ایس جونیئر گالف لیگ کے نو نوجوان گالفرز کی مراکش میں شاندار کارکردگی
لاہور: پاکستان کی ایس جونیئر گالف لیگ (AJGL) سے تعلق رکھنے والے نو نوجوان گالفرز نے رباط، مراکش میں منعقدہ پہلے آئی ایس ایف ورلڈ اسکول گالف چیمپئن شپ میں شاندار شرکت مکمل کر کے عالمی سطح پر پاکستان کا وقار بلند کیا۔
رائل گالف دارالسلام میں ہونے والی اس چار روزہ چیمپئن شپ میں 17 ممالک کے 62 کھلاڑیوں نے حصہ لیا۔ سخت گرین کنڈیشنز، گھنے رف اور پروفیشنل یارڈیج کے باوجود پاکستانی کھلاڑیوں نے بھرپور حوصلے، مہارت اور جذبے کا مظاہرہ کیا۔
گرلز انڈر 18 کیٹیگری میں شازمینہ فاطمہ خان نے 379 اسکور کے ساتھ 9ویں، زر مینا مریم خان نے 386 اسکور کے ساتھ 10ویں اور نبیہہ نفیس نے 421 اسکور کے ساتھ 13ویں پوزیشن حاصل کی۔
گرلز انڈر 15 میں زوائے قریشی نے بہترین انفرادی کارکردگی دکھاتے ہوئے 371 اسکور کے ساتھ 8ویں، جبکہ ماہنور محی الدین سید نے 415 اسکور کے ساتھ 12ویں پوزیشن حاصل کی۔
بوائز انڈر 18 میں محمد وجاہت انور نے مسلسل کھیل کا مظاہرہ کرتے ہوئے 371 اسکور کے ساتھ 12ویں، اور بوائز انڈر 15 میں محمد موسیٰ خان نے 357 اسکور کے ساتھ 11ویں، حمزہ معید یوسف نے 369 اسکور کے ساتھ 14ویں جبکہ فذیل احمد نے 385 اسکور کے ساتھ 16ویں پوزیشن حاصل کی۔
ٹیم پاکستان نے مجموعی طور پر سات ممالک میں سے چھٹی پوزیشن حاصل کی، اور قازقستان کو پیچھے چھوڑا۔ مراکش نے چیمپئن شپ جیتی، تھائی لینڈ اور چائنیز تائپے بالترتیب دوسرے اور تیسرے نمبر پر رہے۔
یہ چیمپئن شپ صرف مقابلہ نہیں بلکہ ثقافتی تبادلہ، ‘نیشنز نائٹ’ اور ISF اکیڈمی ورکشاپس کا حسین امتزاج بھی تھی، جس نے نوجوان کھلاڑیوں کو کھیل کی حفاظت، اینٹی ڈوپنگ اور فٹنس کے حوالے سے آگاہی دی۔
ایس جونیئر گالف لیگ کے تمام نو کھلاڑی لیول 1 سرٹیفائیڈ تھے جنہوں نے تین ماہ کی سخت تربیت کے بعد اس مقابلے میں حصہ لیا۔ ٹورنامنٹ ڈائریکٹر مونیا امالو نے پاکستانی کھلاڑیوں کی توانائی اور پیشہ ورانہ انداز کو سراہا۔
وفد کی سربراہ منزعہ شاہین نے اس تجربے کو پاکستان کی گالف کے لیے سنگ میل قرار دیا۔ سرپرستِ اعلیٰ جنرل ہلال نے ڈاکٹر اسما شامی اور منزہ شاہین کی کاوشوں کو سراہا جنہوں نے نوجوان کھلاڑیوں کے لیے بین الاقوامی شرکت ممکن بنائی۔
ڈاکٹر اسما شامی نے کہا: "AJGL کے نوجوانوں کی بڑی تعداد میں شرکت میرے لیے باعثِ فخر ہے۔ یہ پاکستان میں گالف کی ترقی کی ایک عاجزانہ کوشش ہے۔”
ایگزیکٹو ڈائریکٹر احسن عمر نے کہا کہ AJGL کے ساتھ مل کر مستقبل میں مزید بین الاقوامی ٹورنامنٹس کروائے جائیں گے۔
یہ نوجوان گالفرز نہ صرف اسکور کارڈز بلکہ یادگار تجربات کے ساتھ وطن واپس لوٹے ہیں — جو پاکستان کے روشن کھیلوں کے مستقبل کی بنیاد رکھیں گے۔
