کراچی بلوز قائداعظم ٹرافی کے فائنل میں پہنچ گئی۔
اسلام آباد 24 نومبر ۔ کراچی بلوز نے قائداعظم ٹرافی کرکٹ ٹورنامنٹ کے فائنل کے لیے کوالیفائی کرلیا۔ اس نے نویں اور آخری راؤنڈ کے تیسرے دن دفاعی چیمپئن سیالکوٹ کو 3 وکٹوں سے ہرادیا۔
یہ اس ٹورنامنٹ میں کراچی بلوز کی پانچویں کامیابی ہے جبکہ سیالکوٹ کی پہلی شکست ہے۔ لاہور وائٹس نے فاٹا کو 33 رنز سے شکست دے دی۔ ملتان نے ایبٹ آباد کے خلاف اننگز اور 201 رنز سے کامیابی حاصل کی۔
شعیب اختر کرکٹ سٹیڈیم راولپنڈی میں کراچی بلوز کو سیالکوٹ کے خلاف جیتنے کے لیے 212 رنز کا ہدف ملا تھا جو اس نےسات وکٹوں کے نقصان پر حاصل کرلیا۔
شان مسعود نے 86 رنز کی ذمہ دارانہ اننگز کھیلی۔ سعد بیگ نے بھی اپنی شاندار فارم کے مطابق 68 رنز سکور کیے۔مہران ممتاز نے چار وکٹیں حاصل کیں۔
اس سے قبل سیالکوٹ کی ٹیم دوسری اننگز میں 260 رنز بناکر آؤٹ ہوگئی تھی۔حمزہ نذر نے 66 رنز بنائے۔کاشف بھٹی نے 72 رنز دے کر 5 وکٹیں حاصل کی اس طرح انہوں نے میچ میں 9 وکٹیں حاصل کیں۔
کاشف بھٹی پلیئر آف دی میچ قرار پائے۔
عمران خان کرکٹ سٹیڈیم پشاور میں لاہور وائٹس کی ٹیم فاٹا کے خلاف دوسری اننگز میں 208 رنز بناکر آؤٹ ہوگئی۔ علی زریاب آصف نے 54 رنز بنائے۔آصف آفریدی نے67 رنز دے کر 5 وکٹیں حاصل کیں۔
فاٹا کو جیتنے کے لیے 175 رنز کا ہدف ملا تھا لیکن وہ 141 رنز بناکرآؤٹ ہوگئی۔ ریحان آفریدی نے 45 رنز سکور کیے۔محمد عباس نے31 رنز دے کر 5 وکٹیں حاصل کیں۔ محمد عباس پلیئر آف دی میچ قرار پائے۔
مرغزار کرکٹ گراؤنڈ اسلام آْباد میں فیصل آباد کی ٹیم بہاولپور کے خلاف دوسری اننگز میں 185 رنز بناکر آؤٹ ہوگئی۔ حسن رضا نے 48 رنز بنائے۔محمد جنید نے 58 رنز دے کر 7 وکٹیں حاصل کیں۔
بہاولپور کو جیتنے کے لیے 310 رنز کا ہدف ملا ہے کھیل ختم ہونے پر اس نے 2 وکٹوں پر124 رنز بنائے تھے۔محمد عالمگیر نے 69 اورمحمد سدیس نے 53 رنز بنائے۔ بہاولپور کو جیت کے لیے مزید 186 رنز درکار ہیں اور اس کی 8 وکٹیں باقی ہیں۔
ڈائمنڈ کرکٹ گراؤنڈ اسلام آباد میں پشاور کی ٹیم اسلام آباد کے خلاف پہلی اننگز میں 231 رنز بناکر آؤٹ ہوگئی۔ساجدخان نے 64 اور رضاء اللہ نے 54 رنز ناٹ آؤٹ سکور کیے۔موسیٰ خان نے79 رنز دے کر5 وکٹیں حاصل کیں۔
پشاور نے فالوآن کے بعد دوسری اننگز میں 2 وکٹوں پر 183 رنز بنائے تھے۔
رضاء اللہ نے 100 رنز سکور کیے۔ وقاراحمد 63 رنز پر ناٹ آؤٹ ہیں۔
ایبٹ آباد کرکٹ سٹیڈیم ایبٹ آباد میں ایبٹ آباد کی ٹیم ملتان کے خلاف فالوآن کے بعد دوسری اننگز میں 182 رنز بناکر آؤٹ ہوگئی۔شاہ زیب خان نے61 اور احمد خان نے 51 رنز سکور کیے۔
علی عثمان نے 4وکٹیں حاصل کیں اس طرح میچ میں انہوں نے مجموعی طور پر 10 کھلاڑیوں کو آؤٹ کیا۔ علی عثمان پلیئر آف دی میچ قرار پائے۔
