سہ ملکی سیریز: افغانستان نے متحدہ عرب امارات کو 38 رنز سے شکست دیدی
شارجہ: سہ ملکی سیریز کے تیسرے میچ میں افغانستان نے متحدہ عرب امارات (یو اے ای) کو 38 رنز سے ہرادیا۔شارجہ میں کھیلےگئے میچ میں متحدہ عرب امارات نے افغانستان کے خلاف ٹاس جیت کر بولنگ کا فیصلہ کیا۔
افغانستان نے پہلے بیٹنگ کرتے ہوئے مقررہ 20 اوورز میں 4 وکٹ پر 188 رنز سکور کیے۔افغانستان کی جانب سے ابراہیم زادران نے 63 اور صدیق اللہ اتل نے 54 رنز کی اننگز کھیلی،کریم جنت نے ناقابل شکست 23 رنز اسکورکیے۔
متحدہ عرب امارات کی جانب سے محمد روہید اور صغیر خان نے دو، دو کھلاڑیوں کو آؤٹ کیا۔189 رنز کے ہدف کے جواب میں اماراتی ٹیم مقررہ 20 اوورز میں 8 وکٹ کے نقصان پر 150 رنز بناسکی۔
متحدہ عرب امارات کی جانب سے کپتان وسیم 67 اور راہول چوپڑا 52 رنز بنا کر نمایاں رہے۔افغانستان کی جانب سے شرف الدین اور راشد خان نے 3،3 وکٹیں حاصل کیں۔
اس سے قبل دونوں ٹیموں کا سامنا پاکستان سے ہوا تھا اور دونوں ٹیموں کو پاکستان کے ہاتھوں شکست کا سامنا کرنا پڑا تھا۔
