شکیب الحسن نے ٹی ٹوئنٹی کرکٹ میں نیا ریکارڈ قائم کردیا
ڈھاکا: بنگلہ دیش کے مایہ ناز آل راؤنڈر اور سابق کپتان شکیب الحسن نے ٹی ٹوئنٹی کرکٹ میں ایک اور سنگ میل عبور کرتے ہوئے اپنی صلاحیتوں کا لوہا منوا لیا۔
تفصیلات کے مطابق بنگلہ دیش کے مایہ ناز آل راؤنڈر شکیب الحسن 500 وکٹیں حاصل کرنے والے دنیا کے پانچویں بولر بن گئے۔ یہ اعزاز انہوں نے کیریبین پریمیئر لیگ (سی پی ایل) میں انٹیگا اینڈ باربوڈا فالکنز کی نمائندگی کرتے ہوئے سینٹ کٹس اینڈ نیوس پیٹریاٹس کے خلاف میچ میں محمد رضوان کو آؤٹ کرکے حاصل کیا۔
میچ میں مزید دو وکٹیں حاصل کرنے کے بعد ان کے ٹی ٹوئنٹی کیریئر میں وکٹوں کی مجموعی تعداد 502 تک جا پہنچی۔
اس کے ساتھ ہی شکیب الحسن وہ پہلے کرکٹر بن گئے ہیں جنہوں نے مختصر فارمیٹ میں 7 ہزار سے زائد رنز بنانے کے ساتھ ساتھ 500 وکٹیں بھی حاصل کیں۔
اعداد و شمار کے مطابق اس وقت سب سے زیادہ 660 وکٹیں افغانستان کے راشد خان کے نام ہیں، جب کہ ویسٹ انڈیز کے ڈوین براوو 631، سنیل نارائن 590 اور جنوبی افریقہ کے عمران طاہر 554 وکٹوں کے ساتھ نمایاں ہیں۔
