پہلا ویمنز ون ڈے انٹرنیشنل: پاکستان اور جنوبی افریقہ کی ٹیمیں منگل کو مدمقابل ۔
لاہور 15 ستمبر۔ پاکستان اور جنوبی افریقہ کی خواتین کرکٹ ٹیموں کے درمیان پہلا ون ڈے انٹرنیشنل منگل کو قذافی سٹیڈیم لاہور میں کھیلا جائے گا۔
تین میچوں کی سیریز کے اگلے دو ون ڈے انٹرنیشنل بھی لاہور میں19 اور 22 ستمبر کو کھیلے جائیں گے۔ تینوں میچز دوپہر ساڑھے تین بجے شروع ہونگے۔
یہ سیریز پاکستان ویمنز ٹیم کے لیے بڑی اہمیت کی حامل ہے۔ جسے30 ستمبر سے شروع ہونے والے آئی سی سی ویمنز ورلڈ کپ میں حصہ لینا ہے۔ پاکستان ویمنز ٹیم اپنا پہلا میچ 2 اکتوبر کو بنگلہ دیش کے خلاف کولمبو میں کھیلے گی۔
پاکستان ویمنز ٹیم نے آئی سی سی ویمنز ورلڈ کپ کوالیفائر میں شاندار کارکردگی کا مظاہرہ کرتے ہوئے تمام پانچوں میچ جیتے تھے۔ پاکستان ویمنز ٹیم نے جنوبی افریقہ ویمنز کے خلاف سیریز کی تیاری کے لیے کیمپ میں بھی ہیڈ کوچ محمد وسیم کی نگرانی میں سخت ٹریننگ کی ہے۔
کپتان فاطمہ ثنا کا کہنا ہے کہ ورلڈ کپ سے قبل اس طرح کی سیریز کا ٹیم کو بہت فائدہ ہوتا ہے۔ کھلاڑیوں کے لیے اچھا موقع ہے کہ انہوں نے پورے سال جو تیاری کی ہے اسے میدان میں عملی جامہ پہناسکیں۔
انہوں نے کہا کہ سب کو پتہ ہے کہ پاکستان ٹیم بولنگ پر انحصار کرتی ہے لہذا اس بار کوشش ہوگی کہ بیٹنگ کی طرف سے بھی سپورٹ ملے۔کیمپ میں بیٹنگ پر بھی کافی توجہ دی گئی ہے۔
جنوبی افریقہ ویمنز ٹیم کی کپتان لارا وولوارٹ بھی اس سیریز کو ورلڈ کپ کی تیاری کے سلسلے میں اہم قرار دیتی ہیں۔ان کا کہنا ہے کہ ورلڈ کپ میں بھی اسی طرح کی کنڈیشنز ہونگی لہذا یہ ایک اچھی تیاری ہوگی۔
انہوں نے کہا کہ پاکستان ایک اچھی ٹیم ہے۔اس کے پاس چند اچھی بیٹرز ہیں اور سپن کو اچھا کھیلنے والی کھلاڑی بھی ہیں ۔ سیریز میں اچھا مقابلہ رہے گا۔
پاکستان اور جنوبی افریقہ کی خواتین ٹیموں کے درمیان ابتک 28 ون ڈے انٹرنیشنل کھیلے جاچکے ہیں جن میں پاکستان نے5 جیتے ہیں ۔ 21 میں جنوبی افریقہ نے کامیابی حاصل کی ہے۔ایک میچ ٹائی ہوا ہے اور ایک کا نتیجہ برآمد نہیں ہوا ہے۔
دونوں ٹیموں کے درمیان آخری ون ڈے سیریز 2023 میں کراچی میں کھیلی گئی تھی جو جنوبی افریقہ نے دو ایک سے جیتی تھی۔
پاکستان کی بیٹر سدرہ امین کو ون ڈے انٹرنیشنل میں دو ہزار رنز مکمل کرنے کے لیے صرف22 رنز درکار ہیں۔وہ بسمہ معروف اور جویریہ خان کے بعد یہ سنگ میل عبور کرنے والی پاکستان کی تیسری بیٹر ہونگی۔
نشرہ سندھو کو ون ڈے انٹرنیشنل میں اپنی 100 وکٹیں مکمل کرنے کے لیے صرف 2 وکٹیں درکار ہیں۔
ان سے قبل ثنا میر اور ندا ڈار سو سے زائد وکٹیں حاصل کرچکی ہیں۔
پاکستان ویمنز ٹیم ان کھلاڑیوں پر مشتمل ہے۔ فاطمہ ثنا ( کپتان ) ۔ منیبہ علی۔ عالیہ ریاض۔ ڈیانا بیگ۔ ایمان فاطمہ ۔نشرہ سندھو۔سعدیہ اقبال۔ صدف شمس۔رامین شمیم۔ عمیمہ سہیل۔ نتالیہ پرویز۔ شوال ذوالفقار۔ سدرہ امین۔ سدرہ نواز اور سیدہ عروب شاہ۔
