سیریز کا فاتحانہ آغاز:پاکستان نے ویسٹ انڈیز کو پہلے ون ڈے میں زیر کردیا
ٹرینیڈاڈ کے میدان میں کھیلے گئے 3 میچوں کی ون ڈے سیریز کے ابتدائی معرکے میں پاکستان نے شاندار کارکردگی دکھاتے ہوئے میزبان ویسٹ انڈیز کو 5 وکٹوں سے شکست دے دی اور سیریز میں 0-1 کی برتری حاصل کرلی۔
اس میچ میں پاکستانی بولرز اور بیٹرز، دونوں نے ذمے دارانہ کھیل پیش کیا، جبکہ نوجوان ڈیبیو بیٹر حسن نواز کی دھواں دار اننگز نے ٹیم کی جیت میں اہم کردار ادا کیا۔
ٹاس جیت کر پہلے بیٹنگ کے بجائے فیلڈنگ کا انتخاب کرنے والے پاکستانی کپتان کا فیصلہ درست ثابت ہوا۔ ویسٹ انڈیز نے بیٹنگ کا آغاز محتاط انداز میں کیا مگر صرف 4 رنز پر پہلی وکٹ گر گئی۔
اس کے بعد ایون لوئس اور کارٹے نے کچھ مزاحمت کی، تاہم پاکستانی بولرز کی نپی تلی گیندوں نے ایک کے بعد ایک بیٹر کو پویلین کی راہ دکھا دی۔ لوئس نے سب سے زیادہ 60 رنز بنائے جبکہ کپتان شائے ہوپ اور روسٹن چیز نے بالترتیب 55 اور 53 رنز کی اننگز کھیلی۔
میزبان ٹیم کی کوششوں کے باوجود پوری ٹیم 49ویں اوور میں 280 رنز پر ڈھیر ہوگئی۔ پاکستان کی جانب سے شاہین شاہ آفریدی نے تباہ کن بولنگ کا مظاہرہ کرتے ہوئے 4 شکار کیے، نسیم شاہ نے 3 وکٹیں حاصل کیں جبکہ باقی تین بولرز نے ایک ایک بیٹر کو آؤٹ کیا۔
281 رنز کے ہدف کے تعاقب میں گرین شرٹس کا آغاز مثالی نہ تھا اور پہلی وکٹ جلد ہی گر گئی۔ عبداللہ شفیق اور بابر اعظم نے اننگز کو سنبھالنے کی کوشش کی مگر دونوں درمیانی اسکور پر پویلین واپس لوٹ گئے۔ محمد رضوان نے ایک شاندار نصف سنچری اسکور کی، لیکن وہ بھی زیادہ دیر کریز پر نہ ٹک سکے۔
اس موقع پر 5 وکٹوں کے نقصان کے بعد میدان میں آئے نوجوان حسن نواز اور تجربہ کار حسین طلعت نے حالات کو سنبھالا۔ حسن نواز، جو اپنے ون ڈے کیریئر کا پہلا میچ کھیل رہے تھے،
نے نہ صرف دباؤ برداشت کیا بلکہ جارحانہ اور پراعتماد بیٹنگ سے 63 رنز بنا کر سب کو متاثر کیا۔ حسین طلعت نے ان کا بھرپور ساتھ دیتے ہوئے 41 رنز کی ناقابل شکست اننگز کھیلی۔ دونوں کھلاڑیوں کی شراکت نے 49ویں اوور میں ہدف مکمل کرکے ٹیم کو فتح دلائی۔
اس کامیابی کے ساتھ ہی پاکستان نے 3 میچوں کی سیریز میں برتری حاصل کرلی ہے اور اب میزبان ٹیم پر دباؤ بڑھ چکا ہے کہ وہ اگلے میچ میں کم بیک کرے۔ پاکستانی ٹیم کی بیٹنگ لائن میں نوجوانوں کا اعتماد اور بولنگ میں تجربہ کار کھلاڑیوں کی کارکردگی اس جیت کا اہم پہلو رہی۔
پاکستانی سکواڈ میں عبد اللہ شفیق، صائم ایوب، بابراعظم، محمد رضوان(کپتان،وکٹ کیپر) ، سلمان آغا، حسن نواز، حسین طلعت، فہیم اشرف، شاہین آفریدی، نسیم شاہ، صفیان مقیم شامل ہیں۔
ویسٹ انڈیز کے ون ڈے سکواڈ میں برینڈن کنگ، ایون لیوس، کیسی کارٹی، شائی ہوپ(کپتان ،وکٹ کیپر) شیرفانے ردرفورڈ، روسٹن چیس،رومریوشیفرڈ، گڈکیش موتی، شمر جوزف، جیڈن سیلزاوربلیڈز شامل ہیں۔
