Tag: سپر لیگ

دبئی(سپورٹس لنک رپورٹ) پاکستان سپر لیگ کی انتظامیہ اپنی ٹی ٹین لیگ کروانے پر غور کررہی ہے جس کا انعقاد پاکستان میں کیا جائے گا۔ذرائع نے  ایک نجی ٹی وی چینل کو بتایا کہ رواں سال ستمبر میں پی ایس ایل ٹی ٹین کروانے کے حوالے سے غور کررہی ہے جس کا انعقاد پاکستان میں ہوگا۔دبئی میں ہونے والی ملاقات میں دس، دس اوورز کی لیگ پاکستان میں کرانے پر اصولی اتفاق کیا گیا ہے۔ذرائع کا کہنا تھا کہ اگر معاملات طے ہوگئے تو ستمبر میں ٹی ٹین پی ایس ایل کرائی جائے گی۔لیگ میں موجودہ پی ایس ایل کی 6 ٹیمیں ہی حصہ لیں گی تاہم کھلاڑیوں کے انتخاب کے لیے الگ ڈرافٹنگ کا انعقاد کیا جائے گا۔خیال رہے کہ گزشتہ سال کے اختتام پر متحدہ عرب امارات میں ہی ایک ٹی10 لیگ کا انعقاد کیا گیا تھا جس میں پاکستان کے صف اول کے کھلاڑیوں نے حصہ لیا تھا۔

دبئی(سپورٹس لنک رپورٹ) لاہور قلندرز کے خلاف پاکستان سپر لیگ کے تیز ترین نصف سنچری اسکور کرنے والے اسلام آباد یونائیٹڈ کے جارح مزاج اوپنر لیوک رونکی نے ٹورنامنٹ کے پاکستان میں ہونے والے میچز میں شرکت کا اعلان کردیا۔میچ کے بعد پریس کانفرنس کے دوران ایک صحافی نے ان سے سوال کیا کہ کیا وہ پاکستان آئیں گے جس کا رونکی نے مثبت جواب دیا۔ان کا کہنا تھا کہ پی ایس ایل میں اچانک کوئی ایسا کھلاڑی سامنے آجاتا ہے جس کے بارے میں آپ نے پہلے کبھی نہیں سنا ہوتا اور وہ 140 کلو میٹر فی گھنٹہ کی رفتار سے بولنگ کررہا ہوتا ہے۔انہوں نے کہا کہ پی ایس ایل میں کھلاڑیوں کا معیار اچھا ہے، یہاں تک کے جن کھلاڑیوں کو موقع نہیں مل پارہا اور بنچ پر موجود ہیں وہ بھی اچھے ہیں۔لیوک رونکی نے کہا کہ لاہور اننگز کے اختتام پر اتنا اچھی نہیں کھیل ہائی جتنا کھیل سکتی تھی اور ہم نے انہیں 163 رنز پر محدود کرنے کے لیے اچھا کھیل پیش کیا۔اسلام آباد کے اوپنر کا کہنا تھا کہ جے پی ڈومنی اور میں نے پچھلے میچ کا تسلسل برقرار رکھا، پراعتماد تھے کہ ٹیم کو اچھا آغاز فراہم کریں گے، ہم ہر بال کو میرٹ پر کھیل رہے تھے۔لیوک رونکی نے کہا کہ ٹی ٹوئنٹی کرکٹ میں اپنا ذہن صاف رکھنا ہوتا ہے، اگر آپ کے دماغ میں زیادہ باتیں چل رہی ہوں گی تو آپ اچھا کھیل پیش نہیں کرپائیں گے۔انہوں نے کہا کہ ٹیم کے تمام کھلاڑی ہر میچ کو پرسکون انداز میں کھیل رہے ہیں جس کی وجہ سے فتوحات مل رہی ہیں۔ان کا کہنا تھا کہ مصباح میچز کے دوران زیادہ جذباتی نہیں ہوتے جس کا فائدہ ٹیم کو ہوتا ہے۔ان کا مزید کہنا تھا کہ پچھلے 9 سے 10 مہینوں سے مختلف لیگز میں میری فارم اچھی رہی ہے، میں بے فکر ہوکر بیٹنگ کرتا ہوں، میرے بین الاقوامی کرکٹ کا اختتام ہوچکا ہے اور میں اب صرف لیگ کرکٹ کھیلتا۔لیوک رونکی کا مزید کہنا تھا کہ دبئی کی وکٹ ٹورنامنٹ کے آغاز کے مقابلے میں اب بہت اچھی ہوگئی ہے، ان وکٹوں پر بولرز کے مقابلے میں بلے باز زیادہ کامیاب ہوں گے۔

