چیمپئنز ٹرافی کیلئے پاکستانی اسکواڈ ، صائم ایوب کی جگہ خوشدل شاہ شامل؟

چیمپئنز ٹرافی کیلئے قومی اسکواڈ ، صائم ایوب کی جگہ خوشدل شاہ شامل

آل راؤنڈر خوشدل شاہ بھی چیمپئنز ٹرافی کے لیے پاکستانی اسکواڈ میں شمولیت کی دوڑ میں شامل ہو گئے۔

ذرائع کا کہنا ہے کہ خوشدل شاہ چیمپئنز ٹرافی کے اسکواڈ میں شامل ہوں گے ، خوشدل شاہ کو صائم ایوب کی جگہ اسکواڈ میں جگہ ملے گی۔

ذرائع کا مزید کہنا ہے کہ شان مسعود کو اسکواڈ میں شامل کرنے کے امکانات کم ہیں، اسکواڈ کے نام چیئرمین پی سی بی کو بھجوا دیئے گئے ، چیئرمین پی سی بی کی اجازت کے بعد اسکواڈ کا اعلان ایک دو روز میں متوقع ہے۔

فخرزمان، محمد رضوان، بابر اعظم ، سلمان آغا، کامران غلام، ابرار احمد، سفیان مقیم ،شاہین آفریدی، حارث رؤف اور نسیم شاہ بھی اسکواڈ کا حصہ ہیں، طیب طاہر، محمد حسنین اورعباس آفریدی کو بھی شامل کئے جانے کے امکانات ہیں۔

،ذرائع کے مطابق خوشدل شاہ کی حالیہ آل راؤنڈر پرفارمنس کی وجہ سے ان کا نام زیرِ غور لایا گیا ہے ۔

خوشدل شاہ بنگلہ دیش پریمیئر لیگ میں بھرپور آل راؤنڈر پرفارمنس کا مظاہرہ کر رہے ہیں، انہوں نے 3 ناقابلِ شکست 73، 46 اور 27 رنز کی اننگز کھیلیں۔

خوشدل شاہ نے 59 اور 48 رنز بھی بنائے جبکہ 8 میچز میں 11 وکٹیں بھی لے چکے ہیں۔خوشدل شاہ 10 ون ڈے انٹر نیشنل میں 199 رنز بنا چکے ۔ انہوں نے آخری ون ڈے میچ اگست 2022ء میں نیدر لینڈز کے خلاف کھیلا تھا۔