Tag: ویسٹ انڈیز

کرائسٹ چرچ(سپورٹس لنک رپورٹ)آئی سی سی انڈر19 ورلڈ کپ میں سری لنکا نے ویسٹ انڈیز کو تین وکٹوں سے شکست دے کر پلیٹ چیمپئن شپ ٹرافی اپنے نام کر لی ۔ اتوار کو کیریبین جونیئر ٹیم نے ابتدائی بیٹنگ کرتے ہوئے پانچ وکٹوں پر 245رنز بنائے۔ الیک اتھانزے نے پانچ چوکوں اور دو چھکوں کی مدد سے نا قابل شکست 110رنز اپنے کھاتے میں درج کرائے ۔ بریڈ برنیس ناٹ آؤٹ37رنز کے ساتھ دوسرے بہترین بیٹسمین ثابت ہوئے۔ بھاسکر یاد رام 31، کیگن سمنز اور کرسٹن کالی چرن نے24، 24 رنز کا اضافہ کیا۔ پراوین جیا وکرما اور نیپون مالنگا نے دو ، دو کھلاڑیوں کو میدان سے رخصت کیا ۔ جواب میں سری لنکن ٹیم نے 255رنز کا مطلوبہ ہدف آخری اوور میں سات وکٹوں پر حاصل کر لیا ۔ اوپنر ہسیتھا بویا گوڈے نے سترہ چوکوں اور ایک چھکے کی مدد سے 116رنز کی اننگز تخلیق کی ۔ دھننجایا لکشن سنچری مکمل نہ کر کسے اور انہوں نے بارہ چوکوں اور ایک چھکے سے مزین 98رنز جوڑے۔ جیرون ہوٹے اور بھاسکر یاد رام نے دو ، دو مہرے کھسکائے۔ پانچویں پوزیشن کے پلے آف میچ میں بنگلہ دیش نے انگلینڈ کو پانچ وکٹوں سے شکست دے دی ۔ انگلش ٹیم نے 216رنز بنائے۔ لیام بینکس74اور کپتان ہیری بروک66رنز پر نمایاں رہے ۔ حسن محمود نے تین وکٹیں حاصل کیں۔ جواب میں بنگال ٹائیگرزنے مطلوبہ ہدف کپتان سیف حسن اور عفیف حسین کی نصف سنچریوں کی بدولت48 ویں اوور میں عبور کر لیا۔ گیارہویں پوزیشن کے پلے آف میچ میں زمبابوے نے کینیڈا کو 138رنز سے ٹھکانے لگایا۔ آج ٹورنامنٹ کے پہلے سیمی فائنل میں افغانستان کو آسٹریلیا کا چیلنج درپیش ہو گا جبکہ پاکستانی ٹیم منگل کو دوسرے سیمی فائنل میں روایتی حریف بھارت کے مقابل ہو گی۔

لاہور(سپورٹس لنک رپورٹ)ویسٹ انڈین بورڈ اور پی سی بی کے درمیان مسلسل 5سیریز کھیلنے کا معاہدہ ختم ہوگیا ۔چیئرین پی سی بی نجم سیٹھی کا کہنا ہے کہ کیربین ٹیم صرف اس سال سیریز کھیلنے پاکستان آئے گی جبکہ 5 سہ ملکی سیریز امریکہ میں ہوں گی ،گزشتہ روز میڈیا سے گفتگو کرتے ہوئے نجم سیٹھی نے کہا سیریز کے تین میچز پاکستان میں کرانے سے کسی کو منافع نہیں ہوگا اور اسی لئے ویسٹ انڈین بورڈ کا کہنا ہے کہ اگر پیسے نہیں ملیں گے تو کھیلنے کا کیا فائدہ ،نجم سیٹھی نے کہا اب نیا معاہدہ تشکیل دیا جا رہا ہے جس کے تحت کیربین ٹیم اس سال تو پاکستان آئے گی جبکہ آئندہ لگاتار پانچ سال امریکہ میں سہ ملکی سیریز کھیلی جائے گی ۔ ایک سوال کے جواب میں نجم سیٹھی نے کہا نیوزی لینڈ کے خلاف ون ڈے سیریز میں کلین سویپ پر ٹیم مینجمنٹ سے وطن واپسی پر پوچھ گچھ ہوگی ۔انہوں نے کہا دوسرے ٹی 20 سے پہلے میری مکی آرتھر سے فون پر بات ہوئی اور میرے مشورے پر سرفراز کو نمبرچار پر بھیجا گیا کیونکہ کپتان فرنٹ سے لیڈ کرتا ہے اور اچھی بات یہ ہے کہ سرفراز نے یہ بات مان لی ،انہوں نے کہا پیسر زکو زیادہ کرکٹ کھیلنے سے انجریز ہوئیں اب کھلاڑیوں کو صرف مخصوص لیگز کھیلنے کی اجازت ملے گی ،ایک سوال کے جواب میں انہوں نے کہا پی ایس ایل تھری کو کبھی کوئی خطرہ نہیں تھا،لیگ شیڈول کے مطابق ہوگی۔ ایف آئی اے کی جانب سے کرکٹ بورڈ کیخلاف تحقیقات کو بھی نجم سیٹھی نے خوش آمدید کہا اور مکمل تعاون کا اعلان کیا ۔