دبئی(سپورٹس لنک رپورٹ)پاکستان سپر لیگ کے 19ویں میچ میں کراچی کنگز نے کوئٹہ گلیڈی ایٹرز کے خلاف ٹاس جیت کر پہلے فیلڈنگ کا فیصلہ کیا ہے۔کراچی کی ٹیم میں اسٹار آل راؤنڈر شاہد آفریدی اور وائس کی واپسی ہوئی ہے جبکہ کوئٹہ کی ٹیم میں کوئی تبدیلی نہیں کی گئی۔میچ پاکستانی وقت کے مطابق رات 9 بجے شروع ہوگا۔کراچی کنگز اب تک ایونٹ میں 5 میچز کھیل چکی ہے جس میں اسے صرف ایک میں ناکامی کا سامنا رہا جب کہ ایک میچ بارش کی وجہ سے متاثر ہوا اور تین میں اسے کامیابی ملی۔کوئٹہ گلیڈی ایٹرز کی کارکردگی ایونٹ میں اب تک مناسب رہی، 6 میچز میں سے اسے تین میں کامیابی اور تین میں ناکامی کا سامنا کرنا پڑا اور 6 پوائنٹس کے ساتھ چوتھے نمبر پر ہے۔گزشتہ روز کوئٹہ گلیڈی ایٹرز نے سنسنی خیز مقابلے کے بعد ٹورنامنٹ کی مشکل حریف ملتان سلطانز کو شکست دی تھی۔

شارجہ (سپورٹس لنک رپورٹ)کوئٹہ گلیڈی ایٹرز کے کپتان سرفراز احمد کا کہنا ہے کہ پاکستان سپر لیگ اب تک اپنی ٹیم کی کارکردگی پر مایوسی ہے لیکن اچھا کھیل پیش کر لیگ میں کم بیک کریں گے۔

پاکستان سپر لیگ کے تیسرے ایڈیشن میں پوائنٹس ٹیبل پر ملتان سلطانز اور کراچی کنگز 5 میچز میں 7 پوائنٹس کے ساتھ بالترتیب پہلے اور دوسرے نمبر پر موجود ہیں۔

جب کہ دفاعی چیمپئن پشاور زلمی اور اسلام آباد یونائیٹڈ 5 میچز میں 6، 6 پوائنٹس کے ساتھ ٹاپ 4 پوزیشن پر ہیں۔

کوئٹہ گلیڈی ایٹرز کی 5 میچز میں 4 پوائنٹس کے ساتھ پانچویں پوزیشن ہے جبکہ لاہور قلندرز کسی بھی میچ میں کامیابی حاصل کرنے میں ناکام رہی ہے۔

جیو نیوز سے بات چیت کرتے ہوئے کوئٹہ گلیڈی ایٹرز کے کپتان سرفراز احمد نے کہا ہے کہ ابھی تک پاکستان سپر لیگ بہت اچھے انداز میں آگے جا رہی ہے، ٹورنامنٹ کا دوسرا راؤنڈ ابھی شروع ہوا ہے جس میں جتنے بھی میچز ہوں گے وہ سب زبردست ہوں گے۔

ٹیم کی ٹاپ 4 پوزیشن سے آؤٹ ہونے پر ان کا کہنا تھا کہ ٹیم کی کارکردگی پر مایوسی ضرور ہے لیکن ابھی ٹورنامنٹ باقی ہے اور امید ہے کہ اچھا کھیل پیش کرکے کم بیک کریں گے۔

انہوں نے کہا کہ ہماری ٹیم کی بیٹنگ میں کچھ خامیاں ہیں جنہیں دور کرنے کی کوشش کریں گے اور امید ہے کہ یہ غلطیاں اب نہیں ہوں گی اور اچھا کھیل پیش کریں گے۔

