Tag: شائقین

شارجہ(سپورٹس لنک  رپورٹ): پاکستان کرکٹ ٹیم کے سابق کپتان اور پاکستان سپر لیگ میں کراچی کنگز کی نمائندگی کرنے والے آل راؤنڈر شاہد آفریدی نے متحدہ عرب امارات میں کرکٹ شائقین سے اپیل کی ہے کہ وہ اسٹیڈیم کا رخ کریں اور کرکٹ سے لطف اندوز ہوں۔

نجی ٹی وی چینل سے گفتگو کرتے ہوئے انہوں نے کہا کہ اس حوالے سے پہلے دو سیزنز اچھے رہے لیکن اس مرتبہ شائقین کی دلچسپی کچھ کم ہے۔

بوم بوم کے نام سے مشہور مایہ ناز آل راؤنڈر کا کہنا تھا کہ ٹورنامنٹ کی تھوڑی اور مارکیٹنگ ہونی چاہیے اور اسٹیڈیمز میں شائقین کو مدعو کرنے کی ضرورت ہے۔

انہوں نے شائقین سے بھی درخواست کی کہ وہ اسٹیڈیمز آئیں اور کرکٹ سے لطف اندوز ہوں۔

انہوں نے امید کا اظہار کیا کہ شارجہ کے میچز سے شائقین اسٹیڈیم کا رخ کریں گے اور فائنل تک آتے رہیں گے۔

پی ایس ایل کے معیار سے متعلق ایک سوال پر ان کا کہنا تھا کہ ٹورنامنٹ کے انعقاد کا ایک مقصد نئے ٹیلنٹ کو موقع دینا ہے کیوں کہ جن کھلاڑیوں کو موقع نہیں ملتا وہ فرنچائزز کے ساتھ منسلک ہوجاتے ہیں اور اپنا ٹیلنٹ دکھاتے ہیں لیکن ابھی تک اس مرتبہ جتنے میچز ہوئے ہیں کوئی خاص ٹیلنٹ سامنے نہیں آیا۔

شاہد آفریدی نے امید کا اظہار کیا کہ جو تین، چار نئے لڑکے ٹورنامنٹ میں کھیل رہے ہیں ان میں سے کوئی حسن علی، عماد وسیم، شاداب خان اور فخر زمان کی طرح ٹیم میں جگہ بنائے۔

آل راؤنڈر نے کہا کہ چاہتا ہوں ورلڈ کپ 2019 میں ہماری زبردست ٹیم میدان میں اترے۔

ایک سوال کے جواب میں انہوں نے کہا کہ قومی ٹیم میں آنے کا کوئی ارادہ نہیں، لیگ کرکٹ شائقین اور اپنے فاؤنڈیشن کی وجہ سے کھیل رہا ہوں۔

عماد وسیم کی کپتانی کے حوالے سے سوال پر ان کا کہنا تھا کہ ان کی سب سے اچھی بات یہ ہے کہ جہاں کوئی مسئلہ ہوتا ہے تو عماد دیگر کھلاڑیوں سے مشورہ لیتے ہیں اور سارے فیصلے خود کرنے کی کوشش نہیں کرتے۔

شاہد آفریدی کا کہنا تھا کہ ٹورنامنٹ میں ایک، دو جگہ عماد پر دباؤ آیا لیکن وہ بالکل پرسکون رہا جو کہ بہت اچھی بات ہے۔

شاہد آفریدی پی ایس ایل کے تیسرے ایڈیشن میں کراچی کنگز کی نمائندگی کررہے ہیں۔

کراچی کنگز اپنا اگلا میچ جمعے کو ملتان سلطانز کے خلاف کھیلیں گے۔

دبئی (سپورٹس لنک رپورٹ) پاکستان سپر لیگ پاکستانی شائقین کا آج کل محور و مرکز ہے، پاکستانی شائقین دبئی میں ہونے والے پاکستان سپر لیگ کے تیسرے ایڈیشن سے لطف اندوز ہو رہے ہیں، پاکستان کے سابق صدر و آرمی چیف جنرل (ر) پرویز مشرف ایک میچ دیکھنے کے لیے سٹیڈیم گئے وہ میچ دیکھنے میں مصروف تھے کہ اسی دوران پاکستانی کرکٹ شائقین کی ان پر نظر پڑ گئی، انہیں دیکھتے ہی شائقین کرکٹ نےکچھ ایسا کام کیا کہ کسی نے سوچا بھی نہ ہوگا، کرکٹ شائقین نے سابق صدر پرویز مشرف کو دیکھتے ہی نعرے لگانا شروع کر دیےاور ایک نعرہ جو سب سے زیادہ لگایا گیا وہ تھا جنرل صاحب زندہ باد، جنرل صاحب زندہ باد۔ جب تماشائیوں نے یہ نعرے لگائے تو سابق صدر پرویز مشرف نے مسکراتے ہوئے ان کی طرف ہلا کر نعروں کا جواب دیا، سابق صدر پرویز مشرف کی یہ ویڈیو سوشل میڈیا پر وائرل ہو گئی ہے۔

