اسلام آباد(سپورٹس ڈیسک)پاکستان ٹیبل ٹینس فیڈریشن نے آئندہ ماہ شیڈول کامن ویلتھ گیمز کیلئے 4 رکنی ٹیم کا اعلان کر دیا، 4 سے 15 اپریل تک گولڈ کوسٹ، آسٹریلیا میں شیڈول میگا ایونٹ میں دو مرد اور دو خواتین کھلاڑی ملک کی نمائندگی کریں گی۔ٹیم میں رمیض اور خواجہ فہد جبکہ خواتین کھلاڑیوں میں فاطمہ خان اور حریم انور شامل ہیں ۔
لاہور(سپورٹس لنک رپورٹ)پاکستان ہاکی فیڈیرشن(پی ایچ ایف) نے پاکستانی ہاکی ٹیم کو فتوحات کی راہ پر گامزن کرنے کیلئے اہم قدم اٹھاتے ہوئے ہالینڈ سے تعلق رکھنے والے ورلڈ کپ کے فاتح ٹرینر رولینٹ اولٹمینز کو قومی ٹیم کا نیا ہیڈ کوچ مقرر کردیا ہے۔
63 سالہ اولٹمینز سے پی ایچ ایف کا دو سالہ معاہدہ ہوا ہے اور وہ سات مارچ کو کراچی میں قومی اسکواڈ کو جوائن کر لیں گے۔
پی ایچ ایف سیکریٹری شہباز احمد نے تصدیق کرتے ہوئے کہ ہمارا اولٹمینز کے ساتھ معاہدہ ہو گیا ہے اور ہم نے بیش بہا تجربے کی بنیاد پر ان سے معاہدہ کیا ہے اور وہ ہاکی اکیڈمیز کے اسٹرکچر کے قیام میں بھی ہماری مدد کریں گے۔
ہالینڈ سے تعلق رکھنے والے کوچ وسیع تجربہ رکھتے ہیں اور وہ اپنی کے آبائی ملک کی کوچنگ کرنے کے ساتھ ساتھ بھارتی ٹیم کی کوچنگ بھی کر چکے ہیں۔
وہ اس ہاکی ٹیم کے بھی رکن تھے جس نے 1990 میں لاہور کے نیشنل ہاکی اسٹیڈیم میں کھیلے گئے مینز ہاکی ورلڈ کپ کے فائنل میں پاکستان کو 3-1 سے شکست دی تھی۔
اولٹمینز نے 2004 میں بھی پاکستان کا دورہ کیا تھا اور وہ گزشتہ آٹھ سال میں پاکستانی ٹیم کے پہلے غیر ملکی کوچ ہوں گے جہاں اس سے قبل 2010 میں آخری مرتبہ کسی غیر ملکی کوچ نے پاکستانی ٹیم کی کوچنگ کے نگرانی انجام دیے تھے اور اس وقت بھی ہالینڈ سے تعلق رکھنے والے کوچ کی زیر نگرانی پاکستان نے ایشین گیمز میں سونے کا تمغہ جیتا تھا۔
رواں سال ہاکی کے کھیل کیلئے کافی اہم ہے جہاں 2018 میں کامن ویلتھ گیمز، چیمپیئنز ٹرافی، ایشین گیمز، ایشین چیمپیئنز ٹرافی اور ورلڈ کپ جیسے اہم ایونٹس منعقد ہوں گے۔
لاہور(سپورٹس لنک رپورٹ)پاکستان ہاکی ٹیم کیلئے غیر ملکی کوچ کی خدمات حاصل کرنے کا حتمی فیصلہ کر لیا گیا جب کہ حتمی غیر ملکی کوچ کا فیصلہ پیر تک متوقع ہے.سیکریٹری پی ایچ ایف شہباز احمد سینئر نے کہا ہے کہ گرین شرٹس کا نیا چیف کوچ غیر ملکی ہی ہوگا۔تفصیلات کے مطابق انٹرنیشنل ایونٹس میں پاکستانی کوچز کی مسلسل ناکامی کے بعد پی ایچ ایف نے قومی ٹیم کے لیے مستقل بنیادوں پر غیر ملکی کوچ رکھنے کا حتمی فیصلہ کیا ہے.ذرائع کے مطابق فیڈریشن حکام کی اس وقت جرمنی کے کرسٹین بلنک، آسٹریلیا کے جمی ڈائر اور ہالینڈ کے راولنٹ اولٹمینز کے ساتھ بات چیت حتمی مرحلے میں داخل ہو چکی ہے، راولنٹ اولٹمینز پاکستانی ٹیم کے پہلے بھی کوچ رہ چکے ہیں اور انھوں نے حال ہی میں اومان میں ہونے والے 3 ملکی ٹورنامنٹ میں پی ایچ ایف حکام کے ساتھ ملاقاتیں کرنے کے ساتھ کچھ وقت پاکستانی ٹیم کے ساتھ بھی گزارا ہے.