سرفراز حمد کا کہنا تھا کہ پی ایس ایل میں دنیا کے بہترین کھلاڑی کھیل رہے ہیں جس میں آل راؤنڈرز بھی شامل ہیں اور ہمارے نوجوان کھلاڑیوں کے پاس ان کے ساتھ کھیلنے اور سیکھنے کا بہترین موقع ہے۔

پاکستان سپر لیگ سے نئے ٹیلنٹ ملنے سے متعلق سوال پر سرفراز احمد نے کہا کہ لیگ میں 3 سے 4 نوجوان کھلاڑی اچھی کارکردگی دکھا رہے ہیں لیکن قومی ٹیم میں شمولیت کے حوالے سے فی الحال ابھی کچھ کہنا قبل از وقت ہوگا، امید ہے کہ پی ایس ایل کے اختتام پر 2 سے 3 اچھے کھلاڑی پاکستان کو ملیں گے۔

دبئی (سپورٹس لنک رپورٹ) پاکستان سپر لیگ کا دوسرا مرحلہ بھی ختم ہو گیا، تمام ٹیمیں آج آرام کریں گی۔ کل سے دبئی کے میدان میں کرکٹ کا میلہ سجے گا، ملتان سلطانز سات پوائنٹس کیساتھ پہلی پوزیشن پر قبضہ جمائے ہوئے ہیں۔

پی ایس ایل تھری میں سنسنی سے بھرپور دوسرا مرحلہ بھی مکمل ہوگیا۔ آج کھلاڑی کرکٹ کی جنگ کے بجائےآرام کریں گے، کل سے دبئی کے میدان میں میلہ سجے گا، پشاور زلمی اور ملتان سلطانز کی ٹیمیں ان ایکشن ہوں گی۔

پھر سے چوکے چھکوں کی برسات ہو گی۔ ابھی تک کے مقابلوں میں ملتان کی ٹیم 5 میں سے تین میچ جیت کر پہلی پوزیشن پر قبضہ جمائے ہوئے ہے۔ کراچی کا دوسرا اور پشاور کا تیسرا نمبر ہے۔ لاہور قلندرز کی ٹیم آخری پوزیشن پر موجود ہے۔

شارجہ(سپورٹس لنک رپورٹ)پاکستان سپر لیگ(پی ایس ایل) تھری کے 14 ویں میچ میں پشاور زلمی نے لاہور قلندرز کو 10 وکٹوں سے شکست دے کر ایونٹ میں اپنا تیسرا میچ جیت لیا۔

پشاور زلمی کی طرف سے 101 رنز کے ہدف کے تعاقب کے لئے تمیم اقبال اور کامران اکمل نے اننگز کا آغاز کیا اور مقررہ ہدف 14 ویں اوور ہی میں حاصل کرلیا۔

آج کے میچ کے دوران کامران اکمل نے پی ایس ایل تھری میں اپنی دوسری نصف سنچری اسکور کی، انہوں نے 2چھکوں اور 7 کو چوں کی مدد سے 57رنز کی ناقابل شکست اننگز کھیلی۔

دوسرے اینڈ پر موجود تمیم اقبال نے کامران اکمل کا بھرپور ساتھ دیا، انہوں نے ناقابل شکست رہتے ہوئے4 چوکوں کی مدد سے 37 رنز بنائے۔

آج کے میچ میں لاہور قلندرز کے کپتان برینڈن مکلم نے 6بائولرز آزمائے لیکن پشاورزلمی کے اوپنرز نے کسی کی نہ چلنے دی۔

لاہور قلندرز نے پہلے بیٹنگ کرتے ہوئے 17 اعشاریہ2 اوورز میں فخرزمان 30،عمر اکمل 15، برینڈن مکلم 15 رنز کی بدولت10 وکٹوں کے نقصان پر ایونٹ کا سب سے لو  اسکور 100 رنز بنائے۔

پشاور زلمی کی طرف سےپہلا میچ کھیل رہے حسن علی اور ڈاسن نے 3،3 وہاب ریاض نے 2 اور ثمین گل نے ایک وکٹ حاصل کی۔

ایونٹ کے پہلے ہی میچ میں عمدہ بائولنگ کا مظاہرہ کرنے والے لیم ڈاسن کو مین آف دی میچ کا ایوارڈ دیا گیا۔

