پاکستان اولمپک ایسوسی ایشن (پی او اے ) نے نیشنل یوتھ گیمز کے انعقاد کیلئے نیشنل یوتھ گیمز کونسل تشکیل دیدی۔
کونسل کی منظوری پاکستان اولمپک ایسوسی ایشن کی ایگزیکٹو کمیٹی کے حالیہ اجلاس میں دی گئی جس کا باقاعدہ نوٹیفکیشن جاری کر دیا گیاہے ۔
نوٹیفکیشن کے مطابق وزیر اعظم یوتھ پروگرام کے چیئرمین شریک کونسل کا چیئرمین مقرر کیا گیا ہے جبکہ پاکستان اولمپک ایسوسی ایشن کے صدر عارف سعید کو کونسل کا کو چیئرمین اور سیکرٹری جنرل پی او اے خالد محمود کو کونسل کا سیکرٹری مقرر کیا گیا ہے ۔
کونسل میں وفاقی سیکرٹری آئی پی سی محی الدین وانی، پاکستان سپورٹس بورڈ کے ڈی جی یاسر پیرزادہ، آرمی کے ڈائریکٹر جنرل فٹنس اینڈ سپورٹس، ایچ ای سی کے ڈی جی، چیف کمشنر اسلام آباد، بلوچستان،
خیبرپختونخوا، پنجاب، سندھ، آزاد کشمیر اور گلگت بلتستان کے سپورٹس بورڈز کے سربراہان سمیت تمام صوبائی و علاقائی سپورٹس آفیشلز کو شامل کیا گیا ہے ۔
نیشنل یوتھ گیمز کونسل پالیسی سازی، سٹریٹجک فیصلوں اور نگران ادارے کے طور پر کام کرے گی۔ نیشنل یوتھ گیمز کونسل میں 3 خواتین اراکین کو بھی شامل کرنے سمیت تمام صوبوں کی نمائندگی بھی شامل ہیں۔
