انگلینڈ سے شکست کے بعد پاکستان اب کیسے سیمی فائنل میں جا سکتا ہے؟
ٹی20ورلڈ کپ سپر8 مرحلے کے میچ میں انگلینڈ کے ہاتھوں شکست کے بعد پاکستان کے لیے سیمی فائنل میں جگہ بنانا مشکل ہو گیا ہے۔
منگل کو کھیلے گئے میچ میں انگلینڈ نے پاکستان کو شکست دے دی، جس کے بعد سیمی فائنل تک پہنچنا اب پاکستان کے لیے صرف اپنے آخری میچ کے نتائج پر نہیں بلکہ گروپ میں دیگر ٹیموں کے نتائج پر بھی منحصر ہو گیا ہے۔
اس وقت گروپ 2 میں انگلینڈ دونوں میچ جیت کر 4 پوائنٹس کے ساتھ سرِ فہرست ہے، پاکستان اور نیوزی لینڈ کے پاس ایک ایک پوائنٹ ہے جبکہ سری لنکا نے ابھی تک کوئی میچ نہیں جیتا۔
پاکستان کے سیمی فائنل میں پہنچنے کے لیے ضروری ہے کہ وہ اپنے آخری میچ میں سری لنکا کو شکست دے۔
اس کے ساتھ ساتھ ضروری ہے کہ انگلینڈ اپنے آخری میچ میں نیوزی لینڈ کو شکست دے، جبکہ سری لنکا بھی نیوزی لینڈ کو ہرائے۔
ایسی صورت میں پاکستان کے 3 پوائنٹس ہوں گے اور وہ سیمی فائنل میں جگہ بنا لے گا، جبکہ نیوزی لینڈ صفر اور سری لنکا کے 2 پوائنٹس ہوں گے۔
اگر انگلینڈ نیوزی لینڈ کو ہرا دے لیکن نیوزی لینڈ سری لنکا کو شکست دے دیتا ہے، تو پاکستان اور نیوزی لینڈ دونوں کے 3، 3 پوائنٹس ہو جائیں گے اور سیمی فائنل میں جگہ کا فیصلہ رن ریٹ کے حساب سے ہوگا۔
