Tag: سپورٹس

دبئی (سپورٹس لنک رپورٹ)پاکستان سپر لیگ کی ٹیم پشاور زلمی اور کراچی کنگز کے بین الاقوامی کھلاڑیوں نے پلے آف مرحلے اور فائنل میچ میں شرکت کے لیے پاکستان آنے پر رضامندی کا اظہار کردیا۔خیال رہے کہ پی ایس ایل کے پلے آف مرحلے میں ایلیمنیٹر 1 اور ایلیمنیٹر 2 بالتریتیب 20 اور 21 مارچ کو لاہور کے قذافی کرکٹ اسٹیڈیم ٗ 25 مارچ کو فائنل میچ کراچی کے نیشنل اسٹیڈیم میں کھلا جائے گا۔پی ایس ایل کے کوالیفائر میچ دبئی میں ہی کھیلا جائے گا جس میں کراچی کنگز اور اسلام آباد یونائیٹڈ مدِ مقابل ہوں گیاور جیتنے والی ٹیم کراچی میں فائنل کے لیے کوالیفائی کر جائے گی ٗ ہارنے والی ٹیم لاہور میں پشاور زلمی اور کوئٹہ گلیڈی ایٹرز کے درمیان ہونے والے ایلیمنیٹر 1 کی فاتح ٹیم سے ایلیمنیٹر 2 میں مقابلہ کرے گی۔ایلیمنیٹر 2 کی فاتح ٹیم کراچی کے نیشنل اسٹیڈیم میں ہونے والے فائنل میں جگہ بنائے گی۔کراچی کنگز کے جن کھلاڑیوں نے پاکستان آنے کیلئے رضامندی کا اظہار کیا ہے ان میں انگلینڈ کے جو ڈنلے، ٹائمل ملز، روی بھوپارا ویسٹ انڈیز کے لینڈل سمنز اور جنوبی افریقہ کے کولنگ انگرام اور ڈیوڈ وائزے شامل ہیں جبکہ ایون مورگن نے پاکستان آنے سے انکار کردیا۔ادھر پشاور زلمی کے تمام بین الاقوامی کھلاڑیوں نے پاکستان آنے کی حامی بھرلی جیسا کہ گزشتہ برس بھی تمام کھلاڑی پاکستان آئے تھے۔دوسری جانب اسلام آباد یونائٹڈ کے جین پال ڈومینی، لوک رونکی اور سمیٹ پٹیل نے پاکستان آنے کے لیے آمادہ ہو گئے۔دریں اثناء کوئٹہ گلیڈی ایٹرز کے کھلاڑی کیون پیٹرسن نے کہا ہے کہ خواہش تھی پاکستان جاؤں لیکن فیملی نے جانے سے روک دیا۔کوئٹہ گلیڈی ایٹرز کے کیون پیٹرسن نے پاکستان سپر لیگ کے پاکستان میں کھیلے جانے والے میچز میں شرکت سے انکار کردیا تھا جبکہ وہ گزشتہ سیزن میں بھی پاکستان نہیں آئے تھے۔کوئٹہ گلیڈی ایٹرز کے ٹوئٹر اکاؤنٹ پر اپنے ویڈیو پیغام میں کیون پیٹرسن نے کہا کہ افسوس کیساتھ کہنا پڑرہا ہے کہ میں واپس لندن جارہا ہوں، خواہش تھی کہ پاکستان جاؤں لیکن فیملی کافیصلہ ہے کہ مجھے نہیں جاناچاہیے، امید ہے مداح میرے اور فیملی کے فیصلے کا احترام کریں گے۔پیٹرسن نے کوئٹہ گلیڈی ایٹرز کے لیے نیک خواہشات کا اظہار کیا اور اپنی ٹیم کی جیت کی امید بھی ظاہر کی۔

