پاکستان سپر لیگ کا فائنل، تیاریاں عروج پر،کس کس شہر میں بڑی سکرینیں نصب

اسلام آباد(سپورٹ لنک رپورٹ)پاکستان سپر لیگ کے چوتھے ایڈیشن کے فائنل مقابلے کے لیے شائقین کرکٹ پرجوش ہیں اور اس جوش میں مزید اضافے کے لیے ملک کے مختلف شہروں میں بڑی اسکرین پر میچ دکھانے کے انتظامات کیے گئے ہیں۔کوئٹہ گلیڈی ایٹرز اور پشاور زلمی کے درمیان پی ایس ایل کا فائنل رات 8 بجے شروع ہوگا اور اس سے قبل ملک کے مختلف شہروں میں میچ دیکھنے کی تیاریاں بھی کی جارہی ہیں۔کراچی، اسلام آباد، لاہور، کوئٹہ اور پشاور سمیت ملک کے مختلف شہروں میں میچ دیکھنے کے لیے بڑی اسکرینیں لگائی جارہی ہیں جہاں شائقین آج کھیلے جانے والے میچ سے محظوظ ہوسکیں گے۔کراچی کے بڑے شاپنگ مالز سمیت سوسائیٹیز اور کراچی پریس کلب اور آرٹس کونسل میں بھی بڑی اسکرینوں پر میچ دکھایا جائے گا۔ڈیفنس میں واقع ایس کے بی زیڈ کرکٹ اسٹیڈیم میں بھی شائقین کو براہ راست میچ دکھانے کا انتظام کیا گیا ہے اور شائقین کرکٹ کو انتظامیہ کی جانب سے بھی دعوت دی گئی ہے کہ وہ آکر میچ سے لطف اندوز ہوسکتے ہیں۔لاہور کی ضلعی انتظامیہ کے مطابق پی ایس ایل کا فائنل بڑی اسکرین پر دکھانے کے لیے گریٹر اقبال پارک، گلشن اقبال اور جیلانی پارک میں انتظامات کیے گئے ہیں۔یونیورسٹی آف لاہور میں بھی کوئٹہ گلیڈی ایٹرز اور پشاور زلمی کے درمیان فائنل مقابلے کو بڑی اسکرین پر دکھانے کا اہتمام کیا گیا ہے۔اسلام آباد کے بڑے شاپنگ مال سنچورس مال میں بھی پی ایس ایل فائنل میچ دکھانے کا انتظام کیا گیا ہے۔فیصل آباد کے اقبال اسٹیڈیم میں بھی بڑی اسکرین پر شائقین کرکٹ کو پی ایس ایل فائنل دکھایا جائے گا اور اس کے لیے شائقین کا داخلہ مفت ہوگا۔

error: Content is protected !!