میئر کراچی مرتضیٰ وہاب کی پی ایف ایل کے چیئرمین فرحان جونیجو سے ملاقات

میئرکراچی بیرسٹر مرتضیٰ وہاب کی پاکستان میں فٹ بال کی بحالی کے لیے پی ایف ایل کے ساتھ مستقبل کے پروگراموں میں ہرممکن تعاون کی یقین دہانی

چیئرمین، پی ایف ایل ، فرحان جونیجو نے میئرکراچی کو پاکستان میں فٹبال کے شوقین نوجوانوں کی مختلف ضروریات پورا کرنے کے لیے مختلف پروگرامز اور اسٹریٹجک لائحہ عمل پر بریفنگ دی

کراچی،13جون، 2024: میئر کراچی، بیرسٹر مرتضیٰ وہاب نے بروز جمعرات اپنے دفتر میں پاکستان فٹ بال لیگ (پی ایف ایل) کے چیئرمین ،فرحان جونیجو سے ملاقات کی ۔

ملاقات میں فرحان جونیجو نے اُنہیں پی ایف ایل کے مستقبل کے پروگراموں کے بارے میں بریفنگ دیتے ہوئے بتایا کہ یہ پروگرام پاکستان میں فٹ بال کے شوقین نوجوانوں کی ضروریات کو پورا کرنے کے لیےتیار کیا گیا ہے۔

پاکستان فٹبال لیگ کی جانب سے تیار کیے گئے ان پروگراموں کا مقصد پاکستان میں کھیل کے میدان جیسی بنیادی سہولیات کو یقینی بنانے سے لے کر کم مراعات یافتہ علاقوں کے ایسے بچوں کے لیے آسان رسائی کو یقینی بنانا ہے جو فٹ بال کے میدان میں اپنا نام بنانے کا خواب دیکھتے ہیں لیکن مالی مشکلات کی وجہ سے ایسا کر نہیں سکتے۔

یہ بات قابل ذکر ہے کہ میئر کراچی اور پی ایف ایل ٹیم کے درمیان یہ دوسری ملاقات ہے ۔ اس سے قبل ایک ملاقات سابق انگلش فٹبال اسٹار اور پی ایف ایل کے برانڈ ایمبیسیڈر مائیکل اوون سمیت دیگر نامور بین الاقوامی کھلاڑیوں کے اعزاز میں استقبالیہ کے موقع پر ہوئی تھی جس کے بعد اُن اسٹارز کو نمائشی میچ میں مقامی کھلاڑیوں میں جذبے کو فروغ دینے کے لیے ککری فٹبال گراؤنڈ میں مدعو کیا گیا تھا۔

بیرسٹر مرتضیٰ وہاب نے پاکستان میں فٹبال اسٹارز کا خیرمقدم کرنے اور ککری گراؤنڈ میں شائقین کو بات چیت کرنے کے قابل بنانے پر پی ایف ایل کی کاوشوں کو سراہا اور اسے پاکستان میں فٹبال کی بحالی کی جانب ایک انقلابی قدم قرار دیا۔

اس ملاقات میں میئر کراچی نے اپنے خیالات کا اظہار کرتے ہوئے کہا کہ” فٹبال پاکستان میں سب سے زیادہ پسند کیا جانے والا کھیل ہے اور پاکستان میں فٹ بال کے مداحوں کی تعداد بھی بہت زیادہ ہے۔

کراچی کی سڑکیں اس کھیل سے محبت کی وجہ سے پہچانیں جاتی ہیں بالخصوص لیاری جسے اکثر اوقات منی برازیل بھی کہا جاتا ہے کیونکہ یہ لوگ برازیل کی قومی فٹبال ٹیم سے غیر معمولی محبت رکھتے ہیں۔ “

انہوں نے مزید کہا کہ” سندھ حکومت پاکستان میں فٹبال کی بحالی کے مقصد میں پی ایف ایل کو مکمل تعاون فراہم کرے گی کیونکہ اس سے پاکستان میں کھیلوں کی معیشت کو بھی فروغ ملے گا۔“

پاکستان فٹ بال لیگ کے چیئرمین، فرحان جونیجو نے اس اقدام کا خیر مقدم کرتے ہوئے کہا کہ ”میں میئر کراچی کی جانب سے اس طرح کے خیر سگالی پیغام پر انتہائی مشکور اور فخر محسوس کرتا ہو

ں جنہوں نے نہ صرف فٹبال کو ملک کا اگلا پسندیدہ کھیل بنانے میں پی ایف ایل کے وژن کو سراہا ہے بلکہ کراچی میں کے ایم سی فٹبال اسٹیڈیم کی توسیع کے حوالے سےبھی تبادلہ خیال کیا ہے جس سے پاکستان میں فٹ بال کےلاکھوں مقامی کھلاڑیوں کو فائدہ ہو گا اور انہیں بین الاقوامی سطح پر ملک کی نمائندگی کرنے کے اپنے خواب کو پورا کرنے میں مدد ملےگی۔“

چیئرمین، فرحان جونیجو نے مزید کہا کہ ”پی ایف ایل حکومت کے تعاون سے اس بات کو یقینی بنائے گی کہ پاکستان کے تمام شہروں سے ابھرتے ہوئے اور باصلاحیت کھلاڑیوں کو کھیل کی بہترین سہولیات فراہم کی جائیں اور وہ انتہائی پرامید ہیں کہ ملک کے یہ باصلاحیت نوجوان بین الاقوامی سطح پر پاکستان کی نمائندگی کریں گے۔“

پاکستان فٹ بال لیگ کی افتتاحی اور سنگ بنیاد رکھنے کی تقریب رواں مہینے کی ابتداء میں منعقد ہوئی تھی جس میں دنیا بھر سے 18 ممالک کے 28 آفیشلز اور کھلاڑیوں نے شرکت کی تھی، جس میں فیفا سے منظور شدہ آفیشلز اور سابق کھلاڑی بھی شامل تھے۔