لاہور(سپورٹس لنک رپورٹ)صوبائی وزیر کھیل جہانگیر خانزادہ نے کہا ہے کہ سپورٹس کیلئے عالمی معیار کی سہولتیں فراہم کرنا پنجاب حکومت کی اولین ترجیح ہے، نئے سپورٹس منصوبوں میں جدید سہولتیں فراہم کرنے کیلئے اقدامات کررہے ہیں، سیکرٹری سپورٹس پنجاب محمد عامر جان نے لاہور میں زیرتعمیر سپورٹس گرائونڈز جلدازجلد مکمل کرنے کی ہدایت کرتے ہوئے کہا کہ تمام منصوبے تکمیل کے آخری مراحل میں ہیں جن کی تکمیل سے نوجوانوں کو مزید سہولتیں میسر ہوں گی، یہ بات انہوں نے نیشنل ہاکی سٹیڈیم میں مختلف اجلاسوں سے خطاب کرتے ہوئے کہیں،اجلاس میں ڈپٹی سیکرٹری پلاننگ تہمینہ حبیب، ڈائریکٹر ایڈمن و سپورٹس جاوید رشید چوہان، پراجیکٹ ڈائریکٹر پی ایم یو اکرم صوبن اور دیگر افسران نے شرکت کی، صوبائی وزیر کھیل جہانگیر خانزادہ نے نوتعمیر شدہ سپورٹس منصوبوں کو عوام کیلئے کھولنے اور ان کو چلانے کیلئے میکنزم کے حوالے سے اجلاس کی صدارت کرتے ہوئے کہا کہ سپورٹس کی ترقی پنجاب حکومت کی اولین ترجیح ہے، وزیراعلیٰ پنجاب محمد شہباز شریف کے ویژن کے مطابق صوبہ بھر میں سپورٹس کے درجنوں منصوبے بنائے گئے ہیں، نوتعمیر شدہ سپورٹس منصوبوں میں نوجوانوں کو بہترین سہولتیں فراہم کی جائیں گی تاکہ وہ خود کو عالمی معیار کے مطابق تیار کرسکیں۔ان منصوبوں کو چلانے کیلئے بہترین انتظامات کئے جائیں گے۔سیکرٹری سپورٹس پنجاب محمد عامر جان نے لاہور کے زیرتعمیر سپورٹس گرائونڈز کے جائزہ اجلاس کی صدارت کرتے ہوئے کہا کہ نوجوانوں کو سپورٹس کی اعلیٰ سہولتیں فراہم کرنے کیلئے پُرعزم ہیں، انہوں نے سختی سے ہدایت کی کہ لاہور کے زیرتعمیر سپورٹس گرائونڈ جلد از جلد مکمل کئے جائیں تاکہ کھلاڑی اس سے استعفادہ حاصل کرسکیں اس معاملے میں تاخیر برداشت نہیں کی جائے گی، انہوں نے کہا کہ گرائونڈز کی تکمیل میں معیار کو خصوصی طور پر مدنظر رکھا جائے اور پلان کے مطابق بہترین سہولتیں فراہم کی جائیں، ایک اور اجلاس میں سیکرٹری سپورٹس بورڈ پنجاب محمد عامر جان نے پراجیکٹ مینجمنٹ یونٹ کی کارکردگی پر اظہار اطمینان کرتے ہوئے کہا کہ صوبہ بھر میں سپورٹس کے منصوبوں کی تکمیل سے سپورٹس فروغ پائے گا اور نوجوان اپنے کھیل کو بہتر بناکر ملک کا نام روشن کریں گے، انہوں نے ہدایت کی منصوبوں کی بروقت تکمیل کیلئے اقدامات کئے جائیں۔

دبئی(سپورٹس لنک رپورٹ)پاکستان سپر لیگ کے 19ویں میچ میں کراچی کنگز نے کوئٹہ گلیڈی ایٹرز کے خلاف ٹاس جیت کر پہلے فیلڈنگ کا فیصلہ کیا ہے۔کراچی کی ٹیم میں اسٹار آل راؤنڈر شاہد آفریدی اور وائس کی واپسی ہوئی ہے جبکہ کوئٹہ کی ٹیم میں کوئی تبدیلی نہیں کی گئی۔میچ پاکستانی وقت کے مطابق رات 9 بجے شروع ہوگا۔کراچی کنگز اب تک ایونٹ میں 5 میچز کھیل چکی ہے جس میں اسے صرف ایک میں ناکامی کا سامنا رہا جب کہ ایک میچ بارش کی وجہ سے متاثر ہوا اور تین میں اسے کامیابی ملی۔کوئٹہ گلیڈی ایٹرز کی کارکردگی ایونٹ میں اب تک مناسب رہی، 6 میچز میں سے اسے تین میں کامیابی اور تین میں ناکامی کا سامنا کرنا پڑا اور 6 پوائنٹس کے ساتھ چوتھے نمبر پر ہے۔گزشتہ روز کوئٹہ گلیڈی ایٹرز نے سنسنی خیز مقابلے کے بعد ٹورنامنٹ کی مشکل حریف ملتان سلطانز کو شکست دی تھی۔

