بھارت میں آن لائن گیمز پر پابندی کا بل منظور
بھارتی پارلیمنٹ نے پیسے کے ذریعے کھیلے جانے والے آن لائن گیمز پر پابندی عائد کرنے کے لیے بل منظور کرلیا۔
غیر ملکی خبررساں ادارے ’رائٹرز‘ کے مطابق بھارتی پارلیمنٹ نے ’پروموشن اینڈ ریگولیشن آف آن لائن گیمنگ بل 2025‘ منظور کرلیا، جو رواں ہفتے ایوانِ زیریں سے بھی پاس ہوچکا ہے، اب اس پر صدر کے دستخط ہونا باقی ہیں۔
بھارتی پارلیمنٹ سے منظور ہونے والے بل کے مطابق ’نقصان دہ‘ آن لائن گیمز جس میں پیسے لگے ہوں، ان کی تشہیر اور ان سے متعلق مالی لین دین پر پابندی عائد ہوگی۔
مودی سرکار کی جانب سے یہ بھی کہا گیا کہ یہ گیمز انسانی نفسیات کو بھی نقصان بھی پہنچا سکتے ہیں۔ نئے بل کے مطابق کوئی بھی شخص جو اس قانون کے نفاذ کے بعد پیسے پر مبنی گیمز فراہم کرے گا، اسے 3 سال تک کی قید اور جرمانے کا سامنا کرنا پڑے گا۔
دوسری جانب ماہرین کا کہنا ہے کہ اس فیصلے سے ہزاروں نوکریاں ختم ہونے اور کئی ایپ پر مبنی کاروباروں کے بند ہونے کا خدشہ ہے، جن میں اربوں ڈالر کی غیر ملکی سرمایہ کاری شامل تھی۔