کرسٹین بلنک کا شمار بھی دنیا کے ممتاز کھلاڑیوں اور کوچز میں ہوتا ہے جبکہ جمی ڈائر بھی کوچز کے میدان میں صلاحیتوں کا لوہا منوا چکے ہیں، ذرائع کے مطابق ان 3 کوچز میں سے حتمی کوچ کا فیصلہ پیر تک ہوگا. یہ بات قابل ذکر ہے کہ رواں برس پاکستان ہاکی ٹیم کے لیے انتہائی اہمیت کا حامل اس لیے بھی ہے کیونکہ گرین شرٹس نے اس سال کامن ویلتھ گیمز سمیت 5 بڑے عالمی ٹورنامنٹس میں شرکت کرنا ہے، ان ایونٹس میں کامن ویلتھ گیمز، چیمپئنز ٹرافی، ایشین ٹرافی، ایشین گیمز اور ورلڈ کپ شامل ہیں۔
اسلام آباد(سپورٹس لنک رپورٹ) انٹرنیشنل کبڈی فیڈریشن نے سپر کبڈی لیگ پر دست شفقت رکھ دیا،عالمی باڈی نے رواں سال پاکستان میں ہونے والے ایونٹ کی حمایت کرتے ہوئے اپنا لوگو استعمال کرنے کی اجازت بھی دیدی۔تفصیلات کے مطابق رواں سال سپر کبڈی لیگ کروانے کی تیاریاں عروج پر ہیں، انٹرنیشنل کبڈی فیڈریشن کے صدر جناردن سنگھ گلہوٹ نے سیکریٹری جنرل پاکستان کبڈی فیڈریشن محمد سرور رانا کو خط میں ہر ممکن تعاون کی یقین دہانی کراتے ہوئے عالمی باڈی کا لوگو استعمال کرنے کی بھی اجازت دیدی ہے،انٹرنیشنل فیڈریشن کی تائیدوحمایت حاصل ہونے کے بعد ایس کے ایل میں انٹرنیشنل سٹارز کی کہکشاں سجنے کے امکانات میں اضافہ ہوگیا ہے۔ چیئرمین سپر کبڈی لیگ حیدر علی دائود خان کا کہنا ہے کہ عالمی باڈی کی طرف سے سپورٹ کا اعلان ایک اہم سنگ میل ہے، فیڈریشن خود رکن ملکوں کو لیگ کے حوالے سے خطوط لکھے گی تو منتظمین کیلئے غیر ملکی کھلاڑیوں کی بڑی تعداد کو پاکستان میں مقابلوں کا حصہ بننے کیلئے قائل کرنا آسان ہوجائے گا،انٹرنیشنل سٹارز سے مزین اس ایونٹ سے نہ صرف ملک میں کبڈی کو فروغ حاصل ہوگا بلکہ پاکستان کا مثبت تاثر دنیا بھر میں اجاگر کرنے میں بھی مدد ملے گی۔انہوں نے کہا کہ سپرلیگ میں بہترین انتظامات کیساتھ کھلاڑیوں کی نیلامی کا عمل شفاف بناکر انٹرنیشنل فیڈریشن اور سٹارز کا اعتماد حاصل کرینگے۔
لاہور(سپورٹس لنک رپورٹ) سپورٹس بورڈ پنجاب کے تعاون سے پنجاب سٹیڈیم میں کک باکسنگ ایرینا کا افتتاح کردیا گیا ہے، جمعرات کے روز ڈائریکٹر سپورٹس محمد انیس شیخ نے افتتاح کیا، تقریب میں صدر پاکستان کک باکسنگ فیڈریشن سید شہریار علی، سینئر نائب صدر سید عابد علی، سیکرٹری جنرل طاہر عباس اور کک باکسنگ کے شائقین نے شرکت کی، افتتاحی تقریب سے خطاب کرتے ہوئے انیس شیخ نے کہا کہ سپورٹس بورڈ پنجاب صوبہ بھر میں ہر طرح کے کھیل کو فروغ دینے کیلئے کوشاں ہے، شہر شہر گرائونڈز، سٹیڈیمز اور جمنیزیمز بنائے جارہے ہیں تاکہ نوجوانوں کو سپورٹس کی جدید سہولتیں میسر آسکیں۔اس موقع پر فیاض، نعمت اللہ، تنویراحمد اور زیب حسن، بلال رفیع اور توقیر ہمایوں، عمرفاروق اور محمد اعجاز، محمد رمضان اور علی رضا، عاطف اور محمد وقاص کے درمیان نمائشی مقابلے بھی ہوئے۔
