پہلا ون ڈے: پاکستان نے سنسنی خیز مقابلے کے بعدجنوبی افریقا کو دو وکٹوں سے شکست دیدی
پہلا ون ڈے: پاکستان نے سنسنی خیز مقابلے کے بعد جنوبی افریقا کو 2 وکٹوں سے ہرا دیا
فیصل آباد: پہلے ون ڈے میچ میں پاکستان نے سنسنی خیز مقابلے کے بعد جنوبی افریقا کو 2 وکٹوں سے شکست دیکر سیریز میں ایک، صفر کی برتری حاصل کر لی ہے۔
گرین شرٹس نے پروٹیز کی جانب سے ملنے والا 264 رنز کا ہدف آخری اوور میں 8 وکٹوں کے نقصان پر حاصل کرلیا۔
پاکستان کی جانب سے سلمان علی آغا نے 62، محمد رضوان نے 55 اور ٹاپ آرڈر بیٹر فخر زمان نے 45 رنز بنا کرقومی ٹیم کے لیے جیت کی راہ ہموار کی، صائم ایوب 39 رنز بنا کر آؤٹ ہوئے، محمد نواز 9 اور بابر اعظم صرف 7 رنز بنا کر پویلین واپس لوٹ گئے۔
جنوبی افریقہ کی جانب سے لنگی نگیڈی، ڈونووین فریرا اور کوربن بوش نے 2،2 کھلاڑیوں کو آؤٹ کیا، جارج لنڈے اور بجورن فورچوئن نے ایک،ایک وکٹ حاصل کی۔
قبل ازیں فیصل آباد کے اقبال سٹیڈيم میں ہونیوالے ون ڈے میچ میں پاکستان نے ٹاس جیت کر مہمان ٹیم کو پہلے بیٹنگ کی دعوت دی تاہم پہلے بیٹنگ کرتے ہوئے جنوبی افریقا کی پوری ٹیم آخری اوور میں 263 رنز بناکر ڈھیر ہوگئی۔
مہمان ٹیم کی جانب سے کوئنٹن ڈی کوک اور وان ڈرے پریٹوریئس نے ٹیم کو 98 رنز کا عمدہ آغاز فراہم کیا،
پریٹوریئس 57 رنز بناکر صائم ایوب کا شکار بنے، ڈی کوک نے ٹونی ڈی زورزی کے ساتھ ملکر 43 رنز کی شراکت قائم کی اور اس دوران اپنی نصف سینچری بھی مکمل کی، وہ 63 رنز بنانے کے بعد نسیم شاہ کی گیند پر بولڈ ہوگئے جب کہ زورزی 18 رنز چلتے بنے۔
پروٹیز کپتان میتھیو بریٹزکے نے 42 رنز کی اننگز کھیلی، ڈیبیو کرنے والے سینیتمبا قیشیلے 22 رنز پر اپنی وکٹ گنوا بیٹھے، ڈونووین فریرا 3، جارج لنڈے 2، رنز بنانے کے بعد آؤٹ ہوئے جب کہ کاربن بوش نے 41 رنز کی جارحانہ اننگز کھیلی۔
قومی ٹیم کی جانب سے ابرار احمد اور نسیم شاہ نے 3،3 صائم ایوب نے 2 جبکہ محمد نواز اور شاہین آفریدی نے ایک ایک وکٹ حاصل کی۔
پاکستانی سکواڈ: فخر زمان، صائم ایوب، بابر اعظم، محمد رضوان (وکٹ کیپر)، سلمان آغا، حسین طلعت، حسن نواز، محمد نواز، شاہین شاہ آفریدی (کپتان)، نسیم شاہ اور ابرار احمد پر مشتمل ہے۔
جنوبی افریقی ٹیم: کوئنٹن ڈی کوک (وکٹ کیپر)، لوان-ڈرے پریٹوریئس، ٹونی ڈی زورزی، میتھیو بریٹزکے (کپتان)، سینیتمبا قیشیلے، ڈونووین فریرا، جارج لنڈے، کاربن بوش، بیورن فورٹین، لنگی انگیڈی اور لیزاد ولیمزپر مشتمل ہے۔
واضح رہے کہ پاکستان اور جنوبی افریقہ کے درمیان ٹیسٹ سیریز ایک ایک سے برابر رہی تھی جبکہ ٹی 20 سیریز میں پاکستان نے 1-2 سے کامیابی حاصل کی تھی۔
