ٹی 20 ورلڈکپ 2026: بھارت اور پاکستان کے دوبارہ ٹکراؤ کا امکان برقرار

ٹی 20 ورلڈکپ 2026: بھارت اور پاکستان کے دوبارہ ٹکراؤ کا امکان برقرار

ویب ڈیسک: آئی سی سی مینزٹی 20 ورلڈ کپ 2026 کےسپر 8 مرحلے کے آخری دو روز باقی رہ گئے ہیں اور سیمی فائنل میں جگہ بنانے والی ٹیموں کا فیصلہ جلد متوقع ہے۔

موجودہ صورتحال میں روایتی حریف پاکستان اور بھارت کے ایک بار پھر آمنے سامنے آنے کا امکان بھی موجود ہے، تاہم یہ کئی نتائج سے مشروط ہوگا۔

بھارتی ویب سائٹ NDTV کی رپورٹ کے مطابق سپر 8 کے گروپ 1 سے جنوبی افریقہ قومی کرکٹ ٹیم اور گروپ 2 سے انگلینڈ قومی کرکٹ ٹیم سیمی فائنل کے لیے کوالیفائی کرچکے ہیں، تاہم دونوں گروپس کی دوسری ٹیموں کا فیصلہ ہونا باقی ہے۔

گروپ 1 کی صورتحال ;  گروپ 1 میں جنوبی افریقہ کے 2 میچز میں 4 پوائنٹس اور 2.890 پلس نیٹ رن ریٹ ہے۔ ویسٹ انڈیز قومی کرکٹ ٹیم کے 2 پوائنٹس اور 1.791 پلس نیٹ رن ریٹ ہے

جبکہ بھارت قومی کرکٹ ٹیم کے بھی 2 پوائنٹس ہیں لیکن ان کا نیٹ رن ریٹ منفی 0.100 ہے۔ زمبابوے قومی کرکٹ ٹیم اب تک کوئی پوائنٹ حاصل نہیں کر سکی۔

یکم مارچ کو جنوبی افریقہ کا مقابلہ زمبابوے سے ہوگا جبکہ بھارت اور ویسٹ انڈیز مدِ مقابل ہوں گے۔ بھارت کے لیے سیمی فائنل میں رسائی کی خاطر ویسٹ انڈیز کے خلاف فتح لازمی ہے۔

گروپ 2 کی صورتحال ; گروپ 2 میں انگلینڈ 3 میچز میں 6 پوائنٹس اور 1.096 پلس نیٹ رن ریٹ کے ساتھ سرفہرست ہے۔ نیوزی لینڈ قومی کرکٹ ٹیم کے 3 پوائنٹس اور 1.390 پلس نیٹ رن ریٹ ہے جبکہ پاکستان قومی کرکٹ ٹیم کے 2 میچز میں 1 پوائنٹ اور منفی 0.461 نیٹ رن ریٹ ہے۔ سری لنکا قومی کرکٹ ٹیم کے پاس صفر پوائنٹس ہیں۔

پاکستان کو سیمی فائنل میں پہنچنے کے لیے سری لنکا کے خلاف نہ صرف کامیابی بلکہ بڑے مارجن سے فتح درکار ہوگی تاکہ وہ نیوزی لینڈ کو نیٹ رن ریٹ میں پیچھے چھوڑ سکے۔

آئی سی سی کے حساب سے پاکستان کو کم از کم 65 رنز سے کامیابی حاصل کرنا ہوگی یا ہدف 13 اوورز میں مکمل کرنا ہوگا، تاہم حتمی صورتحال پہلی اننگز کے بعد واضح ہوگی۔

بھارت بمقابلہ پاکستان، ممکنہ منظرنامہ ; سیمی فائنل میں سپر 8 گروپ 1 کی پہلی ٹیم گروپ 2 کی دوسری ٹیم سے جبکہ گروپ 2 کی پہلی ٹیم گروپ 1 کی دوسری ٹیم سے مقابلہ کرے گی۔

اگر دونوں ٹیمیں اپنے اپنے سیمی فائنلز جیتنے میں کامیاب رہیں تو فائنل میں روایتی حریف بھارت اور پاکستان کا ٹکراؤ ممکن ہے۔

ایک کمزور مگر ممکنہ منظرنامے کے تحت اگر زمبابوے جنوبی افریقہ کو بڑے مارجن سے شکست دے اور بھارت ویسٹ انڈیز کو بھاری فرق سے ہرادے تو نیٹ رن ریٹ کی بنیاد پر گروپ پوزیشنز تبدیل ہو سکتی ہیں، جس کے نتیجے میں سیمی فائنل میں بھارت اور پاکستان آمنے سامنے آسکتے ہیں۔

آئی سی سی کے مطابق اگر دونوں ٹیموں کا سیمی فائنل طے ہوتا ہے تو میچ کولمبو میں کھیلا جائے گا، جبکہ اگر بھارت کسی اور ٹیم کے خلاف سیمی فائنل کھیلے تو دوسرا سیمی فائنل ممبئی میں ہوگا۔

تاہم موجودہ حالات میں یہ تمام امکانات نتائج اور نیٹ رن ریٹ پر منحصر ہیں، اور کسی بھی بڑے مقابلے سے قبل صورتحال میں تبدیلی خارج از امکان نہیں۔