لاہور جمخانہ میں گالف ستاروں کی کہکشاں: جے اے زمان میموریل اوپن گالف چیمپئن شپ کا شاندار انعقاد
لاہور جمخانہ میں گالف ستاروں کی کہکشاں: جے اے زمان میموریل اوپن گالف چیمپئن شپ کا شاندار انعقاد
لاہور: پاکستان کے ممتاز گالفنگ ایونٹس میں سے ایک، ‘جے اے زمان میموریل اوپن گالف چیمپئن شپ’ اپنے پورے جوش و خروش کے ساتھ لاہور جمخانہ گالف کلب میں جاری ہے، جس میں ملک بھر سے صف اول کے پروفیشنل اور امیچر گالفرز حصہ لے رہے ہیں۔
قومی گالف کیلنڈر کے اس اہم ترین ٹورنامنٹ میں سب کی نظریں دفاعی چیمپئن اور پاکستان کے لیجنڈری گالفر شبیر اقبال پر مرکوز ہیں۔
200 سے زائد ٹورنامنٹ جیتنے کا غیر معمولی ریکارڈ رکھنے والے شبیر اقبال ایک بار پھر ٹائٹل کے مضبوط امیدوار ہیں، تاہم ماہرین کا ماننا ہے کہ ابھرتے ہوئے باصلاحیت کھلاڑیوں کی موجودگی میں ان کے لیے جیت کی راہ آسان نہیں ہوگی۔
چیمپئن شپ میں پروفیشنلز کے ساتھ ساتھ امیچر گالفرز کی بڑی تعداد بھی شریک ہے جو نہ صرف ٹرافی بلکہ قومی سطح پر اپنی شناخت بنانے کے لیے کوشاں ہیں۔
اس سال ایونٹ کی خاص بات خواتین گالفرز کی بھرپور شرکت ہے، جو گالف کے معیار کو مزید بلند کرنے اور کھیل میں صنفی تنوع کو فروغ دینے کے لیے پرعزم ہیں۔
منتظم خاندان کی نمائندگی کرتے ہوئے حامد زمان نے تمام شرکاء کے لیے نیک خواہشات کا اظہار کیا اور گالف کے فروغ کے لیے اپنے خاندان کے دیرینہ عزم کا اعادہ کیا۔
مرحوم جے اے زمان کی یاد میں منعقد ہونے والی یہ چیمپئن شپ نئے ٹیلنٹ کو نکھارنے اور کھیل کی روح کو برقرار رکھنے کے لیے ایک بہترین پلیٹ فارم ثابت ہو رہی ہے۔ لاہور جیم خانہ کے تاریخی گالف کورس پر جاری یہ ایونٹ پاکستان میں گالف کی روایت اور پیشہ ورانہ مہارت کا حسین امتزاج پیش کر رہا ہے۔
