سلیکشن نہ ہونے پر کرکٹرز کا ہیڈ کوچ پر وحشیانہ تشدد، سر پر 20 ٹانکے آگئے
بھارت کی ڈومیسٹک ٹی 20 کرکٹ چیمپئن شپ، سید مشتاق علی ٹرافی کے دوران ایک تشویشناک واقعہ پیش آیا ہے، جس میں انڈر 19 کے ہیڈ کوچ ایس وینکٹارمن پر مبینہ طور پر تشدد کیا گیا۔
رپورٹس کے مطابق، ایس وینکٹارمن کو ٹورنامنٹ کے لیے منتخب نہ کرنے پر تین مقامی کرکٹرز نے ان پر حملہ کیا۔ واقعہ 8 دسمبر کی صبح ہوا، جس میں کوچ کے سر میں چوٹ اور کندھے میں فریکچر ہوا، اور ان کے سر پر 20 ٹانکے لگائے گئے۔
ایف آئی آر درج کر لی گئی ہے اور مبینہ طور پر ملزم کرکٹرز فرار ہیں۔ وینکٹارمن نے اپنی شکایت میں دعویٰ کیا کہ کرکٹ ایسوسی ایشن آف پانڈیچیری کے سیکرٹری جی چندرن نے انہیں حملے کے لیے اکسا یا۔
ہیڈ کوچ کے مطابق تینوں کرکٹرز نے انہیں گالیاں دی اور جان سے مارنے کی نیت سے حملہ کیا، جس میں ارونددراج نے انہیں پکڑا اور کارتیکیان نے سنتوش کمارن کا بیٹ استعمال کیا۔
دوسری جانب فورم کے صدر سینتھل کمارن نے سیکرٹری جی چندرن پر لگائے گئے الزامات کی تردید کی ہے اور کہا کہ وینکٹارمن اکثر مقامی کرکٹرز کے ساتھ بدتمیزی اور فحش زبان استعمال کرنے کے لیے جانا جاتا ہے، اور چندرن کے خلاف ان کی ناراضگی کے چرچے کافی ہیں۔
