انجری کے بعد شاندار واپسی: عبد الرحمٰن کی سایکاس جونیئر ٹینس چیمپئن شپ میں دو ٹرافیاں
لاہور: سایکاس اسکول کے ہونہار طالب علم عبد الرحمٰن بن محمد سہیل رانا نے گھٹنے کی شدید تکلیف کے باعث 8 ماہ تک کھیل سے دور رہنے کے بعد مسابقتی ٹینس میں یادگار واپسی کرتے ہوئے سایکاس پنجاب جونیئر ٹینس چیمپئن شپ میں دو ٹرافیاں اپنے نام کر لیں۔
انڈر 10، انڈر 12 اور انڈر 14 کیٹیگریز میں پاکستان کے سابق نمبر ون کھلاڑی عبد الرحمٰن نے سابق ٹینس پلیئر حسیب اسلم کی زیرِ نگرانی سخت تربیت مکمل کرنے کے بعد ٹورنامنٹ کے تین فائنلز (انڈر 16 سنگلز، انڈر 18 سنگلز اور انڈر 18 ڈبلز) میں جگہ بنائی۔
انڈر 18 سنگلز کے سیمی فائنل میں عبد الرحمٰن نے شاندار کھیل کا مظاہرہ کرتے ہوئے عمر کے خلاف 5-6 کے خسارے سے نکل کر میچ کو ٹائی بریکر تک پہنچایا اور 6-7 (2-7) سے فتح حاصل کی،
جبکہ انڈر 18 ڈبلز کے سیمی فائنل میں انہوں نے عمر کے ساتھ مل کر معاذ اور آیان کی جوڑی کو شکست دے کر فائنل کے لیے کوالیفائی کیا۔
عبد الرحمٰن نے انڈر 16 سنگلز کے سیمی فائنل میں معاذ کو 3-6 سے ہرا کر فائنل تک رسائی حاصل کی، تاہم فائنل کے روز 5 اہم میچز کھیلنے کی وجہ سے وقت کی کمی کے باعث فائنل مقابلہ نہ ہو سکا۔
انتظامیہ نے عبد الرحمٰن اور ایم آیان (جنہوں نے دوسرے سیمی فائنل میں عمر علی کو شکست دی تھی) کو مشترکہ طور پر انڈر 16 سنگلز کا فاتح قرار دیا۔ علاوہ ازیں، عبد الرحمٰن نے اپنے پارٹنر کے ساتھ انڈر 18 ڈبلز کی ٹرافی بھی مشترکہ طور پر حاصل کی۔
کامیابی کے بعد عبد الرحمٰن نے سیکاس اسکول سسٹمز کے سربراہ شہریار سلامت کا خصوصی طور پر شکریہ ادا کیا، جو نوجوان کھلاڑیوں کو اسپورٹس اسکالرشپس فراہم کرنے کے ساتھ ساتھ تعلیم اور کھیل کے بہترین توازن میں معاونت کرتے ہیں۔ انہوں نے اپنے کوچ حسیب اسلم کی رہنمائی،
پنجاب ٹینس ایسوسی ایشن کے عہدیدار رشید ملک کا مسابقتی ماحول کی فراہمی، اور سیکاس جے ٹی کی پرنسپل مس نزہت کا تعلیمی تعاون فراہم کرنے پر شکریہ ادا کیا۔
عبد الرحمٰن نے اللہ تعالیٰ کا شکر ادا کرتے ہوئے اپنے والدین اور دادا دادی کی دعاؤں اور حوصلہ افزائی کا اعتراف کیا اور اپنی اس کامیابی کو مستقل مزاجی، محنت اور پختہ عزم کا نتیجہ قرار دیا۔
