عاقب جاوید کی رخصتی ، پاکستان کرکٹ بورڈ نے نئے ہیڈ کوچ کی تلاش کیلئے اشتہار دیدیا
اسلام آباد: پاکستان کرکٹ بورڈ (پی سی بی) نے مسلسل شکستوں اور قومی ٹیم کی ناقص پرفارمنس کو دیکھتے ہوئے نئے ہیڈ کوچ کی تلاش کیلئے اشتہار دیدیا۔
بورڈ کی جانب سے اقدام ایسے وقت میں سامنے آیا ہے جب عبوری ہیڈکوچ کی ذمہ داریاں سنبھالنے والے عاقب جاوید کی سربراہی میں گرین شرٹس کو مسلسل شکستیں دیکھنا پڑیں۔
عاقب جاوید کے دور میں پاکستان ہوم گراؤنڈ پر ہونیوالی آئی سی سی چیمپئینز ٹرافی کے پہلے راؤنڈ سے باہر ہوا جبکہ دورہ نیوزی لینڈ میں انہیں بدترین شکست ہوئی، 7 میچز کے ٹور میں قومی ٹیم محض ایک فتح حاصل کرسکی۔
قبل ازیں سابق ہیڈکوچ گیری کرسٹن اور جیسن گلیسپی جیسے تجربہ کار کوچز کو بھی گزشتہ سال محض چند ماہ ذمہ داریاں پوری کرکے جبری طور پر رخصت کردیے گئے تھے۔
ادھر بورڈ کی جانب سے ہیڈکوچ کیلئے جاری کردہ اشتہار میں لیول 3 کوچنگ سرٹیفیکٹ اور 10 سال کا تجربہ مانگا ہے۔
اطلاعات کے مطابق عبوری ذمہ داریاں سرانجام دینے والے عاقب جاوید اب ہیڈ کوچ بننے میں دلچسپی نہیں رکھتے تاہم ہائی پرفارمنس ڈائریکٹر بننا چاہتے ہیں
پی سی بی ذرائع کا کہنا ہے کہ ہیڈ کوچ کی تقرری کے لیے اس وقت بورڈ کے پاس محدود آپشنز موجود ہیں، تاہم ایک بار پھر غیر ملکی کوچ کی تقرری پر غور کیا جا رہا ہے، اور اس جانب پی سی بی کا رجحان واضح طور پر دکھائی دے رہا ہے۔
عبوری ہیڈ کوچ عاقب جاوید کو چیمپئنز ٹرافی اورپھر دورہ نیوزی لینڈ تک کے لیے ذمہ داریاں دی گئی تھیں،عاقب جاوید اب ہیڈکوچ کے لیے دلچسپی نہیں رکھتے ہیں۔
ندیم خان کے مستعفی ہونے کے بعد سے ڈائریکٹر ہائی پرفارمنس کی خالی آسامی پر عاقب جاوید کی تقرری ہوسکتی ہے،پی سی بی نے ڈائریکٹر ہائی پرفارمنس سینٹر کےلئے بھی اشتہار دیا ہے۔
