کس کس کرکٹر کو تمغہ امتیاز ملنے والا ہے،تہلکہ خیز خبر آگئی

اسلام آباد(سپورٹس لنک  رپورٹ)حکومت پاکستان نے ملکی کرکٹ کیلئے بے پناہ خدمات اور ملک کا نام روشن کرنے پر قومی ٹیم کے تین سابق کپتانوں اور موجودہ کپتان سرفراز احمد کو تمغہ امتیاز دینے کا فیصلہ کیا ہے۔ہر سال 23 مارچ کو مختلف شعبوں میں ملک کیلئے خدمات انجام دینے والوں کو سراہتے ہوئے انہیں مختلف اعزازات سے نوازا جاتا ہے اور اس مرتبہ دیگر اہم شخصیات کے ساتھ حکومت پاکستان نے قوم ٹیم کے تین سابق کپتانوں یونس خان، مصباح الحق، شاہد خان آفریدی اور موجودہ سرفراز احمد کو تمغہ امتیاز دینے کا فیصلہ کیا ہے۔یونس خان ٹیسٹ کرکٹ میں پاکستان کی جانب سے 10ہزار رنز بنانے والے واحد بلے باز ہیں اور ان کی زیر قیادت پاکستان نے 2009 کا ورلڈ ٹی20 جیتنے کا اعزاز بھی حاصل کیا تھا۔مصباح الحق اعدادوشمار کے لحاظ سے پاکستان کی ٹیسٹ کرکٹ کی تاریخ کے کامیاب ترین کپتان ہیں جبکہ ان کی زیر قیادت پاکستان نے بڑی بڑی ٹیموں کو زیر کر کے ٹیسٹ کرکٹ میں عالمی نمبر ایک بننے کا اعزاز بھی حاصل کیا تھا۔شاہد آفریدی نے ون ڈے کرکٹ کی تیزترین سنچری بنائی تھی اور ان کا یہ اعزاز 16 سال تک برقرار رہا تھا جبکہ 2009 کے ورلڈ ٹی20 میں انہوں نے سیمی فائنل اور فائنل میں فتح گر کارکردگی دکھا کر پاکستان کو چیمپیئن بنوانے میں اہم کردار ادا کیا تھا۔ ان کی زیر قیادت پاکستان نے 2011 کے عالمی کپ میں سیمی فائنل کھیلنے کا اعزاز بھی حاصل کیا تھا۔قومی ٹیم کے موجودہ کپتان سرفراز احمد کی زیر قیادت پاکستان نے چیمپیئنز ٹرافی جیتنے کے ساتھ ساتھ ٹی20 میں عالمی نمبر ایک بننے کا کارنامہ بھی انجام دیا تھا۔ان چاروں کھلاڑیوں کو رواں سال 23 مارچ تمغہ امتیاز سے نوازا جائےگا۔

error: Content is protected !!