہی پر سوال اٹھانے پر مجبور ہے۔
سمیع اللہ کا کہنا ہے کہ ایک طرف وہ پاکستان کیلئے بین الاقوامی سطح پر کامیابیاں سمیٹ رہے ہیں، جبکہ دوسری جانب خیبرپختونخوا میں انہیں وہ عزت، حوصلہ افزائی اور سہولیات میسر نہیں جو ایک قومی چیمپئن کا حق ہوتی ہیں۔
ان کے مطابق مسلسل نظر انداز کیے جانے سے نہ صرف ان کی حوصلہ شکنی ہو رہی ہے بلکہ نوجوان کھلاڑیوں کو بھی یہ پیغام مل رہا ہے کہ کامیابیوں کے باوجود انہیں اپنے ہی صوبے میں پذیرائی نہیں ملے گی۔
یہ سوال صوبائی حکومت، محکمہ کھیل اور اتھلیٹکس کوچز کے لیے لمحۂ فکریہ ہے کہ آخر وہ کون سی وجوہات ہیں جن کے باعث قومی سطح پر میڈلز جیتنے والے اتھلیٹس کو مناسب سرپرستی نہیں مل رہی؟
اگر ایک نیشنل چیمپئن اور بین الاقوامی میڈلسٹ خود کو محروم اور نظر انداز محسوس کر رہا ہے تو پھر ابھرتے ہوئے کھلاڑیوں کی صورتحال کا اندازہ لگانا مشکل نہیں۔
کھیلوں کی ترقی صرف دعوؤں اور تقریبات سے ممکن نہیں ہوتی بلکہ اپنے باصلاحیت کھلاڑیوں کی عملی سرپرستی، حوصلہ افزائی اور میرٹ پر مبنی مواقع فراہم کرنے سے ہوتی ہے۔
سمیع اللہ جیسے کھلاڑی کسی بھی صوبے کا قیمتی اثاثہ ہوتے ہیں۔ اگر ان کی صلاحیتوں اور خدمات کو نظر انداز کیا گیا تو یہ صرف ایک کھلاڑی کا نقصان نہیں بلکہ صوبے اور ملک کے کھیلوں کے مستقبل کا بھی نقصان ہوگا۔
وقت آگیا ہے کہ صوبائی حکومت، محکمہ کھیل اور اتھلیٹکس کے ذمہ داران اپنی ترجیحات کا ازسرِ نو جائزہ لیں اور ان قومی ہیروز کو وہ مقام دیں جس کے وہ حقیقی معنوں میں مستحق ہیں،
تاکہ آنے والی نسلوں کو یہ یقین ہو کہ محنت، کارکردگی اور قومی اعزازات کی قدر کی جاتی ہے۔ "قومی چیمپئنز کی حوصلہ افزائی قوموں کو مضبوط بناتی ہے، جبکہ ان کی بے قدری کھیلوں کے مستقبل کو کمزور کر دیتی ہے۔
