شن بوکو ایسوسی ایشن کے تحت شوتوکان کراٹے اکیڈمی کراچی میں کھلاڑیوں کے اعزاز میں تقریب

نوجوانوں اور بچوں کو کراٹے جیسے بہترین فن کی طرف

راغب کرنا ہی شن بوکو ایسوسی ایشن کا مقصد ہے، شی ہان شہزاد احمد

شن بوکو ایسوسی ایشن کے تحت شوتوکان کراٹے اکیڈمی کراچی میں کھلاڑیوں کے اعزاز میں تقریب

کراچی ( سپورٹس لنک)  عملی طور پر کام کرتے ہوئے گراس روٹ لیول سے نوجوانوں اور بچوں کی چھپی ہوئی صلاحیتوں کو اجاگر کرنا اور کراٹے کے میدان میں انہیں بہتر مواقعے مہیا کرنا ہی شن بوکو ایسوسی ایشن آف کراٹے ڈو پاکستان کی ترجیح اور مقصد ہے

کیونکہ کراچی کے نوجوان اور بچے دیگر اسپورٹس کی طرح کراٹے میں بھی بے پناہ صلاحیتیں رکھتے ہیں بس ضرورت اس امر کی ہے کہ اس چھپے ہوئے ٹیلنٹ کو زیادہ سے زیادہ اجاگر کیا جائے

اور یقیناً اس کے لئے بہترین طریقہ یہی ہے کہ اس حوالے سے زیادہ سے زیادہ چیمپئین شپس آرگنائز کی جائیں اور ان میں دیگر کھلاڑیوں کے ساتھ ساتھ نئے کھلاڑیوں کو کھیلنے کے مواقعے فراہم کئے جائیں  تاکہ باصلاحیت کھلاڑیوں کو آگے آنے میں بہترین مواقعے میسر آئیں،

ان خیالات کا اظہار شن بوکو ایسوسی ایشن آف کراٹے ڈو پاکستان کے زیر اہتمام شوتوکان کراٹے اکیڈمی ہیڈکوارٹر کراچی میں کھلاڑیوں کے اعزاز میں ایک پروقار تقریب کے موقعے پر ایسوسی ایشن کے صدر شیہان شہزاد احمد نے کیا۔

انکا کہنا تھا کہ اس تقریب کا مقصد کراٹے کے ان کھلاڑیوں کی مسلسل کامیابیوں پر انکی حوصلہ افزائی کرنا ہے کہ جنہوں نے 11 اگست سے 14 اگست کے دوران لگاتار چار مختلف وینیوز پر مختلف مقابلوں میں اپنی صلاحیتوں کا لوہا منوا کرنہ صرف گولڈ، سلور اور برونز میڈل حاصل کئے

بلکہ اپنے ادارے شن بوکو شوتوکان کراٹے اکیڈمی کا نام بھی روشن کیا۔ انکا مزید کہنا تھا کہ شن بوکو ایسوسی ایشن آف کراٹے ڈو پاکستان کے تحت نہ صرف کراچی میں بلکہ لاہور میں قائم برانچز شن بوکو شوتوکان کراٹے انسٹیٹیوٹ کے

کھلاڑیوں نے بھی جشن آزادی ویک کے دوران تین مختلف چیمپئین شپس میں شرکت کرکے میڈلز حاصل کئے جو کھلاڑیوں کی کارکردگی کا منہ بولتا ثبوت ہے

جسکے لئے شن بوکو ایسوسی ایشن کے زیر سایہ چلنے والے کراچی و لاہور کے ڈوجو انسٹرکٹرزعبدالرحمن، محمد نعمان، وائز صدیقی اور استشناء ڈینیئل بھی مبارکباد کے مستحق ہیں۔

تقریب میں شن بوکو شوتوکان کراٹے اکیڈمی کے کھلاڑیوں کے والدین سمیت مختلف اسپورٹس کی شخصیات موجود تھیں جن میں کراٹے کے معروف ماسٹر سینسی نور الامین،

کک باکسنگ کے کوچ راجہ غضنفر، شوٹنگ بال کے کوچ اعجاز احمد قریشی، کرکٹ اور شوٹنگ بال کے کھلاڑی محسن، سماجی شخصیت محمد ارشد اور دیگر شامل تھے۔

اس موقعے پر تمام کامیاب کھلاڑیوں کو تعریفی سرٹیفکیٹ بھی ایوارڈ کئے گئے جبکہ مہمان ماسٹرز و اسپورٹس کی شخصیات نے اس موقعے پر کراٹے کے کھلاڑیوں کی مسلسل کامیابیوں پر انہیں مبارکباد پیش کی

اور شن بوکوایسوسی ایشن آف کراٹے ڈو کی گراس روٹ لیول سے نوجوانوں اور بچوں کی تربیت کے ساتھ ساتھ انکی کارکردگی کو نکھارنے کیلئے مختلف پروگرامز کے انعقاد پر انکی مثبت کاوشوں کو بھی سراہا۔