جوز بٹلر نے ٹی ٹوئنٹی کرکٹ میں تاریخ رقم کردی، 15 ہزار رنز مکمل کرنے والے پہلے بیٹر بن گئے
ٹی ٹوئنٹی کرکٹ کی دنیا میں جوز بٹلر نے وہ کارنامہ انجام دے دیا جو اس سے پہلے کوئی بیٹر نہیں کر سکا۔ انگلینڈ کے وکٹ کیپر بلے باز نے مختصر فارمیٹ میں 15 ہزار رنز مکمل کرکے نئی تاریخ رقم کردی اور اس اعزاز تک پہنچنے والے دنیا کے پہلے کھلاڑی بن گئے۔
انگلینڈ کے جارح مزاج وکٹ کیپر بیٹر جوز بٹلر نے ٹی ٹوئنٹی کرکٹ میں ایسا ریکارڈ قائم کردیا ہے جو اس سے پہلے کوئی کھلاڑی حاصل نہیں کر سکا۔ سری لنکا کے خلاف دوسرے ٹی ٹوئنٹی انٹرنیشنل میں ایک رن لیتے ہی بٹلر نے مختصر فارمیٹ میں 15 ہزار رنز مکمل کرلیے۔
کارڈف میں سری لنکا کے خلاف دوسرے ٹی ٹوئنٹی انٹرنیشنل کے دوران جوز بٹلر نے ایشان ملنگا کی گیند پر سنگل لے کر اپنے ٹی ٹوئنٹی کیریئر کے 15 ہزار رنز مکمل کیے اور اس تاریخی کارنامے کے ساتھ وہ دنیا کے پہلے بیٹر بن گئے جنہوں نے یہ ہندسہ عبور کیا ہے۔
15 ہزار رنز مکمل کرتے ہی بٹلر نے ویسٹ انڈیز کے سابق آل راؤنڈر کیرون پولارڈ کو بھی پیچھے چھوڑ دیا اور ٹی ٹوئنٹی کرکٹ میں سب سے زیادہ رنز بنانے والے بیٹر بن گئے۔ پولارڈ نے 754 میچز میں 14 ہزار 999 رنز بنائے ہیں۔
جوز بٹلر نے اپنے 15 ہزار رنز 528 ٹی ٹوئنٹی میچز میں 35.46 کی اوسط اور 147.46 کے شاندار اسٹرائیک ریٹ سے بنائے ہیں۔ ان کے ریکارڈ میں 9 سنچریاں اور 107 نصف سنچریاں بھی شامل ہیں، جو مختصر فارمیٹ میں ان کی مستقل مزاجی اور جارحانہ بیٹنگ کی عکاسی کرتی ہیں۔
ٹی ٹوئنٹی کرکٹ میں سب سے زیادہ رنز بنانے والے بیٹرز کی فہرست میں انگلینڈ کے ایلکس ہیلز 537 میچز میں 14 ہزار 581 رنز کے ساتھ تیسرے نمبر پر ہیں،
جبکہ ویسٹ انڈیز کے کرس گیل 463 میچز میں 14 ہزار 562 اور آسٹریلیا کے ڈیوڈ وارنر 439 میچز میں 14 ہزار 284 رنز کے ساتھ بالترتیب چوتھے اور پانچویں نمبر پر موجود ہیں۔
یوں جوز بٹلر نے نہ صرف 15 ہزار ٹی ٹوئنٹی رنز مکمل کرنے والے پہلے بیٹر کا اعزاز حاصل کیا بلکہ کیرون پولارڈ کو پیچھے چھوڑ کر اس فارمیٹ کے سب سے زیادہ رنز بنانے والے کھلاڑی بھی بن گئے۔
جوز بٹلر کا یہ کارنامہ ٹی ٹوئنٹی کرکٹ میں ان کی طویل کامیاب کارکردگی اور جارحانہ بیٹنگ کا ایک اور بڑا سنگِ میل بن گیا ہے۔