دبئی(سپورٹس لنک رپورٹ): پاکستان سپر لیگ کے تیسرے ایڈیشن کا رنگا رنگ میلہ آج دبئی انٹرنیشنل اسٹیڈیم میں سجے گا اور دفاعی چیمپئن پشاور زلمی اور ملتان سلطانز کی ٹیمیں افتتاحی میچ میں مدمقابل ہوں گی۔

شائقین کرکٹ کو پی ایس ایل تھری میں چھکے، چوکے اور وکٹیں گرتے دیکھنے کا بے تابی سے انتظار ہے جس کے لئے دبئی انٹرنیشنل کرکٹ اسٹیڈیم میں آج اکھاڑہ سجے گا۔

پی ایس ایل تھری میں 6 ٹیمیں مدمقابل ہوں گی اور پشاور زلمی اپنے اعزاز کا دفاع کرے گی، اس ایونٹ میں ملتان سلطانز پہلی مرتبہ حصہ لے رہی ہے اور اپنا افتتاحی میچ پشاور زلمی کے خلاف ہی کھیلے گی۔

ایونٹ میں شامل دیگر ٹیموں میں اسلام آباد یونائیٹیڈ، کراچی کنگز، کوئٹہ گلیڈی ایٹرز اور لاہور قلندرز شامل ہیں۔

ایونٹ کا آغاز پاکستانی وقت کے مطابق رات 8 بجے شروع ہونے والی افتتاحی تقریب سے ہوگا جس میں پاکستانی ثقافت کے رنگوں کو اجاگر کیا جائے گا جب کہ گلوکار علی ظفر، شہزاد رائے، عابدہ پروین اور جیسن ڈیرولو اپنی آواز کا جادو جگائیں گے۔

افتتاحی تقریب کے بعد پاکستانی وقت کے مطابق رات 10 بجے پہلا میچ پشاور زلمی اور ملتان سلطانز کے درمیان کھیلا جائے گا۔

کراچی کنگز اور کوئٹہ گلیڈی ایٹرز کی ٹیمیں 23 فروری کو اپنا پہلا میچ کھیلیں گی جب کہ لاہور قلندرز کا ٹاکرا اسی روز ملتان سلطانز سے ہوگا جب کہ اسلام آباد یونائیٹیڈ اپنا ایونٹ کا پہلا میچ 24 فروری کو پشاور زلمی کے خلاف کھیلے گی۔

 ایونٹ میں مجموعی طور پر 34 میچز کھیلے جائیں گے جس میں سے 31 میچز دبئی اور شارجہ جب کہ تین میچز کا انعقاد پاکستان میں ہوگا، تمام ٹیمیں ایک دوسرے سے دو، دو مرتبہ مدمقابل ہوں گی۔

ایونٹ کا فائنل 25 مارچ کو کراچی کے نیشنل اسٹیڈیم میں کھیلا جائے گا جب کہ 2 پلے آف میچز لاہور میں ہوں گے۔

اسلام آباد (سپورٹس لنک رپورٹ)بوم بوم شاہد آفریدی کی ایک مرتبہ پھر انٹرنیشنل کرکٹ میں واپسی، شائقین کو زبردست خوشخبری سنا دی۔ تفصیلات کے مطابق پاکستان کے سابق کپتان اور مایہ ناز آل رائونڈر شاہد آفریدی نے انٹرنیشنل کرکٹ میں واپسی کیلئے رضامندی ظاہر کر دی ہے۔ایک انٹرویو میں ان کا کہنا تھا کہ ان کی خواہش ہے کہ انہیں لارڈز کرکٹ گرائونڈ پر ہونے والے ویسٹ انڈیز اور ریسٹ آف دی ورلڈ ٹیموں کے مابین چیئریٹی میچ میںھیلنے کا موقع دیا جائے۔ ان کا کہنا تھا کہ اگر اس میچ میں انہیں کھیلنے کی آفر کی گئی تو وہ اسے قابل غور سمجھیں گے۔ واضح رہے کہ انٹرنیشنل کرکٹ کونسل نے اس میچ کو بین الاقوامی کرکٹ کا درجہ دینے کا فیصلہ کیا ہے اور اس  سے حاصل ہونے والی آمدن ویسٹ انڈیز میں طوفان سے متاثرہ کرکٹ گرائونڈز کی بحالی میں استعمال کی جائے گی۔ واضح رہے کہ 2016میں شاہد آفریدی ٹی ٹونٹی کرکٹ سے ریٹائرمنٹ کا اعلان کر چکے ہیں۔