دورہ انگلینڈ سے قبل بھارت آئرلینڈ کیخلاف دو ٹی ٹونٹی میچ کھیلے گا

ممبئی (سپورٹس لنک رپورٹ) بھارتی کرکٹ ٹیم رواں ماہ میں دورہ انگلینڈ سے قبل آئرلینڈ کے خلاف دو ٹی ٹونٹی انٹرنیشنل میچوں کی سیریز کھیلے گی۔ بھارتی ٹیم نے آخری بار 2007ء￿ میں آئرلینڈ کا دورہ کیا تھا اور مہمان ٹیم نے میزبان ٹیم کو واحد ون ڈے میچ میں شکست فاش سے دوچار کیا تھا جبکہ دونوں ٹیمیں ٹی ٹونٹی میں صرف ایک بار مدمقابل ہوئیں اور اس میں بھی بھارتی ٹیم فتح یاب رہی تھی۔بورڈ آف کنٹرول فار کرکٹ ان انڈیا (بی سی سی آئی) نے اس بات کی تصدیق کرتے ہوئے کہا ہے کہ بھارتی ٹیم 27 اور 29 جون کو ڈبلن میں آئرلینڈ کے خلاف دو ٹی ٹونٹی میچوں کی سیریز کھیلے گی۔ آئرلینڈ کے خلاف سیریز کھیلنے کے بعد بھارتی ٹیم دو ماہ طویل دورے پر انگلینڈ جائے گی جہاں پر وہ میزبان ٹیم کے خلاف تین ٹی ٹونٹی،، تین ون ڈے اور پانچ ٹیسٹ میچوں کی سیریز کھیلے گی، بھارتی ٹیم 3 جولائی کو پہلے ٹی ٹونٹی میچ سے دورہ انگلینڈ کا آغاز کرے گی، دونوں ٹیموں کے درمیان دوسرا ٹی ٹونٹی 6 جبکہ تیسرا اور آخری ٹی ٹونٹی 8 جولائی کو کھیلا جائے گا، دونوں ٹیموں کے درمیان ون ڈے سیریز کے میچز 12 سے 17 جولائی جبکہ دونوں ٹیموں کے درمیان ٹیسٹ سیریز کا آغاز یکم اگست سے ہو گا۔