ڈارون ٹیسٹ،اسٹیو اسمتھ نے امپائر کے آؤٹ دینے سے پہلے ہی ریویو لے لیا، دلچسپ ویڈیو وائرل
بنگلادیش کے خلاف ڈارون ٹیسٹ میں آسٹریلوی بیٹر اسٹیو اسمتھ کا ایک دلچسپ ریویو سوشل میڈیا پر توجہ کا مرکز بن گیا۔ اسمتھ نے امپائر کے آؤٹ قرار دینے سے بھی پہلے ریویو لینے کا اشارہ کردیا اور بعد میں ان کا اندازہ بالکل درست ثابت ہوا۔
بنگلادیش کے خلاف ٹیسٹ میچ میں اسٹیو اسمتھ اس وقت بال بال بچ گئے جب ایک آف سائیڈ گیند پر بنگلادیشی کھلاڑیوں نے کیچ کی اپیل کی اور کیپر کے گیند پکڑتے ہی وکٹ کا جشن منانا شروع کردیا۔
بنگلادیشی کھلاڑیوں کو یقین تھا کہ گیند اسمتھ کے بلے کا کنارہ چھوتے ہوئے وکٹ کیپر کے ہاتھوں میں گئی ہے، تاہم اس دوران اسمتھ نے ایک دلچسپ ردعمل دیا۔
امپائر کمار دھرماسینا کے انگلی اٹھانے سے پہلے ہی اسمتھ نے ریویو لینے کا اشارہ کردیا،
جیسے انہیں پہلے ہی اندازہ ہو گیا ہو کہ امپائر انہیں آؤٹ قرار دینے والے ہیں۔چند لمحوں بعد دھرماسینا نے اسمتھ کو آؤٹ قرار دے دیا، لیکن چونکہ اسمتھ پہلے ہی ریویو کا اشارہ دے چکے تھے، اس لیے معاملہ تھرڈ امپائر کے پاس چلا گیا۔
ریویو میں اسٹیو اسمتھ کا اندازہ درست ثابت ہوا۔ ٹیکنالوجی سے واضح ہوا کہ گیند اسمتھ کے بلے سے ٹکرانے کے بجائے زمین سے لگی تھی۔تھرڈ امپائر نے فیصلہ تبدیل کرتے ہوئے اسمتھ کو ناٹ آؤٹ قرار دے دیا،
جس کے ساتھ ہی بنگلادیشی ٹیم کا جشن مایوسی میں بدل گیا۔اس واقعے کی ویڈیو سوشل میڈیا پر تیزی سے وائرل ہوگئی، جہاں صارفین اسمتھ کے امپائر کے فیصلے سے پہلے ہی ریویو لینے کو دلچسپ قرار دے رہے ہیں۔
اسی میچ میں آسٹریلوی بیٹر ٹریوس ہیڈ کی ایک اور ویڈیو بھی سوشل میڈیا پر توجہ کا مرکز بنی، جس میں بولڈ ہونے کے بعد وہ خود وکٹ پر بیلز دوبارہ رکھتے دکھائی دیے۔
ڈارون ٹیسٹ میں اسٹیو اسمتھ کا بروقت ریویو جہاں آسٹریلیا کے لیے اہم ثابت ہوا، وہیں ان کا دلچسپ انداز اور ٹریوس ہیڈ کی ویڈیو نے میچ کے دوران سوشل میڈیا پر شائقین کی توجہ حاصل کرلی۔