اسلام آباد ( نوازگوھر ) پاکستان نیٹ بال فیڈریشن نے کھیلوں کے مقابلوں کا روواں سال کے لئے سپورٹس کیلنڈر جاری کر دیا ہے،گذشتہ روز پاکستان نیٹ بال فیڈریشن کے صدر مدثر آرائیں نے بتایا کہ پاکستان نو انٹرنیشنل مقابلوں میں حصہ لے گا جبکہ ملک میں 18 ایونٹس ملک کے مختلف شہروں میں منعقد کئے جائیں گے، پاکستان جن انٹرنیشنل ایونٹس میں حصہ لے گا ، ان میں27 سے 29 مارچ تک انٹرنیشنل یوتھ انڈر16- گرلز نیٹ بال سیریز سنگاپور کے خلاف سنگار پور میں کھیلی جائے گی،یکم سے 6 اپریل تک امنا مینز نیٹ بال چیمپئن شپ سڈنی آسٹریلیا میں ، 4 سے 15 اپریل تک کامن ویلتھ گیمز گولڈ کوسٹ آسٹریلیا میں، 23 سے 26 جون تک انٹرنیشنل جونیئر انڈر 19- گرلز نیٹ بال چیمپئن شپ ساؤتھ کوریاکھیلی جائے گی، یکم سے 6 جولائی تک ایشین نیٹ بال امپائرنگ کورس سنگاپور میں منعقد ہوگا، 3 سے 6 جولائی تک واورلیلے انٹرنیشنل سکول گرلز نیٹ بال چیمپئن شپ آسٹریلیا میں، یکم سے 8 ستمبر تک ایشین خواتین نیٹ بال چیمپئن شپ سنگاپور میں ہوگی، 6 ستمبر کو ایشین نیٹ بال فیڈریشن کا اجلاس سنگاپور میں منعقد ہوگااور 26 سے 29 دسمبر تک مردوں کی انٹرنیشنل نیٹ بال چیمپئن شپ اسلام آباد میں منعقد ہوگی جبکہ پاکستان نیٹ بال فیڈریشن اس سال ملک میں 18 نیٹ بال کے قومی ایونٹس مختلف شہروں میں منعقد کروائے گی، جن میں 16 فروری سے 25 مارچ تک قومی یوتھ گرلز انڈر16- تربیتی کیمپ کراچی میں لگا یا جائے گا،23 مارچ کو کراچی، حیدرآباد، لاہور، اسلام آباد، پشاور اور کوئٹہ میں پاکستان ڈے کے موقع پر نیٹ بال کے نمائشی مقابلوں منعقد ہونگے،21 سے 24 اپریل تک مردوں اور خواتین کی قومی نیٹ بال چیمپئن شپ اسلام آباد میں کھیلی جائے گی، 22 اپریل کوپاکستان نیٹ بال فیڈریشن کی جنرل کونسل اور مجلس عاملہ کا اجلاس ہوگا،مردوں اور خواتین کی دو روزہ بین الصوبائی نیٹ بال چیمپئن شپ 25 اپریل سے کھیلی جائے گی، 11 سے 13مئی تک قومی کوچنگ اور امپائرنگ کورس کراچی میں منعقد ہوگا،یکم سے 30 جون تک قومی جونیئر گرلز ٹیم کے کھلاڑیوں کا تربیتی کیمپ کراچی میں لگایا جائے گا، دو روزہ مردوں کو قومی بیچ نیٹ بال چیمپئن شپ 14 جولائی سے کراچی میں شروع ہوگی جبکہ خواتین کی قومی بیچ نیٹ بال چیمپئن شپ 16 سے 17 جولائی کو کراچی میں منعقد ہوگی،14 اگست کو کراچی ، حیدرآباد، لاہور، اسلام آباد، فاٹااور کوئٹہ میں جشن آزادی کے سلسلہ میں نیٹ بال کے مقابلے ہونگے، 25 سے 28 ستمبر تک قومی جونیئر گرلز نیٹ بال چیمپئن شپ کا انعقاد فیصل آباد میں کیا جائے گا،7 سے 10 اکتوبر تک کراچی نیٹ بال کپ اور 12 سے 14 اکتوبر تک پی این ایف یوتھ گرلز نیٹ بال کپ کے مقابلے کراچی میں ہونگے، 2 سے 4 نومبر تک مردوں کی انٹر ڈیپارٹمنٹل نیٹ بال چیمپئن شپ پشاور میں، 9 سے 11 نومبرتک قومی نیٹ بال امپائرنگ کورس لاہور میں اور 12 سے 15 نومبر تک قومی جونیئر بوائز نیٹ بال چیمپئن شپ لاہور میں کھیلی جائے گی، 16 نومبر سے 25 دسمبر تک مردوں کی قومی ٹیم کا تربیتی کیمپ اسلام آباد میں لگایا جائے گا جبکہ 25 دسمبر کو قائداعظم ڈے کے موقع پر لاہور، کراچی اوراسلام آباد میں نیٹ بال کے نمائشی مقابلے منعقد ہونگے
