قطر نے 2036 اولمپک کھیلوں کی میزبانی کےلیے تاریخی بولی جمع کرا دی
خلیجی ریاست قطر نے بین الاقوامی اولمپک کمیٹی کے سامنے 2036 کے اولمپک اور پیرا اولمپک کھیلوں کی میزبانی کے لیے باضابطہ درخواست جمع کرا دی ہے۔ اگر یہ بولی کامیاب ہوتی ہے تو قطر مشرق وسطیٰ اور شمالی افریقہ میں اولمپک کھیلوں کی میزبانی کرنے والا پہلا ملک بن جائے گا۔
قطر کے وزیراعظم شیخ محمد بن عبدالرحمٰن آل ثانی نے اس موقع پر ایک بیان میں کہا کہ ’’یہ بولی ہمارے ملک کے ترقیاتی سفر میں ایک نئے باب کا آغاز ثابت ہوگی۔
ہم نے فیفا ورلڈ کپ 2022 کی کامیاب میزبانی سے ثابت کر دیا ہے کہ ہم بڑے بین الاقوامی کھیلوں کے ایونٹس کو منعقد کرنے کی صلاحیت رکھتے ہیں۔‘‘
قطر اولمپک کمیٹی کے صدر شیخ جوعان بن حمد آل ثانی نے بتایا کہ ملک نے پہلے ہی کھیلوں کے لیے درکار 95 فیصد انفرااسٹرکچر مکمل کرلیا ہے۔ ان کا کہنا تھا کہ ’’ہمارے پاس ایک جامع منصوبہ موجود ہے جس کے تحت باقی سہولیات بھی وقت پر مکمل کر لی جائیں گی۔‘‘
یہ بولی قطر کی معیشت کو متنوع بنانے کی حکمت عملی کا حصہ ہے، جس کے تحت ملک بڑے کھیلوں کے ایونٹس کی میزبانی کو اپنی قومی پہچان بنانے پر کام کر رہا ہے۔
قطر اس سے قبل 2022 فیفا ورلڈ کپ کی کامیاب میزبانی کر چکا ہے، اگرچہ اس ایونٹ سے قبل مزدوروں کے حقوق کے حوالے سے تنقید کا سامنا بھی کرنا پڑا تھا۔
بین الاقوامی اولمپک کمیٹی کے نئے قواعد کے مطابق، 2036 کے کھیلوں کا انعقاد ممکنہ طور پر ایشیا یا افریقہ میں ہوسکتا ہے، کیونکہ 2024، 2028 اور 2032 کے کھیل بالترتیب یورپ، شمالی امریکا اور اوشیانا میں منعقد ہو رہے ہیں۔
اولمپک کمیٹی کی پہلی خاتون صدر کرسٹی کوونٹری کے لیے یہ میزبان ملک کا انتخاب ایک اہم فیصلہ ہوگا۔
قطری حکام کا کہنا ہے کہ اگر انہیں یہ موقع ملا تو وہ ایک یادگار اور منفرد اولمپک ایونٹ کا انعقاد کریں گے، جو خطے کی ثقافت اور ترقی کو عالمی سطح پر پیش کرے گا۔
