پاکستان اور ویسٹ انڈیز کے درمیان پہلا ون ڈے انٹرنیشنل جمعہ کو کھیلا جائے گا۔
تاروبا ٹرینیڈاڈ 7 اگست۔ پاکستان اور ویسٹ انڈیز کی کرکٹ ٹیمیں جمعہ کو تین میچوں کی سیریز کے پہلے ون ڈے انٹرنیشنل میں مدمقابل ہونگی۔
یہ ڈے نائٹ میچ تاروبا ٹرینیڈاڈ کے برائن لارا کرکٹ سٹیڈیم میں کھیلا جائے گا۔ سیریز کے بقیہ دو میچز بھی اسی سٹیڈیم میں10 اور 12 اگست کو ہونگے۔
پاکستان اور ویسٹ انڈیز کی ٹیمیں اس ون ڈے سیریز سے قبل امریکہ میں تین ٹی ٹوئنٹی میچوں کی سیریز کھیل چکی ہیں جو پاکستان نے جیتی تھی۔ پاکستان ٹیم کی قیادت وکٹ کیپر بیٹر محمد رضوان کررہے ہیں۔
محمد رضوان ُپرعزم ہیں کہ پاکستان ٹیم اس سیریز میں اچھی کارکردگی کا مظاہرہ کرے گی۔ تمام کھلاڑی اپنی بہترین صلاحیتیں دکھانے کے لیے تیار اور ُپرجوش ہیں اور ٹی ٹوئنٹی سیریز کی جیت کا مومینٹم برقرار رکھنے کی کوشش کریں گے۔
پاکستان ون ڈے سکواڈ محمد رضون ( کپتان/ وکٹ کیپر ) سلمان علی آغا۔عبداللہ شفیق۔ ابرار احمد۔ بابراعظم۔ فہیم اشرف۔ حسن علی ۔حسن نواز۔ حسین طلعت ۔ محمد حارث ( وکٹ کیپر ) محمد نواز۔نسیم شاہ۔ شاہین شاہ آفریدی اور سفیان مقیم پر شامل ہے۔
فخرزمان ہمسٹرنگ کی تکلیف کے سبب سیریز سے باہر ہوگئے ہیں۔حسن نواز ٹی ٹوئنٹی انٹرنیشنل میں عمدہ کارکردگی کے بعد پہلی بار ون ڈے سکواڈ کا حصہ بنے ہیں۔
ویسٹ انڈیز شائی ہوپ کی قیادت میں میدان میں اترے گی۔ ویسٹ انڈیز نے ہوم گراؤنڈ پر اپنی آخری تین ون ڈے سیریز جیت رکھی ہیں لیکن انگلینڈ میں کھیلی گئی آخری سیریز میں اسے تین صفر سے شکست ہوئی تھی۔
پاکستان اسوقت ون ڈے کی عالمی رینکنگ میں چوتھے نمبر پر ہے جبکہ ویسٹ انڈیز کا نمبر دسواں ہے۔ دونوں ٹیموں کے درمیان ابتک 137 ون ڈے انٹرنیشنل کھیلے جاچکے ہیں جن میں پاکستان نے 63 جیتے ہیں۔ ویسٹ انڈیز نے 71 میں کامیابی حاصل کی ہے اور 3 میچز ٹائی ہوئے ہیں۔
دونوں ٹیموں کے درمیان آخری ون ڈے سیریز 2022 میں ملتان میں کھیلی گئی تھی جو پاکستان نے تین صفر سے جیتی تھی۔
