ویمنز ٹی ٹوئنٹی ایشیا کپ 2026 کے متحدہ عرب امارات میں منعقد ہونے کا امکان بڑھ گیا ہے۔
نجی ٹی وی کے مطابق ایشین کرکٹ کونسل کی جانب سے باضابطہ اعلان ابھی باقی ہے، تاہم شریک ٹیموں کو غیر رسمی طور پر مجوزہ تاریخوں سے آگاہ کر دیا گیا ہے۔
کرکٹ ویب سائٹ کی رپورٹ کے مطابق ایشین کرکٹ کونسل جلد ٹورنامنٹ کے شیڈول اور میزبان ملک کا اعلان کرے گی۔ موجودہ اطلاعات کے مطابق ایونٹ کے لیے متحدہ عرب امارات مضبوط ترین امیدوار کے طور پر سامنے آیا ہے۔
رپورٹ میں بتایا گیا ہے کہ ویمنز ایشیا کپ کا انعقاد 28 اگست سے 13 ستمبر کے درمیان متوقع ہے۔ ٹورنامنٹ میں ایشیا کی 8 ٹیمیں ٹائٹل کے حصول کے لیے ایک دوسرے کے مدمقابل آئیں گی۔
اس دوران پاکستان، بھارت، سری لنکا، بنگلادیش، نیپال، ملائیشیا، تھائی لینڈ اور میزبان بننے کی امیدوار متحدہ عرب امارات کی ٹیموں کی شرکت متوقع ہے۔ تمام ٹیمیں ایونٹ کی تیاریوں میں مصروف ہیں۔
ایشین کرکٹ کونسل کی جانب سے شیڈول اور وینیو کے حتمی اعلان کا بے صبری سے انتظار کیا جا رہا ہے۔ مزید یہ کہ مختلف کرکٹ بورڈز بھی اپنے اسکواڈز کو حتمی شکل دینے میں مصروف ہیں۔
بھارتی کرکٹ بورڈ ویمنز ایشیا کپ کے لیے اپنی ٹیم کا اعلان پہلے ہی کر چکا ہے۔ بورڈ نے ہرمن پریت کور پر اعتماد برقرار رکھتے ہوئے انہیں ایک مرتبہ پھر قومی ٹیم کی قیادت سونپ دی ہے۔
ٹورنامنٹ کی باضابطہ تصدیق کے بعد تمام ٹیموں کی تیاریاں مزید تیز ہونے کا امکان ہے۔ شائقین بھی اس بڑے علاقائی ایونٹ میں ایشیا کی بہترین خواتین کرکٹرز کے درمیان دلچسپ مقابلوں کے منتظر ہیں۔
