انٹر ڈیپارٹمنٹل نیشنل کبڈی چیمپئن شپ ; آرمی اور واپڈا کی ٹیمیں فائنل میں مدمقابل ہوں گی
اسلام آباد، انٹر ڈیپارٹمنٹل نیشنل ایشین اسٹائل کبڈی چیمپئن شپ 2026 کے سیمی فائنل مقابلوں کے اختتام پر پاکستان آرمی اور پاکستان واپڈا نے شاندار کارکردگی کا مظاہرہ کرتے ہوئے فائنل میں جگہ بنا لی ہے۔
چیمپئن شپ کا فائنل میچ 4 جون 2026ء بروز جمعرات شام 6:00 بجے کھیلا جائے گا، جس میں پاکستان آرمی اور پاکستان واپڈا کی ٹیمیں ٹائٹل کے حصول کے لیے مدمقابل ہوں گی۔
اسی روز پوزیشن میچز بھی منعقد کیے جائیں گے۔ پانچویں اور چھٹی پوزیشن کے لیے اے ایس ایف اور پاکستان پولیس کے درمیان مقابلہ شام 4:00 بجے کھیلا جائے گا، جبکہ تیسری اور چوتھی پوزیشن کے لیے پاکستان نیوی اور پاکستان ایئر فورس کی ٹیمیں شام 5:00 بجے آمنے سامنے ہوں گی۔
چیمپئن شپ کا آخری اور فیصلہ کن مقابلہ، یعنی فائنل میچ، شام 6:00 بجے شروع ہوگا۔
فائنل میچ کی اختتامی تقریب کے مہمانِ خصوصی وفاقی سیکریٹری، بین الصوبائی رابطہ (Inter Provincial Coordination) ڈویژن ہوں گے، جو فاتح ٹیم، رنر اپ ٹیم اور نمایاں کارکردگی دکھانے والے کھلاڑیوں میں انعامات اور ٹرافیاں تقسیم کریں گے۔
کبڈی کے شائقین کے لیے یہ دن سنسنی خیز مقابلوں سے بھرپور ہوگا، جہاں ملک کے ممتاز اداروں کی ٹیمیں اپنی بہترین صلاحیتوں کا مظاہرہ کریں گی۔