آج پی ایس ایل میں کھیلے گئے دونوں میچ لو اسکورنگ رہے، پہلے میچ میں ملتان سلطانز نے کوئٹہ گلیڈی ایٹرز کو 102رنز پر ڈھیر کردیا اور ہدف 1 وکٹ کے نقصان پر 17ویں اوورمیں ہی حاصل کرلیا۔

کراچی کنگز اور ملتان سلطانز 7،7پوائنٹس کے ساتھ پوائنٹ ٹیبل پر پہلے اور دوسر ے نمبر پر براجمان ہیں جبکہ لاہور قلندرز سے کامیابی کے بعد پشاورز لمی کی ٹیم تیسرے نمبر پر آگئی ہے۔

لاہور قلندرز کی ٹیم جو اب تک ایونٹ میں شریک تمام ہی ٹیموں سے شکست کھاچکی ہے اب مزید ایک اور میچ میں ہار اس کے لئے ایونٹ میں آگے کوالیفائی کرنے کے دروازے بند کرنے کا سبب بن جائے گی۔

شارجہ(سپورٹس لنک رپورٹ)پاکستان سپر لیگ (پی ایس ایل ) تھری کے 14 ویں میچ میں لاہور قلندرز کی پوری ٹیم 17 اعشاریہ2 اوورز میں100 رنز پر ڈھیر ہوگئی اور پشاورزلمی کے لئے 101 رنز کا ہدف سیٹ کیا۔

پشاور زلمی کی طرف سے ایونٹ میں پہلا میچ کھیل رہے حسن علی اور لیم ڈاسن نے شاندار بولنگ کی، دونوں ہی کھلاڑیوں نے لاہور قلندرز کے 3،3 بیٹسمینوں کو پویلین کی راہ دکھائی۔

شارجہ کرکٹ اسٹیڈیم پر کھیلے جارہے میچ میں لاہور قلندرز کے کپتان برینڈن مکلم نے پشاور زلمی کے خلاف ٹاس جیت کر بیٹنگ کا فیصلہ کیا۔

فخر زمان اور برینڈن مکلم نے اننگز کا آغاز کیا،دونوں بیٹسمینوں نے 42 رنز کی شراکت قائم کی، اس دوران 2 چھکوں کی مدد سے 15 رنز بنانے والے برینڈن مکلم کا حسن علی نے اپنی ہی گیند پر کیچ پکڑا۔

لاہور قلندرز کی دوسری وکٹ 15 رنز کے اضافے سے گری،57 کے اسکور پر 2 چھکوں اور 4 چوکوں کی مدد سے30 رنز بنانے والے فخر زمان کو لیم ڈاسن نے حسن علی کی مدد سے قابو کرلیا۔

اگلی ہی گیند پر ڈاسن نے دنیشن رامدین کی اہم وکٹ بھی حاصل کرلی،یوں ایک ہی اوور میں 2 وکٹیں گرنے جانے سے لاہور قلندرز پر دبائو بڑھ گیا۔

پشاور زلمی کو چوتھی وکٹ 10 ویں اوور کی پہلی گیند پر ملی، 71 کے مجموعی اسکور پر 2 چوکوں لگا کر 12رنز بنانے والے آغا سلمان کو ثمین گل نے میدان سے واپسی کا راستہ دکھایا۔

لاہور قلندرز کی پانچویں وکٹ 2 رنز کے اضافے کے ساتھ 73  کے اسکور پر گر گئی، ڈاسن کا تیسرا شکار سہیل اختر بن گئے، جنہوں نے 1چھکے کی مدد سے 12رنز بنا رکھے تھے۔

پشاور زلمی کو چھٹی وکٹ 87 کے اسکور پر سنیل نارائن کی ملی، جو میچ میں صرف 3رنز ہی بناسکے، انہیں حسن علی نے اپنا دوسرا شکار بنایا۔

لاہور قلندرز کے عمر اکمل ایک بار پھر ناکام رہے،وہ 15 رنز بناکر رن آئوٹ ہوئے تو ٹیم کا اسکور 7وکٹ پر 98 رنز پر تھا۔

برینڈن مکلم الیون کی آٹھویں وکٹ 99 رنز پر گری جب سہیل خان کو وہاب ریاض نے شاندار بولڈ کیا، وہ اسکور میں صرف 4 رنز کا اضافہ کرسکے،اسی اوور میں ویاب ریاض نے یاسر شاہ کو صفر پرہی پویلین کا راستہ دکھایا۔

