عالمی شہرت یافتہ فٹبالر کرسٹیانو رونالڈو نے ایک اور منفرد ریکارڈ اپنے نام کرلیا

عالمی شہرت یافتہ فٹبالر کرسٹیانو رونالڈو نے ایک اہم سنگ میل عبور کرتے ہوئے ایک اور منفرد ریکارڈ اپنے نام کرلیا ہے۔

فٹبال کی دنیا کے اس مایہ ناز اور عظیم کھلاڑی کے سوشل میڈیا پلٹ فارمز پر فالورز کی تعداد ایک ارب سے تجاوز کرگئی ہے۔ کرسٹیانو رونالڈو ایک ارب سے زائد فالوورز رکھنے والے دنیا کے پہلے کھلاڑی بن گئے ہیں۔

رونالڈو کے انسٹا گرام پر سب سے زیادہ 638 ملین فالوورز ہیں۔ اسٹار فٹبالر نے گزشتہ ماہ یوٹیوب چینل پر انٹری دی اور وہاں بھی ریکارڈ پر ریکارڈ بنا ڈالے اور یوٹیوب چینل پر صرف ایک ہفتے میں پچاس ملین سے زائد سبسکرائبرز کر کے منفرد ریکارڈ بنایا۔

ایک بلین فالوورز کی تکمیل پر رونالڈو نے اپنے انسٹا گرام پر بھی ایک پوسٹ کی ہے جس میں انہوں نے فینز کا شکریہ ادا کیا اور کہا کہ میری زندگی کا حصہ بننے کا شکریہ۔

اسٹار فٹبالر نے کہا کہ ہم نے جو کہا وہ کر دکھایا، یہ صرف ایک بلین نہیں بلکہ فینز کی محبت اور جذبے کا ثبوت ہے۔ مدیرا کی گلیوں سے لے کر دنیا کا سب سے بڑا فٹبالر بننے تک میں صرف اپنے چاہنے والوں کیلیے کھیلا۔

واضح رہے کہ حال ہی میں کرسٹیانو رونالڈو کا نام گنیز بک آف ورلڈ ریکارڈ میں بھی شامل کیا گیا ہے۔ صرف یہی نہیں بلکہ وہ 900 گول کرنے والے دنیا کے پہلے فٹبالر بننے کا اعزاز بھی رکھتے ہیں۔