شعیب ملک کی ناقص کارکردگی پر سابق ٹیسٹ کپتان محمد یوسف خاصے ناراض دکھائی دیتے ہیں، نجی ٹی وی کے پروگرام   میں گفتگو کرتے ہو ئے محمد یوسف کا کہنا تھا کہ نیوزی لینڈ میں شعیب ملک کو بھیجنے کا فیصلہ ہی غلط تھا۔

محمد یوسف کے خیال میں شعیب ملک صرف یواے ای ،ایشیا اور ویسٹ انڈیز کی پچز پر بیٹنگ کر سکتے ہیں۔

پاکستان کے لئے 1998ء سے 2010ء تک 288ون ڈے کھیلنے والے 43سالہ محمد یوسف نے کہا کہ نیوزی لینڈ کی موجودہ پچز پر ہمارے بیٹسمین محض ڈر کر اپنی وکٹیں گنواتے رہے۔

یوسف نے اس بات کو تسلیم کیا کہ دنیا میں کوئی ایسا بیٹسمین نہیں جو گیند سے نہ ڈرتا ہو،البتہ شعیب ملک جس انداز میں نیوزی لینڈ میں ان کے بولرز سے ڈر کر کھیلے اور وکٹ سے اتر رہے تھے،یہ انتہائی افسوس ناک مظاہرہ تھا۔

محمد یوسف نے اپنی بات کو مزید آگے بڑھاتے ہوئے کہا کہ ایسا پہلی بار نہیں ہوا جب شعیب ملک نیوزی لینڈ جا کر ناکام ہوئے ہوں۔

شعیب ملک کا نیوزی لینڈ میں بطور بیٹسمین ریکارڈ انتہائی شرمناک ہے،10ون ڈے میچوں میں سابق کپتان صرف 94رنز بنا سکے ہیں،اس تنا ظر میں محمد یوسف کا کہنا تھا کہ اب قومی سلیکشن کمیٹی کوآگے دیکھنا چا ہیے،اور وقت آگیا ہے کہ شعیب ملک سے جان چھڑا لی جائے۔

سابق کپتان کا کہنا تھا کہ 2019ء میں انگلینڈ میں ورلڈ کپ تک شعیب ملک کو ٹیم کے ہمراہ رکھنے سے کوئی فائدہ نہیں ہوگا۔

محمد یوسف کہتے ہیں کہ 2001ء سے شعیب ملک انگلینڈ جا رہے ہیں اور 24ون ڈے میچوں میں انگلش سرزمین پر وہ صرف ایک مرتبہ 50 سے زیادہ رنز بنانے میں کامیاب رہے ہیں،ایسی صورت حال میں شعیب ملک کو ورلڈ کپ انگلینڈ میں کھلانا ایک بڑی غلطی ہو گی۔

محمد یوسف کا کہنا تھا کہ 2019ء ورلڈ کپ میں شعیب ملک کی عمر 37سال ہو گی،اس سے بہتر ہے کہ سلیکشن کمیٹی کسی نوجوان کھلاڑی کو موقع دے۔