پاکستان اور آسٹریلیا کے درمیان ون ڈے سیریز کے ٹکٹوں کی فروخت کا شیڈول جاری
پاکستان کرکٹ بورڈ نے آسٹریلیا کے خلاف آئندہ ماہ شروع ہونے والی 3 میچوں پر مشتمل ون ڈے سیریز کے لیے ٹکٹوں کی فروخت کا باضابطہ اعلان کردیا ہے۔
پی سی بی کے مطابق شائقین کرکٹ جمعہ 22 مئی سے آن لائن اور فزیکل دونوں ذرائع سے ٹکٹیں حاصل کرسکیں گے۔
آن لائن ٹکٹوں کی بکنگ اسی روز دوپہر ایک بجے سے پی سی بی کی ویب سائٹ pcb.tcs.com.pk پر شروع ہو جائے گی، جبکہ جسمانی طور پر ٹکٹیں خریدنے کے لیے لاہور، راولپنڈی اور اسلام آباد کے 16 مخصوص ٹی سی ایس مراکز کا رخ کیا جا سکتا ہے۔
شائقین کی سہولت کے لیے لاہور میں 8، راولپنڈی میں 5 اور اسلام آباد میں 3 ایکسپریس سینٹرز مختص کیے گئے ہیں۔
سیریز کا باقاعدہ آغاز 30 مئی کو راولپنڈی کرکٹ اسٹیڈیم میں پہلے ون ڈے سے ہوگا، جس کے بعد دونوں ٹیمیں لاہور منتقل ہو جائیں گی جہاں 2 اور 4 جون کو قذافی اسٹیڈیم میں دوسرا اور تیسرا ون ڈے کھیلا جائے گا۔
تمام میچز مقامی وقت کے مطابق شام ساڑھے چار بجے شروع ہوں گے۔
شائقین کی اسٹیڈیم آمد کو یقینی بنانے اور کرکٹ کے فروغ کے لیے پی سی بی نے ٹکٹوں کی قیمتیں انتہائی مناسب رکھی ہیں، جن کا آغاز محض 200 روپے سے ہوتا ہے۔
