مورنے مورکل نے انٹرنیشنل کرکٹ سے ریٹائرمنٹ کا اعلان کردیا

جوہانسبرگ(سپورٹس لنک رپورٹ)جنوبی افریقی فاسٹ باؤلر مورنے مورکل نے انٹرنیشنل کرکٹ سے ریٹائرمنٹ کا اعلان کر دیا ہے اور آسٹریلیا کے خلاف ہوم گراؤنڈ پر چار ٹیسٹ میچوں کی سیریز ان کے کیریئر کی آخری سیریز ہو گی۔

33 سالہ فاسٹ باؤلر نے 83 ٹیسٹ، 117 ون ڈے اور 44 ٹی20 میچوں میں جنوبی افریقہ کی نمائندگی کرتے ہوئے مجموعی طور پر 529 وکٹیں حاصل کیں۔

فاسٹ باؤلر نے کہا کہ یہ ایک انتہائی مشکل فیصلہ تھا لیکن میرے خیال میں زندگی کا نیا باب شروع کرنے کیلئے یہ بالکل صحیح وقت ہے کیونکہ میرے بچے چھوٹے اور بیوی غیر ملکی ہے جس کی وجہ سے بیرون ملک دوروں پر ہمیں کافی مشکلات کا سامنا رہتا ہے۔

مورنے مورکل اب تک 294 ٹیسٹ وکٹیں لے چکے ہیں اور آسٹریلیا کے خلاف چار ٹیسٹ میچوں میں ان کی نظریں 300وکٹوں کا سنگ میل عبور کرنے پر ہوں گی۔