صدر پی ایف ایف محسن گیلانی کی سعودی عرب میں پاکستان کے سفیر احمد فاروق سے ملاقات
ریاض: پاکستان فٹبال فیڈریشن (PFF) کے صدر جناب محسن گیلانی نے ریاض میں سعودی عرب میں پاکستان کے سفیر جناب احمد فاروق سے ملاقات کی۔
ملاقات کے دوران پاکستان میں فٹبال کے فروغ اور ترقی کے لیے باہمی تعاون کو مزید مستحکم کرنے اور نئے مواقع تلاش کرنے پر تبادلہ خیال کیا گیا۔
اس موقع پر سعودی عرب میں متعلقہ اداروں اور اسٹیک ہولڈرز کے ساتھ ممکنہ تعاون اور روابط بڑھانے کے امکانات پر بھی گفتگو ہوئی، تاکہ پاکستان کے فٹبال ایکو سسٹم کو مزید مضبوط بنایا جا سکے اور کھلاڑیوں و کھیلوں کے اداروں کے لیے نئے مواقع پیدا ہوں۔
صدر پی ایف ایف محسن گیلانی نے سفیر احمد فاروق کو پاکستان فٹبال فیڈریشن کی جانب سے قومی اور گراس روٹس سطح پر فٹبال کے فروغ کے لیے جاری اقدامات اور مستقبل کے منصوبوں سے آگاہ کیا۔
سفیر احمد فاروق نے پاکستان فٹبال فیڈریشن کی کاوشوں کو سراہتے ہوئے پاکستان اور سعودی عرب کے درمیان کھیلوں کے شعبے میں مزید تعاون اور روابط کے فروغ کے لیے اپنے تعاون کا یقین دلایا۔
ملاقات میں اس عزم کا اعادہ کیا گیا کہ کھیل، بالخصوص فٹبال، پاکستان اور سعودی عرب کے عوام کے درمیان روابط کو مزید مضبوط بنانے اور دونوں برادر ممالک کے دیرینہ تعلقات کو مزید گہرا کرنے کے لیے ایک مؤثر پلیٹ فارم ثابت ہو سکتا ہے۔
