سروس ٹائرز جونیئر نیشنل ٹینس: احتشام اور ہاجرہ کی ڈبل ٹائٹل فتوحات
لاہور: باغِ جناح کے پنجاب ٹینس اکیڈمی میں منعقدہ ‘سروس ٹائرز جونیئر نیشنل ٹینس چیمپئن شپ 2026’ اپنے تمام تر رعنائیوں کے ساتھ اختتام پذیر ہو گئی۔
ایونٹ کے دوران کریسنٹ اسکول کے احتشام ہمایوں اور سیکاس (SICAS) کی ہاجرہ سہیل نے شاندار کارکردگی کا مظاہرہ کرتے ہوئے دو دو ٹائٹلز اپنے نام کیے۔
بوائز انڈر-18 سنگلز کے فائنل میں احتشام ہمایوں نے بہترین مہارت اور اعصاب پر قابو پاتے ہوئے عامر مزاری کو اسٹریٹ سیٹس میں 4-6 اور 5-7 سے شکست دی۔
اس سے قبل احتشام نے عامر مزاری کے ساتھ مل کر انڈر-18 ڈبلز کا ٹائٹل بھی جیتا، جہاں انہوں نے محمد یحییٰ اور اینا قادر کی جوڑی کو 2-6 اور 3-6 سے زیر کیا۔
لڑکیوں کے مقابلوں میں ہاجرہ سہیل اسٹار بن کر ابھریں۔ انہوں نے انڈر-18 فائنل میں بسمل ضیاء کو یکطرفہ مقابلے کے بعد 1-6 اور 0-6 سے شکست دے کر پہلی کامیابی حاصل کی، اور پھر انڈر-14 کیٹگری میں خدیجہ خلیل کو 4-5 اور 2-4 سے ہرا کر اپنا دوسرا ٹائٹل مکمل کیا۔
دیگر مقابلوں میں، پشاور سے تعلق رکھنے والے شایان آفریدی نے بوائز انڈر-14 فائنل میں محمد ایان کو 1-4 اور 1-4 سے شکست دے کر اپنی صلاحیتوں کا لوہا منوایا۔
انڈر-12 کیٹگری میں مصطفیٰ عزیر رانا نے محمد فیضان کو ایک سخت مقابلے کے بعد 1-4، 4-1 اور 2-4 سے ہرا کر ٹرافی جیتی۔ لڑکیوں کے انڈر-12 فائنل میں ایمان شہباز نے شاہ نور عمر کو 1-4 اور 1-4 سے ہرا کر فتح حاصل کی، جبکہ انڈر-10 مکسڈ کیٹگری میں ابراہیم لغاری نے حاشر مصطفیٰ کو 2-6 سے شکست دی۔
تقریبِ تقسیمِ انعامات کے مہمانِ خصوصی وقار نثار اور احمد خان لغاری تھے،
جنہوں نے فاتح کھلاڑیوں میں انعامات تقسیم کیے۔ اس موقع پر پی ایل ٹی اے (PLTA) کے سینئر نائب صدر راشد ملک، کھلاڑیوں کے اہل خانہ اور کوچز کی بڑی تعداد موجود تھی۔ مہمانوں نے نچلی سطح پر ٹینس کے فروغ اور جونیئر ٹیلنٹ کی حوصلہ افزائی کی اہمیت پر زور دیا۔