پشاور زلمی کی طرف سے وہاب ریاض نے 2 اور ثمین گل نے ایک کھلاڑی کو میدان بدر کیا ۔

شارجہ(سپورٹس لنک رپورٹ): پاکستان سپر لیگ کے تیسرے ایڈیشن میں ملتان سلطانز کے اسٹار لیگ اسپنر عمران طاہر نے کہا ہے کہ وہ پی ایس ایل کے لیے دیگر ساتھی کھلاڑیوں کو بھی پاکستان جانے کے لیے قائل کریں گے۔

پاکستان سپر لیگ کے تیسرے ایڈیشن کے 13 ویں میچ میں ملتان سلطانز نے عمران طاہر کی ہیٹ ٹرک کی بدولت کوئٹہ گلیڈی ایٹرز کو 102 رنز تک محدود کیا اور میچ بآسانی 9 وکٹوں سے اپنے نام کرلیا۔

ٹیم کی جیت میں اہم کردار ادا کرنے والے عمران طاہر کا جیونیوز سے گفتگو میں کہنا ہے کہ میری ہیٹ ٹرک اچھی ٹیم ورک کا نتیجہ ہے جب کہ ہماری جیت میں سب سے اہم وجہ یہ ہے کہ ہم سب ایک دوسرے کی عزت کررہے ہیں اور ایک دوسرے کے کردار کو سمجھتے ہیں۔

ایک سوال کے جواب میں انہوں نے کہا کہ ورلڈ الیون کی جانب سے بھی پاکستان کھیلنے آیا تھا اور اب پی ایس ایل کے آخری مرحلے کے میچز کیلئے بھی پاکستان جاؤں گا اور میں سب ساتھی کھلاڑیوں کو بھی پاکستان جانے کے لیے قائل کروں گا۔

شارجہ(سپورٹس لنک رپور)پاکستان کرکٹ بورڈ کے چیئرمین نجم سیٹھی نے پاکستان سپر لیگ کے تیسرے ایڈیشن کے فائنل میچ کے لیے کراچی والوں کو خوشخبری دی ہے۔

پاکستان سپر لیگ کا تیسرا ایڈیشن کامیابی سے متحدہ عرب امارات کے دبئی اور شارجہ اسٹیڈیمز  میں جاری ہے۔

پی ایس ایل میں کراچی کنگز پوائنٹس ٹیبل پر 7 پوائنٹس کے ساتھ سرفہرست ہے جب کہ ملتان سلطانز 5 پوائنٹس کے ساتھ دوسرے، کوئٹہ گلیڈی ایٹرز، پشاور زلمی اور اسلام آباد یونائٹیڈ 4،4 پوائنٹس کے ساتھ بالترتیب تیسری، چوتھی اور پانچویں پوزیشن پر ہیں۔

پی ایس ایل کے 2 پلے آف میچز لاہور کے قذافی اسٹیڈیم جب کہ فائنل کراچی کے نیشنل اسٹیڈیم میں کھیلا جائے گا۔

کراچی کے نیشنل اسٹیڈیم میں تزئین و آرائش کا کام تیزی سے جاری ہے اور پاکستان کرکٹ بورڈ کی کوشش ہے کہ فائنل سے قبل اسٹیڈیم کا مرمتی کام مکمل کیا جائے۔

پاکستان کرکٹ بورڈ کے چیئرمین نجم سیٹھی نے سماجی رابطے کی ویب سائٹ ٹوئٹر پر اسٹیڈیم کی مرمت کے حوالے سے آگاہ کیا ہے۔

اپنی ٹوئٹ میں نجم سیٹھی نے کہا کہ نیشنل اسٹیڈیم کی مرمت کے لئے پی سی بی دن رات کام کررہا ہے اور تعمیراتی کام کا جائزہ لینے خود کراچی جارہا ہوں۔

انہوں نے کراچی کے شہریوں کو خوشخبری دیتے ہوئے مزید کہا کہ پی ایس ایل تھری کے فائنل کے لئے کراچی والے تیار ہوجائیں۔

یاد رہے کہ پاکستان سپر لیگ تھری کا فائنل کراچی کے نیشنل اسٹیڈیم میں 25 مارچ کو کھیلا جائے گا۔