ڈونیڈن (سپورٹس لنک رپورٹ)روز ٹیلر کی شاندار اور جارحانہ بلے بازی کی بدولت نیوزی لینڈ نے انگلینڈ کو چوتھے ایک روزہ بین الاقوامی کرکٹ میچ میں 5 وکٹوں سے شکست دیکر پانچ میچوں کی سیریز 2-2 سے برابر کر دی، میزبان ٹیم نے 336 رنز کا ہدف 49.3 اوورز میں 5 وکٹوں کے نقصان پر پورا کیا، روز ٹیلر نے عمدہ بیٹنگ کا مظاہرہ کرتے ہوئے ناقابل شکست 181 رنز بناکر اپنی ٹیم کی فتح میں اہم کردار ادا کیا، لیتھم 71 رنز کے ساتھ دوسرے نمایاں بلے باز رہے، انگلینڈ کی ٹیم نے پہلے کھیلتے ہوئے مقررہ 50 اوورز میں 9 وکٹوں کے نقصان پر 335 رنز بناکر کیویز کو میچ میں کامیابی کیلئے 336 رنز کا ہدف دیا، جونی بیئرسٹو اور جو روٹ نے سنچریاں سکور کیں تاہم انکی سنچریاں رائیگاں گئیں، کیویز کی طرف سے سودھی نے چار، ٹرینٹ بولٹ اور منرو نے دو، دو جبکہ ٹم ساؤتھی نے ایک کھلاڑی کو آؤٹ کیا، جواب میں کیویز ٹیم نے روز ٹیلر کے ناقابل شکست 181 رنز کی بدولت مطلوبہ ہدف 49.3 اوورز میں 5 وکٹوں کے نقصان پر حاصل کرلیا، روز ٹیلر کو عمدہ بیٹنگ پر میچ کا بہترین کھلاڑی قرار دیا گیا۔ گزشتہ روز کیویز اور انگلینڈ کے درمیان ڈونیڈن میں کھیلے گئے سیریز کے چوتھے میچ میں کیویز ٹیم کے کپتان کین ولیمسن نے ٹاس جیت کر پہلے بیٹنگ کا فیصلہ کیا۔ انگلینڈ کی ٹیم نے پہلے کھیلتے ہوئے مقررہ 50 اوورز میں 9 وکٹوں کے نقصان پر 335 رنز بناکر کیویز کو میچ میں کامیابی کیلئے 336 رنز کا ہدف دیا، انگلینڈ کی طرف سے جونی بیئرسٹو 138 رنز اور جو روٹ 102 رنز بناکر نمایاں بلے باز رہے تاہم انکی سنچریاں رائیگاں گئیں، کیویز کی طرف سے سودھی نے چار، ٹرینٹ بولٹ اور منرو نے دو، دو جبکہ ٹم ساؤتھی نے ایک کھلاڑی کو آؤٹ کیا، جواب میں کیویز ٹیم کا آغاز انتہائی مایوس کن تھا اور اس کے پہلے دو کھلاڑی بغیر کوئی رن بنائے پویلین لوٹ گئے اور یوں لگ رہا تھا کہ انگلینڈ ٹیم اب کیویز ٹیم کو زیر کر سکتی ہے تاہم بعد میں روز ٹیلر نے انتہائی شاندار جارحانہ بلے بازی کا مظاہرہ کرتے ہوئے ناقابل شکست 181 رنز کی بدولت مطلوبہ ہدف 49.3 اوورز میں 5 وکٹوں کے نقصان پر حاصل کرکے انگلینڈ کو 5 وکٹوں سے شکست دے دی اور پانچ میچوں کی سیریز 2-2 سے برابر کردی۔ انگلینڈ کی طرف سے عمدہ باؤلنگ کا مظاہرہ کرتے ہوئے کاران نے دو جبکہ وکیز، ووڈ اور سٹوکیز نے ایک، ایک کھلاڑی کو آؤٹ کیا۔ نیوزی لینڈ کے روز ٹیلر کو عمدہ بیٹنگ پر میچ کا بہترین کھلاڑی قرار دیا گیا۔

دبئی(سپورٹس لنک رپورٹ): پاکستان سپر لیگ کی فرنچائز کراچی کنگز کے غیر ملکی کھلاڑی روی بوپارہ نے ٹیم کی جانب سے فائنل کھیلنے کی صورت میں کراچی آنے پر رضامندی ظاہر کردی۔

