معذور افراد کے عالمی دن کے موقع پر پشاور میں پیرا ٹیبل ٹینس چیمپئن شپ کا انعقاد
معذور افراد کے عالمی دن کے موقع پر پشاور میں پیرا ٹیبل ٹینس چیمپئن شپ کا انعقاد
پشاور( سپورٹس لنک رپورٹ) خیبرپختونخوا ٹیبل ٹینس ایسوسی ایشن نے ڈائریکٹوریٹ جنرل آف سپورٹس کے پی، ایسوسی ایشن برائے بحالی جسمانی معذورین (ARPD)، گورنمنٹ اسپیشل ایجوکیشن کمپلیکس، اور ریجنل سپورٹس آفس پشاور کے تعاون سے معذوروں کے عالمی دن کی یاد میں دو روزہ پیرا ٹیبل ٹینس چیمپئن شپ کا کامیابی سے انعقاد کیا۔
چیمپئن شپ کے مہمان خصوصی تاشفین حیدر ڈائریکٹر جنرل سپورٹس کے پی تھے۔ مہمان خصوصی میں کاشف فرحان، آر ایس او پشاور اور وسیم، ڈائریکٹر اے آر پی ڈی شامل تھے جنہوں نے کھلاڑیوں کی متاثر کن پرفارمنس کو سراہا۔
افتتاحی تقریب کے مہمانِ خصوصی ڈائریکٹر جنرل اسپورٹس خیبرپختونخوا تاشفین حیدر تھے۔ اس موقع پر انہوں نے کہا کہ "معذور کھلاڑی ہمارے معاشرے کا فخر ہیں۔
خیبرپختونخوا حکومت ان کی صلاحیتوں کو اجاگر کرنے اور انہیں بہترین سہولیات فراہم کرنے کے لیے ہر ممکن اقدامات کر رہی ہے۔ ایسے مقابلے نہ صرف ان کھلاڑیوں کا اعتماد بڑھاتے ہیں بلکہ معاشرے میں مثبت شعور بھی اجاگر کرتے ہیں۔
ایونٹ میں مرد اور خواتین دونوں پیرا ایتھلیٹس کے لیے پانچ مختلف کیٹگریزکے مقابلے شامل تھے جن کے مطابق خواتین کی وہیل چیئرکیٹگری میں تاجمینہ بی بی نے روبینہ کو 3-0 سے شکست دی۔
میل کیٹگری میں اقرار نے طاہر کو 3-1 سے شکست دی۔ وہیل چیئرکیٹگری میںذاکر نے شاہ مسلم کو 2-1 سے شکست دی۔ مبین نے مومن کے خلاف 2-0 سے کامیابی حاصل کی۔
پاکستان ٹیبل ٹینس فیڈریشن کے نائب صدر کفایت اللہ خان اور سینئر نائب صدر کے پی ٹیبل ٹینس ایسوسی ایشن اور نیشنل پیرا چیمپئن اور کوچ میاں ابصار علی کو خصوصی طور پر خراج تحسین پیش کیا گیا
جن کی انتھک کوششوں، قیادت اور عزم نے اس پر اثر ایونٹ کے انعقاد اور اس کو انجام دینے میں مرکزی کردار ادا کیا۔ کھیلوں کے ذریعے معذور افراد کو بااختیار بنانے کے لیے ان کے مسلسل کام کو مہمانوں اور شرکائ نے یکساں طور پر سراہا۔
