نیشنل ٹی ٹوئنٹی کپ : ایبٹ آباد اور لاہور بلوز کی کامیابی
ملتان / فیصل آباد 16 مارچ۔ نیشنل ٹی ٹوئنٹی کپ کے سلسلے میں اتوار کے روز کھیلے گئے میچوں میں ایبٹ آباد نے راولپنڈی کو 7 وکٹوں سے شکست دیدی جبکہ لاہور بلوز نے بہاولپور کو 9 وکٹوں سے ہرادیا۔
ملتان کرکٹ اسٹیڈیم میں گروپ سی کے میچ میں ایبٹ آباد نے ٹاس جیت کر راولپنڈی کو پہلے بیٹنگ دی جو 104 رنز بناکر آؤٹ ہوگئی۔ مبصرخان 24 رنز کے ساتھ ٹاپ اسکورر رہے۔
ارشد اقبال اور شہاب خان نے بالترتیب 12 اور 21 رنز دے کر تین تین وکٹیں حاصل کیں۔
ایبٹ آباد نے مطلوبہ اسکور 14 ویں اوور میں تین وکٹوں کے نقصان پر پورا کرلیا۔ کامران غلام نے 3 چوکوں اور ایک چھکے کی مدد سے 37 رنز اسکور کیے اور آؤٹ نہیں ہوئے۔
ارشد اقبال پلیئر آف دی میچ قرار پائے۔
اقبال اسٹیڈیم فیصل آباد میں کھیلے گئے گروپ بی کے میچ میں بہاولپور نے ٹاس جیت کر پہلے بیٹنگ کی اور پوری ٹیم صرف 97 رنز بناکر آؤٹ ہوگئی۔عمران رندھاوا نے 22 رنز اسکور کیے۔
قاسم اکرم اور سلمان خان نے بالترتیب 6 اور 18 رنز دے کر تین تین وکٹیں حاصل کیں۔
جواب میں لاہور بلوز نے 10 ویں اوور میں مطلوبہ اسکور صرف ایک وکٹ کے نقصان پر پورا کرلیا۔
عمرصدیق نے جارحانہ بیٹنگ کرتے ہوئے4 چھکوں اور 3 چوکوں کی مدد سے 41 رنز اسکور کیے۔عمران بٹ نے 8 چوکوں کی مدد سے48 رنز کی اننگز کھیلی اور وہ آؤٹ نہیں ہوئے۔
قاسم اکرم کو پلیئر آف دی میچ قرار دیا گیا۔