پاکستان سپر لیگ کے تیسرا مرحلہ آج سے دبئی میں شروع ہوگا جب کہ اس سے قبل لیگ میں تمام ٹیموں نے 5، 5 میچز کھیل چکی ہیں۔

پوائنٹس ٹیبل پر ملتان سلطانز اور کراچی کنگز 5 میچز میں 7، 7 پوائنٹس کے ساتھ بالترتیب پہلی اور دوسری پوزیشن پر موجود ہیں۔

دفاعی چیمپئن پشاور زلمی اور اسلام آباد یونائیٹڈ 6،6 پوائنٹس کے ساتھ ٹاپ 4 میں شامل ہیں جب کہ کوئٹہ گلیڈی ایٹرز 4 پوائنٹس کے ساتھ پانچویں اور لاہور قلندرز آخری نمبر پر ہیں۔

کراچی کنگز نے تیسرے مرحلے کے لیے تیاریوں کا سلسلہ شروع کر رکھا ہے جب کہ کراچی کا اگلا میچ جمعرات کو کوئٹہ گلیڈی ایٹرز کے خلاف ہے۔

نجی ٹی وی چینل سے گفتگو میں روی بوپارہ کا کہنا ہے کہ لیگ میں سب ہی کھلاڑی بہترین پرفارمنس دینے کی کوشش کررہے ہیں جب کہ ٹیم منیجمنٹ اور ٹیم ایک فیملی کی طرح ہیں۔

انہوں نے کہا کہ پی ایس ایل کا معیار بہترین ہے اور شروع میں ہی اندازہ ہوگیا تھا کہ لیگ میں دلچسپ مقابلے ہوں گے۔

ان کا کہنا تھا کہ لیگ میں دنیا کے بہترین بولر اور کھلاڑی کھیل رہے ہیں جس سے پاکستان کرکٹ میں نکھار آیا ہے۔

ایک سوال کے جواب میں روی بوپارہ نے کہا کہ پاکستان کو پی ایس ایل سے نوجوان کھلاڑی ملے ہیں جن میں فخر زمان، شاداب خان اور حسن علی شامل ہیں اور مستقبل میں بھی کئی کرکٹرز لیگ سے نکلیں گے۔

انہوں نے کہا کہ نوجوان کھلاڑیوں کے ساتھ کھیل کر لطف اندوز ہورہا ہوں اور ان کی مدد کے لیے ہر وقت تیار ہوں۔

کراچی میں فائنل سے متعلق سوال پر کراچی کنگز کے بیسٹمین کا کہنا تھا کہ پرامید ہوں کہ ہم فائنل کھیلیں گے کیوں کہ ہم اچھی پوزیشن میں ہیں جب کہ ہماری کوشش ہے کہ لیگ اسٹیجز میں پہلی پوزیشن حاصل کریں اور پلے آفز کھیل کر کراچی جائیں، میں وہاں ضرور جاؤں گا۔

ساتھی کھلاڑیوں کو پاکستان جانے کے لیے قائل کرنے کے سوال پر انہوں نے کہا کہ میرا خیال ہے کہ یہ مناسب نہیں ہوگا کہ میں دوسرے کھلاڑیوں کو کراچی جانے پر قائل کروں، یہ ان کا اپنا فیصلہ ہوگا۔

