سوئیڈن کے نوجوان نے فٹبال کنٹرول کا عالمی ریکارڈ توڑ دیا
سوئیڈن میں فٹبال سے غیر معمولی لگاؤ رکھنے والے ایک نوجوان نے اپنی محنت، برداشت اور عزم سے ایک نیا عالمی ریکارڈ قائم کر دیا۔
خبر رساں اداروں کے مطابق سوئیڈن کے شہر لنکوپنگ میں واقع رائڈشیلن اسپورٹس کمپلیکس میں ڈینیئل یعقوب نے فٹبال کو مسلسل 28 گھنٹے، 21 منٹ اور 2 سیکنڈ تک ہوا میں کنٹرول میں رکھ کر گینیز ورلڈ ریکارڈ بنا ڈالا۔
ڈینیئل یعقوب نے مردوں کی کیٹیگری میں طویل ترین دورانیے تک فٹبال کنٹرول کرنے کا ریکارڈ اپنے نام کیا۔ اس دوران انہوں نے پیر، گھٹنے، سینہ اور سر کی مدد سے فٹبال کو زمین پر گرنے نہیں دیا۔ یہ کوشش جسمانی اور ذہنی طور پر نہایت مشکل سمجھی جا رہی ہے، جس کے لیے طویل تربیت اور غیر معمولی توجہ درکار ہوتی ہے۔
گینیز ورلڈ ریکارڈز کے قواعد کے مطابق ڈینیئل یعقوب کو ہر تین گھنٹے بعد 15 منٹ کے وقفے کی اجازت دی گئی تھی، جس کے دوران وہ آرام اور توانائی بحال کر سکتے تھے۔ اس کے باوجود طویل دورانیے تک مسلسل توازن برقرار رکھنا ایک بڑا چیلنج تھا، جسے انہوں نے کامیابی سے عبور کیا۔
اس سے قبل یہ عالمی ریکارڈ برطانیہ کے ڈین میگنس کے پاس تھا، جنہوں نے جون 2010 میں 26 گھنٹے تک فٹبال کنٹرول کر کے یہ اعزاز حاصل کیا تھا۔ ڈینیئل یعقوب نے نہ صرف اس ریکارڈ کو توڑا بلکہ اسے نمایاں فرق سے بہتر بھی بنایا۔
گینیز ورلڈ ریکارڈز سے گفتگو کرتے ہوئے ڈینیئل یعقوب نے کہا کہ یہ کامیابی ان کے فٹبال سے گہرے جنون، کانٹینٹ کی تخلیق کے شوق اور ذاتی ترقی کے سفر کا نتیجہ ہے۔ ان کا کہنا تھا کہ وہ نوجوانوں کو یہ پیغام دینا چاہتے ہیں کہ مسلسل محنت اور لگن کے ذریعے ناممکن کو ممکن بنایا جا سکتا ہے۔
