امریکا میں فیفا ورلڈ کپ کے جشن کے لیے دنیا کی سب سے بڑی فٹبال کی تیاری
واشنگٹن: امریکا کی میساچوسیٹس پورٹ اتھارٹی نے فیفا ورلڈ کپ کے جوش و خروش کو دوچند کرنے کے لیے ایک منفرد اعلان کیا ہے جس کے تحت دنیا کی سب سے بڑی فٹبال تیار کی جائے گی۔
بین الاقوامی خبر رساں اداروں کے مطابق یہ دیوقامت فٹبال اپنی نوعیت کا ایک نیا عالمی ریکارڈ قائم کرے گی۔
اس عظیم الشان فٹبال کا قطر 45 فٹ رکھا جائے گا جو اسے گینیز ورلڈ ریکارڈز میں جگہ دلانے کے لیے کافی ہوگا۔ موجودہ ریکارڈ دوحہ بینک کے پاس ہے، جس نے 2013 میں 39 فٹ 11.8 انچ قطر کی فٹبال بنا کر یہ اعزاز اپنے نام کیا تھا۔
اتھارٹی حکام نے کہا کہ یہ دلچسپ منصوبہ فیفا ورلڈ کپ کے ان میچز کے جشن کا حصہ ہے جو رواں سال جون اور جولائی میں بوسٹن کے فاکسبرو اسٹیڈیم میں کھیلے جائیں گے۔ اس کوشش کا مقصد مقامی شائقین میں فٹبال کے عالمی مقابلوں کا جوش بڑھانا ہے۔
تیار کردہ دیوقامت فٹبال کو پیئرس پارک دوم میں 12 سے 18 جون تک عوام کے لیے نمائش کے واسطے رکھا جائے گا۔ منتظمین نے مزید کہا کہ 13 جون کو اس مقام پر ایک خصوصی کمیونٹی ایونٹ بھی منعقد کیا جائے گا جس میں شہریوں کی بڑی تعداد شرکت کرے گی۔
امریکی انتظامیہ کا کہنا ہے کہ کھیلوں کے اس بڑے عالمی میلے کے دوران اس طرح کے اقدامات نہ صرف شائقین کو خوش آمدید کہتے ہیں بلکہ کھیل کے فروغ میں بھی کلیدی کردار ادا کرتے ہیں۔ اس پروجیکٹ پر کام کا آغاز جلد کر دیا جائے گا تاکہ وقت پر تکمیل ممکن ہو۔
واضح رہے کہ دوحہ بینک کا قائم کردہ گزشتہ ریکارڈ ایک دہائی سے زائد عرصے سے برقرار ہے جسے اب امریکا میں تیار ہونے والی یہ فٹبال پیچھے چھوڑ دے گی۔
اس اقدام سے بوسٹن میں ہونے والے ورلڈ کپ میچز کی اہمیت اور مقبولیت میں بھی خاطر خواہ اضافہ متوقع ہے۔ کھیلوں کے شائقین اس منفرد اور دیوقامت فٹبال کے ساتھ تصاویر بنوانے کے لیے بے تاب نظر آتے ہیں۔