لاہور(سپورٹس لنک رپورٹ)سیکرٹری سپورٹس پنجاب محمد عامر جان کی ہدایت پر چوتھی بین الصوبائی گیمز کی تیاری کے لئے سپورٹس بورڈ پنجاب کے زیراہتمام کھلاڑیوں کے ٹرائلز اور تربیتی کیمپ 9مارچ بروز جمعہ سے نشتر پارک سپورٹس کمپلیکس میں منعقد ہورہے ہیں، پنجاب کا 325 رکنی دستہ 28 گیمز میں حصہ لے گا، تفصیلات کے مطابق چوتھی بین الصوبائی گیمز 18سے20مارچ تک پشاور میں منعقد ہورہی ہیں جس میں پنجاب اپنے اعزاز کا دفاع کرے گا، سیکرٹری سپورٹس پنجاب محمد عامر جان کی ہدایت پر سپورٹس بورڈ پنجاب کھلاڑیوں کی تربیت کیلئے 9 مارچ سے تربیتی کیمپ کا انعقاد کررہا ہے جس میں کھلاڑیوں کے ٹرائلز میرٹ پر ہوں گے، تربیتی کیمپ میں ماہر کوچز اور ٹرینر کھلاڑیوں کو تربیت دیں گے، کیمپ 15مارچ تک جاری رہیں گے،سیکرٹری سپورٹس پنجاب محمد عامر جان نے ہدایت کی ہے کہ تربیتی کیمپ میں کھلاڑیوں کو بہترین سہولتیں فراہم کی جائیں ، کھلاڑیوں کے نام اپنے پیغام میں انہوں نے کہا کہ پنجاب کے کھلاڑی باصلاحیت ہیں ،تربیتی کیمپ میں بھرپور تیاری کریں اور پنجاب کے اعزاز کا دفاع کرتے ہوئے پہلے سے زیادہ میڈلز جیتیں، سپورٹس بورڈ پنجاب کھلاڑیوں کو تیاری کیلئے ہر طرح کی سہولت اور تربیت فراہم کرے گا۔سیکرٹری سپورٹس پنجاب محمد عامر جان نے انتظامیہ اور کوچز کو سختی سے ہدایت کی کہ وہ چوتھی بین الصوبائی گیمز کیلئے بہترین کھلاڑیوں کا انتخاب کریں اور کامیابی کیلئے بھرپور محنت کریں۔ واضح رہے کہ سپورٹس بورڈ پنجاب کا 325 رکنی دستہ 28 گیمز میں حصہ لے گا،ان گیمز میں اتھلیٹکس، آرچری، بیڈمنٹن،بیس بال، باسکٹ بال، باڈی بلڈنگ، باکسنگ، کراٹے، کشتی رانی، رگبی، شوٹنگ، سافٹ بال، سکواش، گولف، جمناسٹک، ہینڈ بال، ہاکی، جو جٹسو، کبڈی، سوئمنگ، ٹیبل ٹینس، تائیکوانڈو، ٹینس، رسہ کشی، والی بال، ویٹ لفٹنگ، ریسلنگ اور ووشو شامل ہیں۔

دبئی (سپورٹس لنک رپورٹ) پاکستان سپر لیگ کا دوسرا مرحلہ بھی ختم ہو گیا، تمام ٹیمیں آج آرام کریں گی۔ کل سے دبئی کے میدان میں کرکٹ کا میلہ سجے گا، ملتان سلطانز سات پوائنٹس کیساتھ پہلی پوزیشن پر قبضہ جمائے ہوئے ہیں۔

پی ایس ایل تھری میں سنسنی سے بھرپور دوسرا مرحلہ بھی مکمل ہوگیا۔ آج کھلاڑی کرکٹ کی جنگ کے بجائےآرام کریں گے، کل سے دبئی کے میدان میں میلہ سجے گا، پشاور زلمی اور ملتان سلطانز کی ٹیمیں ان ایکشن ہوں گی۔

پھر سے چوکے چھکوں کی برسات ہو گی۔ ابھی تک کے مقابلوں میں ملتان کی ٹیم 5 میں سے تین میچ جیت کر پہلی پوزیشن پر قبضہ جمائے ہوئے ہے۔ کراچی کا دوسرا اور پشاور کا تیسرا نمبر ہے۔ لاہور قلندرز کی ٹیم آخری پوزیشن پر موجود ہے۔

اسلام آباد (سپورٹس لنک رپورٹ)پاکستان کرکٹ نے دنیائے کرکٹ کو کئی نامور فاسٹ بولرز فراہم کیے ہیں۔ فضل محمود سے لیکر محمد عامر تک یہ فہرست بہت طویل ہے تاہم اس فہرست میں ایک نام ایسا بھی ہے جن کو نہ صرف پاکستان بلکہ کرکٹ کے عظیم ترین گیند بازوں میں شمار کیا جاتا ہے اور وہ ہے وسیم اکرم۔

ان دنوں ایک بچے کی ویڈیو سوشل میڈیا پر وائرل ہے جس کا بولنگ ایکشن وسیم اکرم سے بے انتہا ملتا جلتا ہے۔

ویڈیو میں بچے کو گیند بازی کرتے دیکھا جاسکتا ہے جو بظاہر اپنے گھر کے پچھلے حصے میں موجود ہے۔

