ابھیشیک شرما کا افغان بولرز پر دھاوا، 30 گیندوں پر سنچری بنا کر نیا ریکارڈ قائم کردیا
بھارت کے جارح مزاج اوپنر ابھیشیک شرما نے افغانستان کے خلاف تیسرے ٹی ٹوئنٹی میں صرف 30 گیندوں پر سنچری بنا کر اپنی ٹیم کی جانب سے ٹی ٹوئنٹی انٹرنیشنل میں تیز ترین سنچری کا ریکارڈ اپنے نام کرلیا۔
نئی دہلی کے ارون جیٹلی اسٹیڈیم میں کھیلے گئے تیسرے ٹی ٹوئنٹی میں افغانستان نے ٹاس جیت کر بھارت کو پہلے بیٹنگ کی دعوت دی، جس کا ابھیشیک شرما نے بھرپور فائدہ اٹھایا۔
بائیں ہاتھ کے اوپنر نے اننگز کے آغاز ہی سے افغان بولرز پر حملہ کردیا اور محض 30 گیندوں پر سنچری مکمل کرلی۔ ابھیشیک شرما 34 گیندوں پر 108 رنز بنا کر آؤٹ ہوئے، ان کی دھواں دار اننگز میں 11 چھکے اور 9 چوکے شامل تھے۔
اس شاندار کارکردگی کے ساتھ ابھیشیک شرما نے ٹی ٹوئنٹی انٹرنیشنل میں کسی فل ممبر ملک کے کھلاڑی کی جانب سے تیز ترین سنچری کا ریکارڈ قائم کردیا۔
اس سے قبل یہ ریکارڈ زمبابوے کے سکندر رضا اور نیوزی لینڈ کے فن ایلن کے پاس تھا، جنہوں نے 33،33 گیندوں پر سنچریاں مکمل کی تھیں۔ تاہم ٹی ٹوئنٹی انٹرنیشنل میں مجموعی طور پر تیز ترین سنچری کا ریکارڈ اب بھی ایسٹونیا کے ساحل چوہان کے پاس ہے،
جنہوں نے 2024 میں قبرص کے خلاف صرف 27 گیندوں پر سنچری بنائی تھی، جبکہ ترکیہ کے محمد فہد 2025 میں بلغاریہ کے خلاف 29 گیندوں پر سنچری بنا کر اس فہرست میں دوسرے نمبر پر ہیں۔
ابھیشیک شرما کی برق رفتار سنچری کی بدولت بھارت نے مقررہ 20 اوورز میں 7 وکٹوں کے نقصان پر 221 رنز بنائے۔222 رنز کے ہدف کے تعاقب میں افغانستان کی پوری ٹیم بھارتی بولنگ کے سامنے بے بس نظر آئی اور 14.1 اوورز میں صرف 94 رنز پر آل آؤٹ ہوگئی۔
بھارت نے یوں تیسرے ٹی ٹوئنٹی میں 127 رنز سے کامیابی حاصل کرکے تین میچوں کی سیریز میں افغانستان کو 3-0 سے وائٹ واش کردیا۔شاندار سنچری پر ابھیشیک شرما کو میچ اور سیریز کا بہترین کھلاڑی بھی قرار دیا گیا۔
افغانستان کے خلاف ریکارڈ ساز اننگز کے ساتھ ابھیشیک شرما نے نہ صرف بھارتی ٹی ٹوئنٹی کرکٹ میں نئی تاریخ رقم کی بلکہ سیریز میں اپنی ٹیم کی فیصلہ کن کامیابی میں بھی مرکزی کردار ادا کیا۔
