انڈر-18 یوتھ ہاکی چیمپئن شپ اختتام پذیر ہو گئی۔

انڈر-18 یوتھ ہاکی چیمپئن شپ کا شاندار اختتام پذیر

ڈاکٹر طارق فضل چوہدری نے کھلاڑیوں میں انعامات تقسیم کیے۔

اسلام آباد ; قومی انڈر-18 یوتھ ہاکی چیمپئن شپ 2026 آج نصیر بُنڈا ہاکی اسٹیڈیم، پاکستان اسپورٹس کمپلیکس اسلام آباد میں ایک سنسنی خیز فائنل کے ساتھ اختتام پذیر ہو گئی۔ قومی کھیل کی بحالی کے لیے منعقدہ اس چیمپئن شپ میں پورے پاکستان سے 15 ٹیموں نے حصہ لیا۔

انتہائی دلچسپ فائنل میں پاکستان کسٹمز نے پنجاب کو شکست دے کر چیمپئن شپ ٹرافی اپنے نام کی۔ اس سے قبل پاکستان آرمی نے خیبر پختونخوا (کے پی کے) کو ہرا کر تیسری پوزیشن حاصل کی۔

تقریب کے مہمان خصوصی وفاقی وزیر برائے پارلیمانی امور ڈاکٹر طارق فضل چوہدری تھے جنہوں نے کھلاڑیوں میں انعامات تقسیم کیے۔ انہوں نے طویل عرصے بعد ایونٹ کے انعقاد پر پاکستان ہاکی فیڈریشن کی کاوشوں کو سراہا اور کہا،

"حکومت ہاکی کی بحالی کے مشن میں پی ایچ ایف کے ساتھ کھڑی ہے۔ آج دکھائی دینے والی صلاحیتوں سے امید ہے کہ ہاکی کے اچھے دن آ رہے ہیں۔”

تقریب میں پاکستان ہاکی کے لیجنڈز کی کہکشاں موجود تھی جن میں شہناز شیخ، حسن سردار، اصلاح الدین صدیقی، سمیع اللہ خان، ایاز محمود، نعیم اختر، قمر ابراہیم، منظور الحسن سینئر، ناصر علی اور کئی دیگر اولمپیئنز شامل تھے۔

ایک اہم پیش رفت کا اعلان کرتے ہوئے صدر پی ایچ ایف محی الدین احمد وانی نے بتایا کہ مذکورہ تمام اولمپیئنز اب قومی سلیکشن اور مینجمنٹ سیٹ اپ کا حصہ ہیں اور ایف آئی ایچ پرو لیگ و ورلڈ کپ سمیت آئندہ بین الاقوامی مقابلوں کے لیے سینئر اور جونیئر ٹیموں کی رہنمائی کریں گے۔

انہوں نے مزید اعلان کیا کہ قومی انڈر-18 چیمپئن شپ اب پی ایچ ایف کے کیلنڈر کا مستقل سالانہ ایونٹ ہو گی تاکہ گراس روٹ سطح پر ٹیلنٹ کی تلاش اور نشوونما کا تسلسل یقینی بنایا جا سکے۔

نوجوان کھلاڑیوں کی حوصلہ افزائی کے لیے فاتح ٹیموں میں 30 لاکھ روپے کے انعامات تقسیم کیے گئے۔

اس چیمپئن شپ نے گراس روٹ سطح پر ہاکی کے لیے نیا جوش پیدا کیا ہے اور قومی کھیل کے کھوئے ہوئے وقار کی بحالی کی جانب ایک مضبوط قدم ہے۔