ویڈیو میں دوسرے اینڈ پر ایک اسٹمپ بھی دیکھی جاسکتی ہے جسے یہ بچہ کئی مرتبہ ہٹ کرتا ہے جس سے اس کی مہارت کا اندازہ لگایا جاسکتا ہے۔

ویڈیو پر تبصرہ کرتے ہوئے وسیم اکرم نے کہا کہ ’یہ بچہ کہاں ہے؟ ہماری قوم کی رگوں میں بہترین قسم کا ٹیلنٹ دوڑ رہا ہے تاہم ایسا کوئی پلیٹ فارم موجود نہیں جہاں ان بچوں کو شناخت مل سکے۔ وقت آگیا ہے کہ ہم اس بارے میں کچھ کریں۔‘

سوشل میڈیا پر کئی صارفین نے بچے کی بولنگ کی زبردست انداز میں تعریف کی جو اس کم عمر میں اس مہارت سے بال کو سوئنگ اور اسٹمپس کو ہٹ کررہا ہے کہ کئی بین الاقوامی کرکٹرز بھی ایسا نہ کرپائیں۔

ویڈیو پر وسیم اکرم کی اہلیہ شنیرا اکرم نے کہا کہ شاید ایک اور وسیم اکرم مل گیا۔وسیم اکرم پاکستان سپر لیگ کی فرنچائز ملتان سلطانز کے ڈائریکٹر کرکٹ آپریشنز ہیں۔اس سے قبل وہ اسلام آباد یونائیٹڈ کے مینٹور بھی رہ چکے ہیں۔

لاہور(سپورٹس لنک رپورٹ)صوبائی وزیر کھیل جہانگیر خانزادہ نے کہا ہے کہ پنجاب حکومت روایتی کھیلوں کے فروغ کیلئے بھرپور اقدامات کررہی ہے، روایتی کھیل کبڈی میں پنجاب کے گبھرو نوجوان بڑھ چڑھ کر حصہ لیتے ہیں، قومی کبڈی چیمپئن شپ کے انعقاد سے کھلاڑیوں کی حوصلہ افزائی ہوگی،وزیر اعلیٰ پنجاب محمد شہباز شریف کی ہدایت پر کھلاڑیوں کو سپورٹس کی جدید سہولتیں فراہم کی جارہی ہیں، 40 قومی کبڈی چیمپئن شپ میں ایران کی ٹیم کو خوش آمدید کہتے ہیں، دونوں ممالک دوستی کے رشتے میں مضبوطی سے بندھے ہیں، ٹیم کی آمد سے ہمارے نوجوانوں کی حوصلہ افزائی ہوگی، ان خیالات کا اظہار انہوں نے بدھ کے روز ویلو ڈروم نشترپارک سپورٹس کمپلیکس میں 40ویں قومی کبڈی چیمپئن شپ کے افتتاحی تقریب سے بطور مہمان خصوصی خطاب کرتے ہوئے کیا

قبل ازیں گرائونڈ میں آمد پر صوبائی وزیر کھیل جہانگیر خانزادہ کا پاکستان کبڈی فیڈریشن کے عہدیداران نائب صدر رمضان گھمن، سیکرٹری رانا سرو رڈپٹی ڈائریکٹرسپورٹس محمد حفیظ بھٹی اور دیگر نے پھولوں کے ہار پہنا کر خوش آمدید کہا،ٹورنامنٹ میں کینڈا کبڈی ایسوسی ایشن کے جنرل سیکرٹری سنتوش سنگھ بھی موجود تھے ،صوبائی وزیر نے اس موقع پر چیمپئین شپ کے آغاز کا اعلان کیا، گرائونڈ کبڈی کے شائقین سے کھچا کھچ بھرا ہوا تھا، اور مقابلوں سے بھرپور محظوظ ہوئے، اپنے خطاب میںصوبائی وزیر کھیل جہانگیر خانزادہ نے مزید کہا کہ سپورٹس کی ترقی کیلئے پنجاب حکومت نے جو اقدامات کئے ہیں اور جتنی خطیر رقم سپورٹس کے فروغ کیلئے مختص کی ہے اس کی مثال ماضی میں نہیں ملتی، پنجاب میں 50جدید جمنیزیم ، سیکڑوں گرائونڈز ، 25ہاکی گرائونڈز،سپورٹس کمپلیکس ، 74فلڈ لائٹس کرکٹ گرائونڈز اور سپورٹس سٹیڈیم تعمیر کئے جارہے ہیں

