کشمیر ڈے آل کراچی ایم ایم اے چیمپئن شپ کا کامیاب انعقاد
یومِ یکجہتیٔ کشمیر کے موقع پر آل کراچی مکسڈ مارشل آرٹس (MMA) چیمپئن شپ کا کامیاب انعقاد سندھ اسپورٹس کلب، ناظم آباد میں کیا گیا۔
اس ایونٹ کا انعقاد کراچی مکسڈ مارشل آرٹس ایسوسی ایشن اور اسپورٹس اینڈ یوتھ افیئرز ڈیپارٹمنٹ، حکومتِ سندھ کے اشتراک سے کیا گیا، جبکہ سندھ مکسڈ مارشل آرٹس ایسوسی ایشن نے اس میں بھرپور تعاون فراہم کیا۔
چیمپئن شپ میں کراچی کے تمام اضلاع سے تعلق رکھنے والے مرد و خواتین کھلاڑیوں نے جوش و جذبے کے ساتھ شرکت کی۔ بڑی تعداد میں ایتھلیٹس نے مقابلوں میں حصہ لیا،
جبکہ مختلف ویٹ کیٹیگریز میں ہونے والے مقابلے نہایت سخت، سنسنی خیز اور اعلیٰ معیار کے رہے، جن میں کھلاڑیوں کی مہارت، نظم و ضبط اور مسابقتی جذبہ نمایاں رہا۔
ایونٹ کے مہمانِ خصوصی جناب منور علی مہاسر (سیکرٹری، اسپورٹس اینڈ یوتھ افیئرز ڈیپارٹمنٹ، حکومتِ سندھ) تھے۔
مہمانانِ اعزاز میں جناب احمد علی راجپوت (سیکرٹری، سندھ اولمپک ایسوسی ایشن)، جناب طارق علی (صدر، سندھ جوجِٹسُو ایسوسی ایشن)، سید ریحان ہاشمی چیرمین حلالحمر اور ذوالفقار علی (صدر، سندھ مکسڈ مارشل آرٹس ایسوسی ایشن) شامل تھے۔
اس موقع پر ڈائریکٹر اسپورٹس سندھ جناب اسد اسحاق، ڈپٹی ڈائریکٹر یوتھ سندھ جناب سید حبیب اللہ اور ڈی ایس او حاجن نواب بھی موجود تھے، جنہوں نے کھلاڑیوں کی حوصلہ افزائی کی اور ان کی کارکردگی کو سراہا۔
معزز مہمانوں نے چیمپئن شپ کے کامیاب انعقاد اور مقابلوں کے اعلیٰ معیار کی تعریف کرتے ہوئے اس عزم کا اعادہ کیا کہ حکومتِ سندھ اور اسپورٹس ادارے صوبے میں مکسڈ مارشل آرٹس کے فروغ اور ترقی کے لیے اپنی مکمل حمایت جاری رکھیں گے۔
