ورلڈ چیمپئن انعام بٹ پاکستان ریسلنگ فیڈریشن کے سیکرٹری منتخب
لاہور; پاکستان ریسلنگ فیڈریشن کے انتخابات میں اگلے چار سال کیلئے ارشد ستار صدر جبکہ ورلڈ چیمپئن ریسلر انعام بٹ بلا مقابلہ سیکرٹری منتخب ہوگئے ۔سابق سیکرٹری محمد ریاض اب خزانچی کی ذمہ داریاں نبھائیں گے ۔
نوید افضل سینئر نائب صدر، رانا امجد اقبال اور انور حسین نائب صدور بن گئے ۔پہلی بار فیڈریشن میں ویمن ونگ کو نمائندگی دی گئی ہے اور ڈاکٹر حفصہ شعیب کونائب صدر چنا گیا ہے ،
منظور احمد خان کاکڑ ایسوسی ایٹ سیکرٹری منتخب ہوئے ہیں۔لیڈی ممبران میں حمیرا لطیف اور ظل نورین شامل ہیں، میاں مختار احمد، اصغر گل، اویس اکبر اور نیامت اللہ کو ایگزیکٹو کونسل ممبر لیا گیا ہے ۔
سیکرٹری انعام بٹ نے کہا کہ فیڈریشن میں ذمہ داریاں ملنا ایک اعزاز ہے ، کوشش ہوگی کہ ریسلرز کو درپیش مسائل کو حل کرنے کے ساتھ کھیل کے فروغ کیلئے اقدامات کریں۔ سیکرٹری بننے کا مطلب یہ نہیں ریسلنگ کو خیرباد کہہ دوں، انٹرنیشنل مقابلوں میں پاکستان کی نمائندگی جاری رہے گی۔
ویمن ونگ کی انچارچ ڈاکٹر حفصہ شعیب نے ویمنز ریسلرز کوبھی سامنے لانے کا اعلان کرتے ہوئے کہاکہ مردوں کے ساتھ ویمنز ریسلرز کو بھی پاکستان کی نمائندگی کا موقع دیا جائے گا۔
ویمن ریسلرز کو تیار کرنے کے لیے ایونٹس کی پلاننگ کی گئی ہے ، جلد ویمنز ریسلرز بھی میڈلز لے کر پاکستان کا پرچم بلند کرتی نظر آئیں گی۔