ان منصوبوں کی تکمیل سے سپورٹس کا کلچر فروغ پائے گا اور نوجوانوں کو سپورٹس کی بہترین سہولتیں میسر ہوں گی۔صوبائی وزیر کھیل جہانگیر خانزادہ نے مزید کہا کہ کبڈی پنجاب کا صدیوں پرانا کھیل ہے جو آج بھی مقبول ترین کھیلوں میں شمار ہوتا ہے، کبڈی میں ہمارے کھلاڑی بہت باصلاحیت ہیں جو کہانٹرنیشنل ایونٹس میں بھی اپنی مہارت منوا چکے ہیں، پنجاب حکومت روایتی کھیلوں کی بھی سرپرستی کررہی ہے، چیمپئین شپ میں بہترین کارکردگی کا مظاہرہ کرنیوالے کھلاڑیوں کو قومی کبڈی ٹیم میں شامل کیا جائے گا جو بین الاقوامی مقابلوں میں حصہ لیں گے۔

صوبائی وزیر کھیل جہانگیر خانزادہ نے ایرانی کبڈی ٹیم کا پاکستان آمد پر شکریہ ادا کرتے ہوئے کہا کہ ٹیم کے پاکستان آنے سے پاک ایران دوستی مزید مضبوط ہوگی اور عوام میں اس کی جڑیں مضبوط ہوں گی، ایران نے کبڈی کے کھیل میں اپنا مقام بنایا گیاہے، ہماری کوشش ہوگی کہ دونوں ممالک سپورٹس کے وفود کا تبادلہ کریں تاکہ سپورٹس کو مزید فروغ مل سکے۔اس موقع پر صوبائی وزیر نے پاک ایران دوستی کے نعرے لگوائے۔اس موقع پر پنجاب اور ایران کی کبڈی ٹیموں کا مہمان خصوصی جہانگیر خانزادہ سے تعارف کرایا گیا

دونوں ٹیموں نے الگ الگ ان کے ساتھ گروپ فوٹوزبنوائے۔چیمپئین شپ میں 12نیشنل ٹیمیں جن میں آرمی، واپڈا ، ریلوے، پولیس ، ایئرفورس ، سوئی گیس ، پی او ایف واہ کینٹ، پنجاب، سندھ، بلوچستان،خیبر پختونخوا، اسلام آباد اور ایرانی کبڈی ٹیم بھی حصہ لے رہی ہیں ۔ ٹورنامنٹ کا افتتاحی میچ پنجاب اور ایران کی کبڈی ٹیموں کے درمیان خصوصی میچ کھیلا گیا جس میں جس میں ایرانی کبڈی ٹیم نے پنجاب کو 41-40 پوائنٹس سے شکست دی۔

دبئی(سپورٹس لنک رپورٹ)پاکستان کے ٹینس اسٹار اعصام الحق بھی پاکستان سپر لیگ کے بخار میں مبتلا ہوگئے اور میچز دیکھنے کے لیے دبئی پہنچ گئے۔

نجی ٹی وی چینل سے خصوصی گفتگو کرتے ہوئے اعصام الحق نے کہا کہ وہ چونکہ لاہوری ہیں اس لیے پی ایس ایل میں لاہور قلندرز کو سپورٹ کررہے ہیں۔

اعصام الحق نے کہا کہ ’’اللہ کرے کہ وہ دن بھی آئے جب پی ایس ایل کے سارے میچز پاکستان میں ہوں، اس بات کچھ میچز لاہور اور فائنل کراچی میں ہونے جارہا ہے، چیزیں بہتر ہورہی ہیں جبکہ ملک میں سیکیورٹی کی صورتحال بھی بہت بہتر ہوگئی ہے‘‘۔

انہوں نے کہا کہ پاکستان میں میچز کے انعقاد کے لیے بین الاقوامی کھلاڑیوں کا تعاون بھی پاکستان کو درکار ہے اور امید کرتا ہوں کہ ملک میں انٹرنیشنل کرکٹ مکمل طور پر بحال ہوجائے۔

اعصام الحق نے کہا کہ ٹینس کے میچز آہستہ آہستہ پاکستان میں ہونا شروع ہوگئے ہیں، ہم جہاں بھی جائیں پاکستان کا مثبت چہرہ دنیا کو دکھانا چاہیے۔

انہوں نے کہا کہ کرکٹ اور دیگر کھیلوں کی طرح ٹینس کی بھی لیگ ہوسکتی ہے۔