میراتھن کی تاریخ میں نیا ریکارڈ قائم ہو گیا
لندن: کینیا کے ایتھلیٹ سباسٹین ساوے نے میراتھن کی تاریخ میں نیا ریکارڈ قائم کر دیا۔ انہوں نے لندن ایونٹ میں 2 گھنٹے سے کم وقت میں ریس مکمل کر لی۔
رپورٹس کے مطابق سباسٹین ساوے نے 26.2 میل پر مشتمل میراتھن ایک گھنٹہ 59 منٹ 30 سیکنڈ میں مکمل کی۔ جو کہ ایلیوڈ کیپچوگے کے 2019 کے غیر سرکاری وقت سے بھی 10 سیکنڈ کم ہے۔
29 سالہ رنر اس سے قبل بھی لندن میں اپنے ڈیبیو کے دوران کامیابی حاصل کر چکے ہیں اور اب تک چاروں میراتھن ریسز میں فتح اپنے نام کر چکے ہیں۔
ان کے کیریئر کی بنیاد ان کے چچا ابراہم (جو 2008 اولمپکس میں 800 میٹر کے مقابلوں میں شریک رہے) اور ایک استاد کی رہنمائی پر رکھی گئی۔ جنہوں نے انہیں مشورہ دیا تھا کہ دوڑ صرف صلاحیت نہیں بلکہ تمہارا مستقبل ہے۔
اس سے قبل کیلون کپٹم نے 2023 شکاگو میراتھون میں دو گھنٹے 35 سیکنڈز کا ریکارڈ بنایا تھا۔
