پاک بحریہ نے پانچویں چیف آف دی نیول اسٹاف اوپن شوٹنگ چیمپئن شپ کا ٹائٹل جیت لیا

کراچی (سپورٹس لنک رپورٹ)پاک بحریہ نے پانچویں چیف آف دی نیول اسٹاف اوپن شوٹنگ چیمپئن شپ کا ٹائٹل ایک بار پھر اپنے نام کرلیا۔ پانچویں چیف آف دی نیول اسٹاف اوپن شوٹنگ چیمپئن شپ 2019 کی اختتامی تقریب کا انعقاد پاکستان نیوی شوٹنگ رینج، پی این ایس بہادر کراچی میں ہوا۔کمانڈر کوسٹ، وائس ایڈمرل محمد فیاض جیلانی تقریب کے مہمان خصوصی تھے۔ دفاعی چیمپئن، پاک بحریہ کی ٹیم نے ایک بار پھر سی این ایس اوپن شوٹنگ چیمپئن شپ2019 کا ٹائٹل 33 طلائی،32چاندی اور 23کانسی کے تمغے جیتے، سندھ کی ٹیم رنراپ قرار پائی۔ایک ہفتے جاری رہنے والے اس مقابلے میں پاکستان بھر سے تقریبا ً 400 شوٹرز نے حصہ لیا، چیمپئن شپ کے دوران مردوں، خواتین اور نوجوانوں کے پسٹل، رائفل اور شارٹ گن کیٹیگریز کے کُل24 ایونٹس میں مختلف رینجز پر مقابلے منعقد ہوئے۔

مزید برآں، نوجوانوں میں شوٹنگ اسپورٹس کے فروغ اور کراچی کے مقامی شوٹنگ کلبز کی دلچسپی کے لیے بگ بور پسٹل اور بگ بور رائفل کے چند نمائشی ایونٹس بھی منعقد کیے گئے، یہ ایونٹس مذکورہ چیمپئن شپ کا حصہ نہیں تھے۔تمام ایونٹس ماہر آفیشلز اور جیوری کی زیر نگرانی بین الاقوامی اسپورٹس شوٹنگ فیڈریشن کے جدید قواعد و ضوابط کے تحت منعقد کروائے گئے اور پوری چیمپئن شپ کے دوران بے قاعدگی کی کوئی شکایت درج نہیں کروائی گئی۔مذکورہ چیمپئن شپ میں سیف (SAF) گیمز کے لیے شفاف ٹرائلز کے ذریعے قومی شوٹنگ ٹیم کے انتخاب کے لئے بھی مدد ملی۔ چیمپئن شپ میں پاک بحریہ کے علاوہ پاک فضائیہ، سندھ، پنجاب، بلوچستان، خیبر پختونخواہ، ہائر ایجوکیشن کمیشن، واپڈا، فیڈرل رائفل ایسوسی ایشن، اے ایس ایف، سندھ رینجرز اور سندھ پولیس کی ٹیموں نے بھی حصہ لیا اور شوٹنگ کے کھیل میں اپنی مہارت دکھائی۔تقریب کے اختتام پر مہمان خصوصی نے چیمپئن شپ کے فاتحین میں تمغے اور ٹرافیز تقسیم کیں، سی این ایس اوپن شوٹنگ چیمپئن شپ ہر دو سال بعد منعقد کیا جانے والا مقابلہ ہے، جس کا انعقاد 2008 سے باقاعدگی سے کروایا جا رہا ہے۔ گزشتہ چاروں مقابلے پاک بحریہ نے منعقد کروائے اور چاروں کی فاتح قرار پائی۔