نیشنل گیمز سے پاکستان کے لیے نیا ٹیلنٹ سامنے آئے گا، ارشد ندیم
اولمپک گولڈ میڈلسٹ ارشد ندیم نے کہا ہے کہ وہ مکمل فٹ ہیں اور ان کا فوکس ڈائمنڈ لیگ، کامن ویلتھ گیمز اور ایشین گیمز پر ہے۔
کراچی میں میڈیا سے گفتگو میں ارشد ندیم نے کہا کہ نیشنل گیمز سے پاکستان کے لیے نیا ٹیلنٹ سامنے آئے گا۔ انہوں نے بتایا کہ پاکستان میں اسپورٹس کی صورتحال پہلے سے بہتر ہو گئی ہے اور انہیں یقین ہے کہ اس بار ایتھلیٹکس کے ہر ایونٹ میں اچھا ٹیلنٹ ابھرے گا۔
اولمپک گولڈ میڈلسٹ نے مزید کہا کہ یہی ٹیلنٹ انٹرنیشنل سطح پر پاکستان کا نام روشن کرے گا، صورتحال اچھی ہے اس لیے بڑی تعداد میں ایتھلیٹس نیشنل گیمز میں شریک ہیں۔
ارشد ندیم نے کہا کہ نیشنل گیمز میں اچھا پرفارم کرنے والوں کو نیشنل کیمپ میں شامل کیا جائے گا، اگلے سال پاکستان میں کئی ایونٹس ہیں جن میں ان پلیئرز کو موقع مل سکتا ہے۔
انہوں نے مزید کہا کہ نیشنل گیمز میں لازمی نیا ٹیلنٹ سامنے آئے گا اور خود بھی اگر فٹ رہے تو ریکارڈ تھرو کی کوشش کریں گے۔
ارشد ندیم نے کہا کہ ہر بار ان کا ارادہ یہی ہوتا ہے کہ پچھلی پرفارمنس سے بہتر کھیلیں، اس سال انجری کے باوجود بھی انہوں نے بہترین کھیل پیش کیا اور اب وہ مکمل فٹ ہیں۔
اس سے قبل ارشد ندیم نے جیولین تھرو پھینک کر نیشنل گیمز کا آغاز کیا، وہ پاکستان کا جھنڈا لہراتے ہوئے میدان میں داخل ہوئے۔
