کیپ ٹائون میں بھی پاکستان کو شکست،سیریز جنوبی افریقہ نے جیت لی

کیپ ٹائون (سپورٹس لنک رپورٹ)کیپ ٹاؤن ٹیسٹ میں میزبان جنوبی افریقا نے پاکستان کو 9 وکٹ سے شکست دے کر دوسرا ٹیسٹ اور سیریز جیت لی۔دوسرے ٹیسٹ میں پاکستان کی جانب سے جنوبی افریقا کو جیت کیلئے 41 رنز کا آسان ہدف ملا جسے اس نے باآسانی ایک وکٹ کے نقصان پر پورا کرلیا۔چوتھے دن کے کھیل کا آغاز ہو تو جنوبی افریقا کے اوپنر ڈی برائن 4 رنز بنا کر محمد عباس کا شکار بنے۔اس سے قبل گزشتہ روز پاکستان اپنی دوسری اننگز میں 294 رنز بنا کر آؤٹ ہو ا تھا اور یوں میزبان ٹیم کو جیت کے لیے 41 رنز کا ہدف ملا۔پاکستان کی جانب سے دوسری اننگز کا آغاز امام الحق اور شان مسعود نے کیا لیکن امام الحق ایک بار پھر ناکام ثابت ہوئے اور 6 رنز بنا کر ڈیل اسٹین کی گیند پر آؤٹ ہو ئے، اس کے بعد آؤٹ آف فارم اظہر علی بھی 13 گیندوں پر 6 رنز کے مہمان ثابت ہوئے۔تیسری وکٹ شان مسعود کی شکل میں گری جب وہ 159 کے مجموعی اسکور پر 61 رنز بنا کر ڈیل اسٹین کی گیند پر وکٹوں کے پیچھے آؤٹ ہو گئے، اس کے فوراً بعد ہی اسد شفیق بھی 88 رنز بنا کر فلینڈر کا شکار بنے۔فخر زمان کو چھٹے نمبر پر کھلانے کا تجربہ بھی ناکام ہواوہ انتہائی غیر ذمہ دارانہ شاٹ کھیلنے کی کوشش میں ربادا کی گیند پر ان ہی کے ہاتھوں کیچ آؤٹ ہوئے۔سرفراز احمد، محمد عامر اور یاسر شاہ کی وکٹیں جلد گرنے کے بعد بابر اعظم بھی 72 رنز بنا کر آؤٹ ہو ئے، جبکہ پاکستان کے آخری آؤٹ ہونے والے کھلاڑی شاہین آفریدی تھے جو ربادا کا شکار بنے۔پاکستانی ٹیم دوسری اننگز میں 294 رنز بنا کر آؤٹ ہو گئی اور گرین کیپس نے میزبان ٹیم کو جیت کے لیے 41 رنز کا ہدف دیا ہے۔

error: Content is protected !!