اسلام آباد (سپورٹس لنک رپورٹ ) قومی ٹینس سٹار عقیل خان نے پاکستان ٹینس فیڈریشن (پی ٹی ایف) سے کہا ہے کہ نوجوان کھلاڑی جو گراس کورٹس پر کھیل سکتے ہوں ان کیلئے ٹیلنٹ ہنٹ پروگرام کا آغاز کریں تاکہ مستقبل میں ہونے والے ڈیوس کپ مقابلوں کیلئے انہیں تیار کیا جا سکے۔ پاکستان نے حال ہی میں منعقدہ ڈیوس کپ ٹائی ایشیا اوشنیا زون گروپ ون پہلے مرحلے میں جنوبی کوریا کو 4-0 سے شکست دے کر اگلے مرحلے کیلئے کوالیفائی کیا تھا، عقیل خان اور اعصام الحق قریشی نے غیرمعمولی کارکردگی کا مظاہرہ کر کے ٹیم کی جیت میں اہم کردار ادا کیا تھا۔اپنے ایک انٹرویو میں انہوں نے کہا کہ میں اور اعصام کیریئر کے اختتام کی طرف جا رہے ہیں، بلاشبہ فوری طور پر بیک اپ تیار کرنا مشکل ہے لیکن ناممکن نہیں، ملک میں ٹینس کا بے پناہ ٹیلنٹ موجود ہے، اگر ان پر محنت کی جائے تو مجھے پوری امید ہے کہ وہ مستقبل میں ہماری جگہ لے لیں گے۔ انہوں نے کہا کہ مجھے اپنے نوجوان کھلاڑیوں پر پورا یقین ہے کہ وہ بین الاقوامی سطح پر ملک و قوم کا نام روشن کر سکتے ہیں، پاکستان ٹینس فیڈریشن کو چاہیے کہ ٹیلنٹ ہنٹ پروگرام کے ذریعے انہیں تیار کریں۔ انہوں نے کہا کہ اپریل میں ازبکستان کے خلاف شیڈول ٹائی میں ٹیم کو فتح دلانے کیلئے صلاحیتوں سے بڑھ کر کارکردگی کا مظاہرہ کریں گے۔
اسلام آباد(نواز گوہر سے)پاکستان سپورٹس رائٹرز فیڈریشن نے واضح کیا ہے کہ کسی بھی صوبائی ایسوسی ایشن یا یونٹ کی پہلے سے قائم یا قومی فیڈریشن سے ملحق ایسوسی ایشن کے متوازی تنظیم بنانے کا اقدام برداشت نہیں کیا جائے گا۔کسی بھی ایسے اقدام میں ملوث قرار پانے والوں پر تاحیات پابندی بھی عائد کی جا سکتی ہے۔یہاں جاری ایک بیان میں قومی فیڈریشن کے صدر امجد عزیز ملک نے پاکستان سپورٹس رائٹرز فیڈریشن کے نمائندے کی موجودگی میں راول پنڈی اسلام آباد سپورٹس جرنلسٹس ایسوسی ایشن (رسجا) کے ہونے والے انتخابات کے نتیجے میں بننے والی ایسوسی ایشن کو فیڈریشن کی نمائندہ تنظیم قرار دیتے ہوئے کہا ہے کہ اسلام آباد میں تمام گروپوں نے اپنے اختلافات بالائے طا ق رکھ کر جس منظم انداز میں انتخابات کروائے وہ لائق ستائش ہیں اور باہمی اتفاق سے بننے والی (رسجا) کی نئی ایسوسی ایشن جڑواں شہروں سمیت ملک بھر میں سپورٹس جرنلسٹس کی تر قی و فروغ میں اہم کردار ادا کرے گی۔پاکستان سپورٹس رائٹرز فیڈریشن کے صدر نے یقین طاہر کیا ہے کہ منتخب عہدے دار سینئر اور سابق عہدے داروں کی مشاورت سے خدمات کی انجام دہی ممکن بنائیں گے